ఆంధ్రా భద్రాద్రి:ఏప్రిల్ 1న సీఎం పట్టువస్త్రాల సమర్పణ

"మార్చి 26వ తేదీ ఒంటిమిట్ట శ్రీకోదండరాముడి బ్రహ్మోత్సవాలు అంకురార్పణ, మార్చి 27న ధ్వజారోహణంతో బ్రహ్మోత్సవాలు మొదలవుతాయి. ఏప్రిల్ ఒకటిన జరిగే శ్రీ సీతారాముల కళ్యాణోత్సవంలో ముఖ్యమంత్రి నారా చంద్రబాబు పట్టువస్త్రాలు సమర్పిస్తారు" అని చెప్పారు.

ఒంటిమిట్టలో శ్రీరామనవమిని అత్యతం కట్టుదిట్టమైన భద్రత ఏర్పాట్ల మధ్య నిర్వహించడానికి ప్రత్యేక ఏర్పాట్లు చేస్తున్నామని టీటీడీ జేఈఓ వి. వీరబ్రహ్మం తెలిపారు. యాత్రికుల రద్దీ దృష్ట్యా భద్రత, ట్రాఫిక్ నియంత్రణ, గ్యాలరీలు, పార్కింగ్, పబ్లిక్ అడ్రెస్ సిస్టమ్ వంటి ఏర్పాట్లు పటిష్టంగా ఏర్పాటు చేస్తున్నామని చెప్పారు. వేసవిని దృష్టిలో ఉంచుకుని చలువ పందిళ్ల ఏర్పాటు తోపాటు టీటీడీ ద్వారా తాగునీరు, మజ్జిగ, అన్నప్రసాదాలు, వైద్య సదుపాయాలు కల్పించడానికి చర్యలు తీసుకుంటున్నట్లు చెప్పారు. ఆ మేరకు ఏర్పాట్లు చేయాలని ఆయన అధికారులను ఆదేశించారు. ఆలయ గ్యాలరీల వద్ద ఓఆర్‌ఎస్ ప్యాకెట్లు పంపిణీ చేయడం తోపాటు, అంబులెన్స్ సేవలు అందుబాటులో ఉంచాలని కూడా ఆయన అధికారులకు సూచించారు. నిరంతర విద్యుత్ సరఫరా, తిరుమల ఆలయానికి ఏమాత్రం తీసిపోని విధంగా పుష్పాలంకరణ, సాంస్కృతిక కార్యక్రమాలు కూడా నిర్వహించనున్నట్లు తెలిపారు.

ఒంటిమిట్టలో ఏప్రిల్ ఒకటో తేదీ శ్రీసీతారాముల కల్యాణోత్సవం తరువాత యాత్రికులకు తలంబ్రాలు పంపిణీకి ప్రత్యేక శ్రద్ధ తీసుకోవాలని గత నెలలో నిర్వహించిన సమావేశంలో టీటీడీ జేఈఓ వి. వీరబ్రహ్మం అధికారులకు సూచనలు చేశారు. అన్న‌ప్ర‌సాదాల పంపిణీకి 17 కౌంటర్లు ఏర్పాటు చేయడంతో పాటు తొక్కిసలాటకు ఆస్కారం లేకుండా ప్రవేశ, నిష్క్రమణ గేట్లు పటిష్టంగా ఏర్పాటు చేస్తున్నట్లు ఆయన తెలిపారు.