మేతకు వచ్చిన ఒంటరి ఏనుగు కాలు జారింది. నీళ్లు తాగడానికి వెళ్లి, ప్రమాదవశాత్తూ చెరువు బురదలో కూరుకుపోయింది. కాపాడేవారి కోసం ఆ ఏనుగు ఘీంకారాలు అరణ్యరోదనగా మారాయి. ఒక రాత్రి, పగలు నరకయాతన అనుభవించింది. మత్తు సూదులు వేసిన తరువాత, కుంకీ ఏనుగులను రంగంలోకి దించిన అటవీశాఖ అధికారులు ఆ ఒంటరి ఏనుగును సురక్షితంగా బయటికి తీసుకుని రాగలిగారు.
ప్రస్తుతం చెరువు ఒడ్డుకు చేర్చిన ఆ ఏనుగు నడవలేని స్థితిలో పడి ఉంది. ఓ పక్క వర్షం కురుస్తోంది. ఈ పరిస్థితుల్లోనూ ఆ ఏనుగును తిరుపతి ఎస్వీ జంతుప్రదర్శన శాలకు తరలించడానికి అటవీశాఖాధికారులు తీవ్రంగా శ్రమిస్తున్నారు. భారీ క్రేన్లు ఉన్న యంత్రం కోసం వెదుకులాట ప్రారంభించారు.
చిత్తూరు జిల్లాలో శనివారం సాయంత్రం ప్రమాదానికి గురైన ఒంటరి అడవి ఏనుగును ఆదివారం గుర్తించి, రాత్రికి గానీ బయటకు తీయలేని విషయం ఆలస్యంగా వెలుగులోకి వచ్చింది.
చిత్తూరు జిల్లాలో ప్రధానంగా పలమనేరు, వి.కోట మండలాల పరిధిలో సంవత్సరాల కాలంగా ఒంటరి ఏనుగు తిరుగుతూనే ఉంది. దాదాపు ఐదేళ్ల కిందట ఆ ఏనుగు మంద నుంచి తప్పిపోయిందనేదా ఆ ప్రాంత మీడియా ప్రతినిధులు చెబుతున్న మాట.
ఈ సంవత్సరం సెప్టెంబర్13వ తేదీ పలమనేరు పట్టణ సమీప ప్రాంతానికి వచ్చింది. ఆ ఒంటరి ఏనుగు ఇళ్ల సమీపంలోకి దూసుకుని రావడం కూడా ఆందోళన కలిగించింది. ఈ సమయంలో అడవిలోకి దారి మళ్ళించే సమయంలో పలమనేరు అటవీశాఖ సెక్షన్ ఆఫీసర్ సుకుమార్ పై దాడికి దిగడం, ఆయన గాయపడిన విషయం తెలిసిందే.
ఆదివారం ఏమి జరిగింది..?
చిత్తూరు జిల్లా పూతలపట్టు నియోజకవర్గం యాదమరి మండలం-12 కంపల్లికి సమీపంలోని డీకే చెరువు సమీపంలో ఏనుగు ఘీంకారాలు వినిపించాయి. ఈ చెరువు వద్ద నీళ్లు తాగడానికి శనివారం ఏనుగు వచ్చి ఉంటుందని అటవీశాఖ అధికారుల ద్వారా తెలిసింది. రాత్రంతా బురనీటిలో విలవిలలాడుతూ, ఘీంకారాలతో కాలం వెళ్లదీసినట్లు చెబుతున్నారు. ఆ అరుపులో అర్తనాదం గమనించిన రైతులు అటవీశాఖ అధికారులకు సమాచారం ఇచ్చారని తెలిసింది.
దీంతో ఫారెస్టు బీట్ ఆఫీసర్ హరి ఆదివారం ఉదయం తొమ్మిది గంటల సమయంలో చెరువు పరిసర ప్రాంతాల్లోకి వెళ్లారు. అక్కడ పరిస్థితి చూసిన ఆయన ఓ ఏనుగు చెరువునీటి బురదలో చిక్కుకుని దీనంగా ఘీంకారాలు చేస్తుండడం గమనించాడు. పరిస్థితి అర్థం చేసుకున్న బీట్ ఆఫీసర్ హరి వెంటనే చిత్తూరు ఇన్ చార్జి డీఎఫ్ఓ (పుట్టపర్తి) శ్రీనివాసులుకు సమాచారం అందించారు. ఆయన తోపాటు చిత్తూరు వెస్ట్ ఎఫ్ఆర్ఓ పట్టాభి వెళ్లారు. అదే సమయంలో ఈ విషయం తెలిసిన పలమనేరు ఫారెస్టు రేంజ్ అధికారి నారాయణ సిబ్బందితో యాదమరి మండలం కంపల్లి సమీపంలోని డీకే చెరువు వద్దకు చేరుకున్నారు.
