ఒకటి కాదు రెండు కాదు లక్షలాది పుస్తకాలు చదివానని, శ్రీశ్రీ, బాలగంగాధర్‌ తిలక్‌ కవితలను తన స్పీచ్‌లలో అప్పుడప్పుడు ఉటంకించే ఆంధ్రప్రదేశ్ ఉప ముఖ్యమంత్రి పవన్‌ కల్యాణ్ ఆల్‌ ఆఫ్‌ సడెన్‌గా శనివారం విజయవాడ పుస్తక ప్రదర్శనలో దర్శనమిచ్చారు. విజయవాడ ఇందిరా గాంధీ మునిసిపల్‌ స్టేడియంలో పుస్తక ప్రదర్శన కొనసాగుతోంది. దాదాపు 250కి పైగా బుక్‌ స్టాల్స్‌ను నిర్వహాకులు ఏర్పాటు చేశారు. దాదాపు రెండున్నర గంటల సేపు పుస్తక ప్రదర్శనలో కలియ తిరిగిన పవన్‌ కల్యాణ్, నిర్వాహకులతో కూడా మాట్లాడారు. చట్టాలు, చరిత్ర, పాలిటిక్స్, పబ్లిక్‌ పాలసీ, సైన్‌ అండ్‌ టెక్నాలజీ, వ్యవసాయం, అడవులు, వృక్ష సంపద వంటి రంగాలకు సంబంధించిన పుస్తకాలను ఆయన పరిశీలించారు. వీటితో పాటు తెలుగు సాహిత్యం, తెలుగు అనువాద సాహిత్యం, నిఘంటువులు, ఆధ్యాత్మికత వంటి అంశాలకు సంబంధించిన పుస్తకాలను కూడా ఆయన పరిశీలించి కొనుగోలు చేశారు. ‘మ్యాన్స్‌ సెర్చ్‌ ఫర్‌ మీనింగ్‌’ పుస్తకం చూసి సంతోషంచిన ఆయన.. డాక్టర్‌ విక్టర్‌ ఈ ఫ్రాంకిల్‌ రాసిన ఈ పుస్తకం చదివితే నిరాశ నిస్ప్రుహలను అధికమించి ఆశావాద భావన కలుగుతుందని, తాను కష్టాల్లో ఉన్నప్పుడు ఈ పుస్తకం ఎంతో ధైర్యాన్నిచ్చిందని వ్యాఖ్యానించారు. సన్నిహితులకు బహుమతిగా ఇచ్చేందుకు అధిక సంఖ్యలో ఈ పుస్తకాన్ని కొనుగోలు చేశారు.
తిరుపతి తొక్కిసలాట ఘటన సందర్భంగా గురువారం రాత్రి వరకు అక్కడే బిజీ బిజీగా ఉన్న పవన్‌ కల్యాణ్.. శుక్రవారం తన సొంత నియోజక వర్గమైన పిఠాపురం పర్యటనకు వెళ్లారు. గోశాల షెడ్లను, సంక్రాంతి సంబురాలను ప్రారంభించారు. ఈ సందర్భంగా నిర్వహించిన బహిరంగ సభలో ఆయన మాట్లాడుతూ.. తిరుపతి తొక్కిసలాట దుర్ఘటనపై ప్రెస్‌ మీట్‌ పెట్టి ప్రజలను క్షమాపణలు కోరాలని టీటీడీ చైర్మన్‌ బీఆర్‌ నాయుడుతో పాటు టీటీడీ ఈవో శ్యామలరావు, ఏఈవో వెంకయ్య చౌదరి, పాలక మండలి సభ్యులకు సూచించారు. ప్రముఖ కవులు శ్రీశ్రీ, బాలగంగాధర తిలక్‌ పేర్లను ప్రస్తావించారు.
అలా తన పర్యటనలతో బిజీ బిజీగా ఉన్న పవన్‌ కల్యాణ్ శనివారం విజయవాడ పుస్తక ప్రదర్శనలో దర్శనమివ్వడం అందరిని ఆశ్చర్య పరిచింది. అయితే అధికారులు, సెక్యురిటీ వాళ్లకు మాత్రమే ఈ సమాచారం చేరవేసిన పవన్‌ కల్యాణ్ మీడియాకు తెలియకుండా జాగ్రత్తలు తీసుకున్నారు. పలు బుక్‌ షాపులను ఆయన సందర్శించిన పవన్‌ కల్యాణ్ భారీగా పుస్తకాలు కొనుగోలు చేసినట్లు తెలిసింది. దాదాపు రూ. 10లక్షలు తన సొంత డబ్బులు వెచ్చించి పుస్తకాలను కొనుగోలు చేసినట్లు సమాచారం. ఈ విషయాలను కూడా బయటకు పొక్కకుండా జాగ్రత్తలు తీసుకున్నారు. పుస్తకాలను కొనుగోలు చేసిన విషయాన్ని రహస్యంగా ఉంచాలని పవన్‌ కల్యాణ్ సూచించినట్లు సమాచారం.
పిఠాపురం నుంచి గెలుపొందిన పవన్‌ కల్యాణ్ అక్కడ నుంచే భవిష్యత్‌ రాజకీయాలు కూడా కొనసాగించనున్నారు. చంద్రబాబు కుప్పంను, జగన్‌ను పులివెందులను ఎలా సొంత అడ్డాలుగా చేసుకున్నారో.. అలానే రానున్న రోజుల్లో పిఠాపురాన్ని తన అడ్డాగా మార్చుకునేందుకు పవన్‌ కల్యాణ్ ప్లాన్‌ చేసుకున్నారు. అందులో భాంగా పిఠాపురంలో తన సొంత నివాస గృహాన్ని నిర్మించుకునేందుకు ఇప్పటికే నిర్ణయం తీసుకున్నారు. అందులో భాగంగా 12 ఎకరాల పొలాన్ని కూడా ఇది వరకే కొనుగోలు చేశారు. క్యాంపు కార్యాలయంతో పాటు జనసేన పార్టీ కార్యాలయాన్ని కూడా ఏర్పాటు చేయాలని ప్లాన్‌ చేసుకున్నారు. అయితే అందులోనే ఒక గ్రంధాలయాన్ని ఏర్పాటు చేయాలని పవన్‌ కల్యాణ్ భావిస్తున్నారని.. అందుకోసమే భారీగా పుస్తకాలు కొనుగోలు చేశారని సమాచారం.