అమరావతిలో వెలుతురు రాయలసీమ, ఉత్తరాంధ్రల్లో చీకటి కారాదు...

శ్రీ నారా చంద్రబాబు నాయుడు గారు,

అమరావతి రాజధాని పేరుతో, మీ ప్రభుత్వం, ఒక్క గుంటూరు జిల్లాలోనే, 50-60,000 కోట్ల రూపాయల ఖర్చు, వచ్చే మూడు, నాలుగు సంవత్సరాలలో చేస్తారని ప్రకటనలు చేయడం జరుగుతున్నది. అందుకు కావాల్సిన నిధులు ప్రపంచబ్యాంక్, ADB, ఇతరులు ఇస్తున్నారని కూడా, మీ ప్రభుత్వం ప్రకటించింది.

 ఈ రోజు వరకు, రాజ్యాంగం 5వ షెడ్యూల్ కు అనుగుణంగా నియమించాల్సిన ట్రైబల్ అడ్వైజరీ కౌన్సిల్, మన రాష్ట్రంలో నియమించబడలేదు. గిరిజనాభివృద్ధి మీద ప్రభుత్వం చూపిస్తున్న ఉదాసీనతకు ఇది ఒక ఉదాహరణ.

పోలవరం ప్రాజెక్టు క్రింద లక్షలాదిమంది ఆదివాసీలు భూములు, ఉపాధులు పోగొట్టుకున్నారు. వారు నిర్వాసితులై, రాజ్యాంగం 5వ షెడ్యూల్ కింద పొందవలసిన హక్కులు నష్టపోయారు. చాలామంది నిర్వాసితులకు సరైన నష్టపరిహారం లభించలేదు. పోలవరం ప్రాజెక్టు మీద పెద్ద ఎత్తున దృష్టిసారించిన మీ ప్రభుత్వం, ఆ నిర్వాసితులైన ఆదివాసీ కుటుంబాల సంక్షేమం గురించి ఎందుకు ఆలోచించడం లేదు.

రాయలసీమ ప్రాంతంలో కరువు పరిస్థితుల కారణంగా వేలాది మంది ఉపాధుల కోసం గల్ఫ్ దేశాలకు వలస పోయి కష్టనష్టాలకు గురి అవుతున్న విషయం మీ ప్రభుత్వం దృష్టికి వచ్చిందా? రాయలసీమ ప్రజల సంక్షేమ కార్యక్రమాల మీద, మీ ప్రభుత్వం ఎంతవరకు కృషి చేస్తున్నది? ఎంత వరకు ప్రభుత్వ పెట్టుబడులు చేసింది అనే విషయాలమీద, అక్కడి ప్రజల ముందు వివరాలు ఉంచాలని నా విజ్ఞప్తి.

ఉత్తరాంధ్ర, రాయలసీమ ప్రాంతాల అభివృద్ధి విషయంలో, నేను కేంద్ర ఆర్థిక మంత్రి గారికి 27-8-2024 ఒక లేఖ రాశాను. కాని మీ ప్రభుత్వం కేంద్రంతో ఈ రోజు వరకు నేను లెేవనెత్తిన విషయం చర్చించలేదని తెలుస్తున్నది. అది ఆ ప్రాంత ప్రజలకు బాధ కలిగించింది.

ఉమ్మడి ఆంధ్ర రాష్ట్ర విభజన చట్టం (2014) లో ఉత్తరాంధ్ర, రాయలసీమ ప్రాంతాల అభివృద్ధి విషయంలో 46వ సెక్షన్ ఈక్రింది విధంగా ఉందని మీరు గుర్తించాలి

"Section 46(2) Notwithstanding anything in sub-section (1), the Central Government may, having regard to the resources available to the successor State of Andhra Pradesh, make appropriate grants and also ensure that adequate benefits and incentives in the form of special development package are given to the backward areas of that State.

(3)The Central Government shall, while considering the special development package for the successor State of Andhra Pradesh, provide adequate incentives, in particular for Rayalaseema and north coastal regions of that State"

అంటే, 2014 చట్టం కింద నిధులు లభించి, అభివృద్ధి పొందే హక్కు ఆప్రాంతాల ప్రజలకు ఉంది ఆ విషయంలో మీ ప్రభుత్వం ఎటువంటి చర్యలు తీసుకుందో ఒక శ్వేతపత్రం రాష్ట్ర ప్రజల ముందు ఉంచాలని నా విజ్ఞప్తి.

అమరావతి రాజధాని విషయంలో, అత్యధికంగా బిల్డింగ్ ల హంగుల మీద ప్రజల నిధులను ఖర్చు చేసే బదులు, ప్రభుత్వ విధానాలలో వికేంద్రీకరణ, ప్రజల గడప వరకు ప్రభుత్వాన్ని తీసుకు రావడం, ప్రజాస్వామ్య విధానాలను పాటించడం అవసరం.

రాష్ట్రంలో వెనుకబడిన ఉత్తరాంధ్ర రాయలసీమ ప్రాంతాలకు, ఆదివాసీ ప్రజలకు న్యాయం జరగకపోతే రాజధాని ఎంత సొబబుగా ఉన్నా, ఉత్తరాంధ్ర, రాయలసీమ ప్రజలు హర్షించరని మీరు గుర్తించాలి.