తిరుపతిలో అధికారుల మీటింగ్ కు వచ్చి ఉండగా, సమాచారం తెలియడంతో అనంతపురం చీఫ్ కన్సర్వేటివ్ ఆఫ్ ఫారెస్ట్ ( Chief Conservative of Forest CCF ) వెంటనే ఘటనా స్థలానికి చేరుకున్నారు. బురదలో చిక్కుకున్న అడవి ఏనుగును ఒడ్డుకు చేర్చడానికి ఆపరేషన్ పర్యవేక్షించారు.
కుంకీ ఏనుగుల రంగప్రవేశం...
చెరువు బురద నీటిలో చిక్కుకున్న ఒంటరి ఏనుగును బయటికి తీయడం అంతసులభం కాదు. భారీ ఆకారంతో ఉన్నఏనుగును సురక్షితంగా బయటకు తీసే ప్రయత్నాలు ఆదివారం మధ్యాహ్నం వరకు కానీ ప్రారంభం కాని పరిస్థితి. బురదీలో చిక్కుకున్న ఏనుగును కాపాడేందుకు అటవీశాఖ అధికారులు వెంటనే కుప్పం నియోజకవర్గం రామసముద్రం మండలం ననియాల సమీపంలోని కుంకీ ఏనుగుల క్యాంప్ ఇన్ చార్జికి సమాచారం అందించారు. అక్కడ ఉన్న జయంత్, వినాయక్ పేర్లతో ఉన్న సుక్షిత కుంకీ ఏనుగులను సంసిద్ధం చేశారు. ఆ కుంకీ ఏనుగులు చెరువు వద్దకు చేరుకున్నాయి.
ఆదివారం మధ్యాహ్నం...
ఏనుగు బురదనీటిలో చిక్కకున్న విషయం తెలియడంతో అటవీశాఖ బృందాల తోపాటు యాదమరి ఎస్ఐ ఈశ్వరయాదవ్, ఎస్ఎస్. మోహన్, అటవీశాఖ డీఆర్ఓ లోకేష్, రెస్క్యూటీం సభ్యులు చెరువు వద్దకు చేరుకున్నారు. తాళ్లతో కట్టి లాగడం వల్ల ఆపదలో ఉన్న అడవిఏనుగు గాయపడే ప్రమాదం ఉండడంతో దీనిపై సమీక్షించారు. ఆ లోపు కుప్పం సమీపంలోని ననియాల ఏనుగుల సంరక్షణ కేంద్రం నుంచి జయంత్, వినాయక్ సుక్షిత కుంకీ ఏనుగులు చేరుకున్నాయి.
కుంకీ ఏనుగులపై కూర్చొన్న మావటీలు డైరెక్షన్ ఇస్తుండగా, బురదలో చిక్కుకున్న అడవి ఏనుగు సమీపానికి చేరుకుని తొండం ఆసరగా అందించి, బయటికి తీయడానికి విఫలయత్నం చేశాయి. ఒడ్డునే ఉన్న చిత్తూరు ఇన్చార్జి డీఎఫ్ఓ శ్రీనివాసులు తోపాటు చిత్తూరు ఫారెస్టు రేంజ్ ఆఫీసర్ (ఎఫ్ఆర్ఓ) పట్టాభి, పలమనేరు ఎఫ్ఆర్ఓ నారాయణ, సిబ్బంది మావటీలకు సూచనలు ఇస్తూ, ఆపదలో ఉన్న ఏనుగును కాపాడేందుకు ఎవరి పరిధిలో వారు ప్రయత్నాలు చేశారు.
ఎలా బయటికి తీశారంటే...
వన్యప్రాణులు ప్రమాదాలకు గురైన సమయంలోనే కాకుండా, వన్యమృగాలు అంటే చిరుతలు, ఇతర ప్రమాదకరమైన జంతువులను బంధించడానికి కూడా అటవీశాఖలో అధికారుల తోపాటు సాంకేతిక నిపుణులు, రెస్య్కూ టీం కూడా ఉంది. ఆదివారం కూడా రెస్య్యూ టీం ప్రమాదంలో ఉన్న ఒంటరి ఏనుగును కాపాడేందుకు రంగంలోకి దిగింది. కుంకీ ఏనుగుల వల్ల సాధ్యం కాని స్థితిలో, ఆ ఏనుగుతో పాటు అక్కడి అధికారులు, సిబ్బందికి కూడా ప్రమాదం లేకుండా జాగ్రత్తలు తీసుకున్నారు.
