తిరుమలలో రేపు నారా దేవాన్ష్ పుట్టిన రోజు వేడుక..

తిరుమల మాతృశ్రీ తరిగొండ వెంగమాంబ అన్నదాన సత్రంలో యాత్రికులకు అన్నప్రసాదాలు కూడా వడ్డించనున్నారు. ఒకరోజు అన్నదానం చేయడానికి వీలుగా ఎస్వీ అన్నదాన ట్రస్టుకు 44 లక్షల రూపాయలు విరాళంగా అందించనున్నారు.

ప్రతి సంవత్సరం తన మనవడు నారా దేవాన్ష్ పుట్టిన రోజు తిరుమల యాత్రకు రావడం ముఖ్యమంత్రి నారా చంద్రబాబు ఆనవాయితీగా పాటిస్తున్నారు. అందులో భాగంగా శుక్రవారం సాయంత్రం హెలికాప్టర్ లో చంద్రబాబు, ఆయన భార్య నారా భువనేశ్వరి, కొడుకు నారా లోకేష్, కోడలు నారా బ్రహ్మణి, మనవడు నారా దేవాన్ష్ తో కలిసి తిరుపతికి చేరుకోనున్నారు. ఆ తరువాత తిరుమలకు వెళ్లి, రాత్రికి అక్కడే బస చేస్తారు.

తిరుమల శ్రీవారిని శనివారం ఉదయం వీఐపీ బ్రేక్ సమయంలో కుటుంబ సమేతంగా ముఖ్యమంత్రి నారా చంద్రబాబు కుటుంబీకులు దర్శించుకుంటారు. ఆ తరువాత అన్నదాన సత్రంలో యాత్రికులకు అన్నప్రసాదాలు వడ్డించనున్నారు. దీనికోసం టీటీడీ అధికారుల తోపాటు జిల్లా పోలీస్ యంత్రాంగం భద్రతా ఏర్పాట్లు సమీక్షించారు.