తిరుమలకు వైసీపీ పాదయాత్ర..మంగాపురం వద్ద పోలీసుల బ్రేక్

రాజంపేట ఎంపీ మిథున్ కోసం వైసీపీ విద్యార్థి విభాగం వర్కింగ్ ప్రెసిడెంట్ హరిప్రసాదరెడ్డి సారధ్యంలో పాదయాత్ర చేపట్టారు. అన్నమయ్య జిల్లా పీలేరు నుంచి వైఎస్ఆర్ సీపీ నేతలు చేపట్టిన పాదయాత్రను మాజీ ఎమ్మెల్యే చింతల రామచంద్రారెడ్డి ప్రారంభించారు.

చంద్రగిరి మండలం శ్రీనివాసమంగాపురం వద్దకు పాదయాత్ర చేరుకుంది. అప్పటికే అక్కడ మోహరించిన పోలీసులు ఆంక్షలు విధించారు.

"తిరుమలకు శ్రీవారిమెట్ట మార్గంలో గుంపులుగా కాకుండా, ఒక్కొక్కరుగా వెళ్లాలి" అని డీఎస్పీ ప్రసాద్, సీఐ ఇమ్రాన్ ఆంక్షలు విధించారు. దీంతో వైసీపీ నాయకులు నిరసన వ్యక్తం చేశారు. దీంతో కొంతసేపు పాదయాత్ర నిలిపివేశారు. శ్రీనివాసమంగాపురం వద్దే ధర్నాకు దిగారు.

తిరుమల శ్రీవారి దర్శనానికి 50 మంది కలిసి వెళ్ళడం తప్పా అని వైసీపీ నాయకులు డిఎస్పీని ప్రశ్నించారు. టిటిడి అధికారులు ఇలా రాకూడదని సూచించారని డీఎస్పీ వారికి నచ్చచెప్పే ప్రయత్నం చేశారు. ఈ సమాచారం తెలియడంతో సత్యవేడు నియోజకవర్గ వైఎస్ఆర్సిపి ఇంచార్జ్ నూకపాటి రాజేష్ సంఘటన స్థలానికి చేరుకొని పోలీసులతో మాట్లాడారు. దాదాపు గంటకు పైగా పోలీసులు అడ్డుకున్నారు.