చెరువులో బందీగా ఉన్న అడవి ఏనుగుకు దూరం నుంచే మత్తు కలిగించే సూదులు గుచ్చారు. ఆ ఏనుగు కాస్త మత్తులోకి చేరుకున్న తరువాత కుంకీ ఏనుగులు వాటి మావటీల సహకారం సంపూర్ణంగా అందడంతో తాళ్లు కట్టి, నమ్మదిగా ఆ ఏనుగును క్షేమంగా ఒడ్డుకు తీసుకుని వచ్చారు. ఈ రెస్క్యూ ఆపరేషన్ లో అటవీశాఖ అధికారులు, సిబ్బందితో పాటు పోలీసులు, గ్రామస్తులు కూడా సహకారం అందించారు.
ఆదివారం రాత్రి...
బురదలో చిక్కుకున్న ఏనుగును ఆదివారం సాయంత్రం పొద్దుపోయే సమయానికి ఒడ్డుకు చేర్చిన అటవీశాఖ అధికారులు ఊపిరి పీల్చుకున్నారు. దానికి కాపాడిన తరువాత వారి బాధ్యత అంతటితో పూర్తి కాలేదు. రాత్రి 9 గంటలకు కూడా చిత్తూరు ఇన్ చార్జి డీఎఫ్ఒ శ్రీనివాసులు, వెస్ట్ ఎఫ్ఆర్ఓ చలపతి, పలమనేరు ఎఫ్ఆర్ఓ నారాయణ సెల్ ఫోన్ల సిగ్నల్ అందలేదు. రాత్రి తొమ్మిది గంటల తరువాత 'ఫెడరల్ ఆంధ్రప్రదేశ్' ప్రతినిధికి కాంటాక్టులోకి వచ్చారు.
"ప్రమాదంలో చిక్కుకున్నఏనుగును కాపాడగలిగాం. ఏనుగు ఆరోగ్య పరిస్థితిని సమీక్షిస్తున్నాం" అని ఓ అటవీశాఖ అధికారి చెప్పారు. అడవి ఏనుగు చెరువులో పడిపోయిన తీరుపై కూడా సందేహాలు వ్యక్తం చేశారు. ఎప్పుడు పడిపోయింది? ఎన్నిగంటలు చిక్కుకుపోయింది? ఈ పరిస్థితి దారితీసిన అంశాలపై కూడా విచారణ చేస్తున్నట్లు ఓ అధికారి చెప్పారు.
తిరుపతి జూకు ఏనుగు
చిత్తూరు జిల్లా పూతలపట్టు నియోజకవర్గం యాదమరి మండలం-12 కంపల్లికి సమీపంలోని డీకే చెరువు సమీపంలో ప్రమాదానికి గురైన ఏనుగును అతికష్టంపై ఆదివారం రాత్రి ఒడ్డుకు చేర్చారు. మత్తులో ఉన్న ఆ ఏనుగుకు ఉపశమనం కోసం గ్లూకోస్ కూడా అందించారని ఓ అధికారి ద్వారా అందిన సమాచారం. కాగా, ఆ ఏనుగును తిరుపతి ఎస్వీ జంతుప్రదర్శనశాలకు తరలించడానికి అటవీశాఖాధికారులు తీవ్ర ఇబ్బందులు పడుతున్నట్లు సామాచారం తెలిసింది. చెరువు ఒడ్డున ఉన్న ఏనుగును తరలించడానికి వీలుగా క్రేన్ కోసం అధికారులు పాట్లు పడుతున్నారు. ఎంతరాత్రి అయినా సరే... ఆ ఏనుగును తిరుపతి జూ ( SV zoo Park ) కు తరలించే ప్రయత్నాలు చేస్తున్నారు.
"ఆ అడవి ఏనుగు ముందరి కాళ్లలో ఒకటి బాధతో మెలిపెడుతోంది. గ్రామస్తుల సమాచారం మేరకు నాలుగు రోజులుగా కుంటుంతోంది" అని సమాాచారం తెలిసిందని ఓ అధికారి చెప్పారు.