ఒంటిమిట్ట ఉత్సవాలకు రండి...
సీఎంను ఆహ్వానించిన టీటీడీ అధికారులు. ఏర్పాట్లపై సీఎం వాకబుతెలు
కడప జిల్లా ఒంటిమిట్ట శ్రీకోదండరామస్వామి బ్రహ్మోత్సవాలకు ముఖ్యమంత్రి నారా చంద్రబాబును టీటీడీ అధికారులు ఆహ్వానించారు. కోదండరాముడి బ్రహ్మోత్సవాల ఆహ్వాన పత్రికను టీటీడీ అదనపు ఈఓ సీహెచ్. వెంకయ్య చౌదరి గురువారం ముఖ్యమంత్రికి అందించారు. రాష్ట్ర గవర్నర్ అబ్దుల్ నజీర్ ను కూడా టీటీడీ వేదపండితులు కొదండరాముడి కల్యాణానికి ఆహ్వానించారు. ఆయనకు శ్రీవారి వస్త్రంతో సత్కరించి, ప్రసాదాలు కూడా అందించాారు.
ఏప్రిల్ ఒకటో తేదీ ఒంటిమిట్టలో శ్రీరామనవమి ఉత్సవాల్లో భాగంగా నిర్వహించే శ్రీకోదండరామస్వామివారి కల్యాణోత్సవానికి ముఖ్యమంత్రి నారా చంద్రబాబు హాజరుకానున్నారు.
ఒంటిమిట్ట కోదండరామస్వామి ఆలయంలో స్వామివారి వార్షిక బ్రహ్మోత్సవాలకు మార్చి 26వ తేదీ అంకురార్పణ జరుగుతుంది. 27వ తేదీ ధ్వజారోహణంతో బ్రహ్మోత్సవాలు ప్రారంభం కానున్నాయి. ఏప్రిల్ ఒకటో తేదీ శ్రీకోదండరామస్వామి వారి కల్యాణోత్సవం నిర్వహించనున్నారు. దీనికోసం టీటీడీ అధికారులు విస్తృతంగా ఏర్పాట్లు చేస్తోంది.
టీటీడీ అదనపు ఈఓ వెంకయ్యచౌదరి తిరుమల, ఒంటిమిట్ట ఆలయాల అధికారును వెంట తీసుకుని గురువారం ఉదయం ఉండవల్లిలోని ముఖ్యమంత్రి నారా చంద్రబాబు నివాసానికి చేరుకున్నారు. ఉగాది శుభాకాంక్షలు తెలియజేశారు. టీటీడీ వేద పండితులు ముఖ్యమంత్రికి శేషవస్త్రం సమర్పించడంతో పాటు వేదాశీర్వచనం అందించారు. ఆ తరువాత శ్రీవారి లడ్డూ ప్రసాదాల తోపాటు పంచాంగం, కంకణాలు కూడా వేదపండితులు అందించారు.
