Telangana MLC Polls | తెలంగాణలో బీజేపీ ఎమ్మెల్సీ అభ్యర్థుల ప్రకటన

- కరీంనగర్-నిజామాబాద్ ఆదిలాబాద్-మెదక్ అనే ఎమ్మెల్సీ ఉపాధ్యాయ నియోజకవర్గం నుంచి మల్కా కొమరయ్య, కరీంనగర్-నిజామాబాద్ ఆదిలాబాద్-మెదక్ అనే ఎమ్మెల్సీ గ్రాడ్యుయేట్ల నియోజకవర్గానికి సి అంజి రెడ్డి, నల్గొండ-వరంగల్-ఖమ్మం అనే ఎమ్మెల్సీ ఉపాధ్యాయ నియోజకవర్గం నుంచి పులి సరోత్తం రెడ్డి పేరును బీజేపీ ప్రకటించింది.

మల్కా కొమరయ్య కరీంనగర్ జిల్లాలోని పెద్దపల్లి నివాసి. ఉస్మానియా విశ్వవిద్యాలయం నుంచి బి.ఇ. చదివిన తర్వాత పాఠశాలలను స్థాపించారు. ఈయన పెద్దపల్లి, నిర్మల్, హైదరాబాద్‌లో విద్యా సంస్థలను ఏర్పాటు చేశారు. ప్రస్తుతం హైదరాబాద్‌లోని పల్లవి గ్రూప్ ఆఫ్ ఇన్‌స్టిట్యూషన్స్ చైర్మన్‌గా ఉన్నారు.విద్యా సంస్థల నిర్వాహకుడిగా,విద్యావేత్తగా విద్యార్థులకు నాణ్యమైన విద్యను అందించడానికి కృషి చేశారు.

గ్రాడ్యుయేట్ అయిన అంజి రెడ్డి మెదక్ జిల్లాలోని రామచంద్రపురం నివాసి. ఈయన విభిన్న రంగాల్లో పెట్టుబడులు పెట్టారు. ఆయన భార్య గోదావరి అంజి రెడ్డి ప్రస్తుతం బీజేపీ సంగారెడ్డి జిల్లా అధ్యక్షురాలిగా పనిచేస్తున్నారు.బంజారాహిల్స్ హరే కృష్ణ గోల్డెన్ టెంపుల్‌లో వైకుంఠ ఏకాదశి వేడుకలను అంజి రెడ్డి గత రెండు దశాబ్దాలుగా నిర్వహిస్తున్నారు. ఎస్ఆర్ ట్రస్ట్ ను నెలకొల్పి పేదలకు విద్యా అవకాశాలను పెంచడంతో పాటు గ్రామాల్లో తాగునీటిని అందించడానికి కృషి చేశారు.

వరంగల్‌ జిల్లాకు చెందిన సరోత్తం రెడ్డి 21 సంవత్సరాలకు పైగా స్కూల్ అసిస్టెంట్‌గా, 10 సంవత్సరాలకు పైగా ప్రధానోపాధ్యాయుడిగా పనిచేశారు. ఆయన 2012 నుంచి 2019 వ సంవత్సరం వరకు పీఆర్‌టియూ ప్రధాన కార్యదర్శిగా ఉన్నారు. ఉపాధ్యాయుల జేఏసీలో భాగంగా ప్రత్యేక తెలంగాణ ఆందోళనలో ఆయన చాలా చురుకుగా పనిచేశారు.