దుబాయ్‌లో సిరిసిల్ల నేతన్నకు అరుదైన గౌరవం

- దుబాయ్ పద్మశాలి అసోసియేషన్ గుత్తికొండ రవిచంద్ర,సరస్వతిలు సిరిసిల్ల నేత కళాకారుని అరుదైన ప్రతిభను గుర్తించి దుబాయ్ కి ఆహ్వానించారు. అక్కడ జరిగిన కార్యక్రమంలో హరి ప్రసాద్ చేనేత మగ్గంపై నేసిన ఎన్నో అరుదైన ఆవిష్కరణలను ప్రదర్శించారు.

సిరిసిల్లలో పట్టుచీరలతోపాటు అంతరించిపోయిన పట్టు పీతాంబరాలను పునర్ సృష్టించిన హరి ప్రసాద్ ఆ చీరలను దుబాయ్ వేదికగా ప్రదర్శించారు. అగ్గిపెట్టెలో పట్టే పట్టుచీర,దబ్బనంలో,ఉంగరంలో దూరే పట్టుచీరలతో పాటు వస్త్రాలపై నూలు పోగుల అల్లికతో రూపొందించిన పలు చిత్రపటాలను కూడా ఈ సందర్భంగా హరిప్రసాద్ ప్రదర్శించి అందరి మన్ననలు అందుకున్నారు.

నేతన్న హరిప్రసాద్ ఇప్పటికే చేనేత రంగంలో పలు ఆవిష్కరణలు రూపొందించి రాష్ట్ర, జాతీయ స్థాయి అవార్డులు అందుకున్నారు. జీ 20 లోగోను వస్త్రం పై నేసి దేశ ప్రధాని నరేంద్ర మోదీ అభినందనలు అందుకున్న సంగతి తెలిసిందే. సిరిసిల్ల పట్టణంలోని మధ్యతరగతి పద్మశాలి కుటుంబంలో జన్మించిన హరి ప్రసాద్ తన తెలివితేటలతో చేనేత కళపై మక్కువతో మగ్గంపై అద్భుత ఆవిష్కరణలు చేశారు. ఈ కోవలో తన ప్రతిభను గుర్తించి దుబాయ్ దేశానికి ఆహ్వానించడం పట్ల దుబాయ్ ఎమిరేట్స్ పద్మశాలి అసోసియేషన్ సభ్యులకు హరిప్రసాద్ కృతజ్ఞతలు తెలిపారు.