Revanth Reddy | దావోస్‌లో సీఎం రేవంత్ తొలి ఒప్పందం..

తెంగాణ సీఎం రేవంత్ రెడ్డి ప్రస్తుతం దావోస్ వేదికగా జరుగుతున్న వరల్డ్ ఎకనామిక్ ఫోరమ్ 2025 వార్షిక సదస్సులో పాల్గొంటున్నారు. ఈ క్రమంలో మంగళవారం తెలంగాణ ప్రభుత్వం దావోస్‌లో తొలి ఒప్పందం చేసుకుంది. యూనిలీవర్ సీఈఓ హయన్ షూమాకర్, చీఫ్ సప్లైచైన్ ఆఫీసర్ విల్లెం ఉయిజెన్‌తో సీఎం రేవంత్, మంత్రి శ్రీధర్ బాబు, అధికారుల బృందం చర్చలు జరిపారు. ఈ చర్యల అనంతరం తెలంగాణలో పెట్టుబడులు పెట్టడానికి వారు సుముఖత వ్యక్తం చేశారు. ఈ మేరకు దావోస్‌లో తెలంగాణ ప్రభుత్వం తొలి ఒప్పందం చేసుకుంది.

యూనిలీవర్ కంపెనీ గ్లోబల్ సీఈఓతో సీఎం రేవంత్ రెడ్డి జరిపిన చర్చలు సఫలమయ్యాయి. తెలంగాణలో పెట్టుబడులు పెట్టడానికి యూనిలీవర్ ముందుకొచ్చింది. ఈ మేరకు తెలంగాణ ప్రభుత్వంతో అవగాహన ఒప్పందం కూడా కుదుర్చుకుందని తెలంగాణ ప్రతినిధుల బృందం వెల్లడించింది. వినియోగ వస్తువుల తయారీలో ప్రపంచంలోనే యూనిలీవర్ పేరొందిన బ్రాండ్‌గా ఉంది. ఆ సంస్థ ఇప్పుడు తెలంగాణలో పెట్టుబడులు పెట్టడానికి రెడీ కావడం కీలకంగా మారింది. కామారెడ్డి జిల్లాలో పామాయిల్ తయారీ యూనిట్ ఏర్పాటు చేయడానికి యూనీలివర్ అంగీకిరంచింది. తెలంగాణలో బాటిల్ క్యాప్‌ల తయారీ యూనిట్‌ను నెలకొల్పడానికి సంసిద్దతను వ్యక్తం చేసిందని సీఎం బృందం తెలిపింది.