అమరవీరులారా వందనం.. మీ వారసులకు మాది భరోసా..

చిత్తూరు జిల్లా ఎస్పి తుషార్ డూడీ మాట్లాడుతూ, ఎర్రచందనం అక్రమ రవాణా కట్టడి, ఎన్నికల నిర్వహణ, మాదక ద్రవ్యాల కట్టడి, దొంగతనాలు అరికట్టడంలో పోలీస్ సిబ్బంది నిరంతరం కృషి చేశారన్నారు. అనంతరంవిధి నిర్వహణలో ప్రాణ త్యాగం చేసిన పోలీస్ కుటుంబాల సభ్యులకు ప్రశంసా పత్రాలు, చెక్కులు పంపిణీ చేశారు ఈ కార్యక్రమంలో అడిషనల్ ఎస్పీ ఎస్సార్ రాజశేఖర్ రాజు, సంబద్ధత డీఎస్పీలు పాల్గొన్నారు.

పోలీసు యంత్రాంగం ఆధ్వర్యంలో రాయచోటి పోలీసు పరేడ్ మైదానంలో పోలీసు అమరవీరుల సంస్మరణ దినోత్సవం భావోద్వేగాల మధ్య నిర్వహించారు. పోలీస్ అమరుల త్యాగాల పునాదులపైనే సమాజంలో శాంతి, భద్రతలు పదిలంగా ఉన్నాయని రాష్ట్ర రవాణా, యువజన క్రీడల శాఖ మంత్రి మండిపల్లి రాంప్రసాద్ రెడ్డి అభివర్ణించారు. జిల్లా ఎస్పీ ధీరజ్ కునుబిల్లి అధ్యక్షతన జరిగిన సభలో మంత్రి మండిపల్లి రాంప్రసాద్ రెడ్డి మాట్లాడారు. ప్రమాదాలు లెక్క చేయకుండా ప్రజల రక్షణ కోసం 'భయం ఉన్నా చర్య తీసుకోవడం' పోలీసులకే సాధ్యం అని మంత్రి మండిపల్లి వ్యాఖ్యానించారు. అన్నమయ్య జిల్లా ఎస్పీ ధీరజ్ కునుబిల్లి మాట్లాడుతూ, ఈ సంవత్సరం అన్నమయ్య జిల్లాలో 8 మంది పోలీసులు ప్రాణాలు కోల్పోయారని  చెప్పారు.

"వారు గౌరవంతో సేవ చేశారు. వారు గౌరవంతో మరణించారు. వారు మన జ్ఞాపకాలలో ఎల్లప్పటికీ జీవిస్తారు" అని ఎస్పీ ధీరజ్ అన్నారు. అనంతరం అమరవీరులకు మంత్రి మండిపల్లి రాంప్రసాద్ రెడ్డి, ఎస్పీ ధీరజ్ కునుబిల్లి అమరులైన పోలీస్ కుటుంబాలకు ఆర్థికసాయం అందించారు. అనంతరం జిల్లా ఎస్పీ ధీరజ్ కునుబిల్లి మరణించిన పోలీసు సిబ్బంది కుటుంబీకులతో జిల్లా పోలీసు కార్యాలయంలో ప్రత్యేక సమావేశం నిర్వహించారు. సమస్యలు ఉంటే స్వయంగా తెలియజేయాలని కోరారు.

"దేశ భద్రత, ప్రజాశాంతి కోసం విధి నిర్వహణలో ప్రాణాలను అర్పించిన పోలీస్ అమరవీరుల త్యాగాలను స్మరించుకున్నారు. అమరవీరుల జాబితాను చదివి వినిపించారు. వారి ఆత్మశాంతి కోసం రెండు నిమిషాల మౌనం పాటించి వారికి గౌరవ నివాళులు అర్పించారు"

"పోలీస్ సిబ్బంది త్యాగం వ్యర్థం కాదని, వారి కుటుంబాలకు పోలీస్ శాఖ అండగా ఉంటుంది" అని అధికారులు హామీ ఇచ్చారు. ఈ కార్యక్రమంలో అదనపు ఎస్పీలు వెంకట్రావు (పరిపాలన) రవి మనోహరాచారి (శాంతిభద్రతలు) నాగభూషణరావు (నేర విభాగం), ఇంటిలిజెన్స్ అదనపు ఎస్పీలు జిల్లా పోలీస్ అధికారులు, సివిల్ అధికారులు, పోలీస్ సిబ్బంది, పోలీస్ అమరవీరుల కుటుంబ సభ్యులు పాల్గొన్నారు.

ఎర్రచందనం అక్రమ రవాణా నిరోధక టాస్క్ ఫోర్సు (ఆర్ఎస్ఎఎస్టీఎఫ్) కార్యాలయంలో పోలీసు అమరవీరులకు ఘనంగా నివాళులు అర్పించారు. టాస్క్ ఫోర్సు ఎస్పీ పీ. శ్రీనివాస్ మాట్లాడారు. 2023లో టాస్క్ ఫోర్సు కానిస్టేబుల్ బి. గణేష్ మరణించడాన్ని ఆయన గుర్తు చేశారు. ఈనెల 31వరకు అమర వీరులను సంస్మరిస్తూ వివిధ కార్యక్రమాలు నిర్వహిస్తున్నట్లు తెలిపారు. డీఎస్పీ ఎండీ షరీఫ్, ఆర్ఐ సాయి గిరిధర్, ఆర్ఎస్ఐ విష్ణు వర్ధన్, ఎసీఎఫ్ శ్రీనివాస్, సీఐలు సురేష్ కుమార్, ఖాదర్ బాషా, ఆర్ఐ కృపానంద, ఆర్ఎస్ఐలు, సిబ్బంది పాల్గొన్నారు.