సెలబ్రిటీలతో సందడిగా మారిన పుట్టపర్తి..

సత్యసాయి శతజయంతి వేడుకలను టిడిపి కూటమి ప్రభుత్వం రాష్ట్ర పండుగగా నిర్వహిస్తోంది. దీంతో పుట్టపర్తి జిల్లా యంత్రాంగం తోపాటు రాష్ట్ర రెవెన్యూ శాఖ మంత్రి అనగాని సత్యప్రసాద్ సారధ్యంలోని మంత్రివర్గ ఉప సంఘం కూడా ఏర్పాటు చేసింది. సత్య సాయి సెంట్రల్ ట్రస్ట్ ఆధ్వర్యంలో ప్రశాంతి నిలయం, సత్య సాయి మహాసమాధి ఉన్న సాయికుల్వంత్ హాల్,  పరిసర ప్రాంతాలు, హిల్ వ్యూ స్టేడియం ను కూడా ఆకర్షణీయంగా తీర్చిదిద్దారు.

సత్యసాయి శతజయంతి ఉత్సవాలకు దేశంలోని అనేక ప్రాంతాల నుంచి యాత్రికులు పోటెత్తారు. ఒకసారి సెలబ్రెటీలు రావడం మరింత రద్దీకి అవకాశం ఏర్పడింది. ప్రధాని నరేంద్రమోదీ, ముఖ్యమంత్రి నారా చంద్రబాబు, ఐటీ విద్యాశాఖ మంత్రి నారా లోకేష్ పుట్టపర్తికి చేరారు. డిప్యూటీ సీఎం పవన్ కల్యాణ్, మాజీ క్రికెటర్ సచిన్ టెండూల్కర్, మాజీ విశ్వసుందరి, బాలీవుడ్ నటి ఐశ్వర్య బచ్చన్ రాకతో పాటు డ్రమ్స్ శివమణి చేరుకున్నారు. వాయిద్య విన్యాసాలతో ఊర్రూతలూగించారు. సత్యసాయి వేడుకలకు వచ్చిన యాత్రికులకు మించే ప్రముఖుల రాకకోసం వచ్చిన వారితో పుట్టపర్తి కిటకిటలాడుతోంది.

 బుధవారం ఉదయం నుంచి మధ్యాహ్నం వరకు హిల్వే స్టేడియంలో జరిగిన వేదికపై వీరిద్దరూ ప్రత్యేక ఆకర్షణగా నిలిచారు. సత్యసాయి విద్యాసంస్థల పూర్వ విద్యార్థినిగా తాను నేర్చుకున్న, తెలుసుకున్న అంశాలను ఐశ్వర్య బచ్చన్ గుర్తు చేసుకున్నారు.

సత్య సాయితో తనకున్న ఆధ్యాత్మిక అనుబంధాన్ని, దివ్యానుభూతులను సచిన్ టెండూల్కర్ సాయి భక్తులతో పంచుకున్నారు.

అత్యంత వెనుకబడిన అనంతపురం జిల్లా పుట్టపర్తిలో పుట్టిన భగవాన్ సత్యసాయి ఆధ్యాత్మిక తేజస్సు, విశ్వప్రేమ ఉన్న వ్యక్తి అన్నారు. ఈ ప్రాంతంలో ప్రజల దాహం తీర్చేందుకు సత్యసాయి చేసిన కృషి గొప్పదన్నారు. ఆయన ప్రాజక్టే  జల్ జీవన్ మిషన్ కు ప్రేరణ అయిందని పవన్ కల్యాణ్ అన్నారు. విదేశీయుల ఇళ్లలో చిత్రపటం ఉంచుకునే విధంగా సత్యసాయి శాంతి సందేశం, ప్రేమను విశ్వవ్యాపితం చేశారని ఆయన అన్నారు.

సత్యసాయి శతజయంతి ఉత్సవాల నేపథ్యంలో విద్యాసంస్థల విద్యార్థులు, ప్రజలతో హిల్ వ్యూ స్టేడియం కిక్కిరిసింది. దేశంలోని అనేక ప్రాంతాల నుంచి వచ్చిన కళాకారుల ప్రదర్శనలు కనువిందు చేశాయి. కార్యక్రమం ప్రారంభమైనప్పటి నుంచి ప్రధాని నరేంద్ర మోదీ, సీఎం ఎన్. చంద్రబాబు, సెలబ్రిటీల్లో మాజీ క్రికెటర్ సచిన్ టెండూల్కర్, మాజీ విశ్వసుందరి ఐశ్వర్య బచ్చన్, మంత్రులు ప్రదర్శనలు చూస్తూ ఆనందపడ్డారు.

తమిళనాడు నుంచి బాహుబలి డ్రమ్ముపై విన్యాసాలు ప్రదర్శించే సమయంలో డప్పు కళాకారుల ప్రదర్శన అలరించింది.

డప్పు కళాకారులను హుషారెక్కిస్తూ, డ్రమ్స్ శివమణి తెల్లటి దుస్తుల్లో వేదికపై తళుక్కుమన్నారు. నడుముకు డ్రమ్మ్ అమర్చుకున్న శివమణి స్టిక్స్ తో లయబద్దంగా దరువు వేస్తూ, చేసిన విన్యాసాలు రక్తికట్టించారు. వేదికపై ఉన్న ప్రధాని నరేంద్ర మోదీతో పాటు, ప్రముఖులు కూడా శివమణి డ్రమ్స్ విన్యాసాలకు తగినట్టు తాళం వేస్తూ కనిపించారు.

పుట్టపర్తికి ప్రముఖుల రావడం వల్ల ప్రశాంతినిలయం పరిసరాలు కిటకిటలాడాయి. కళాకారుల ప్రదర్శనలతో యాత్రికులకు  కళాకారులు కనువిందు చేస్తున్నారు.