పీత కష్టాలు పీతవి.. సీత కష్టాలు సీతవంటారు గాని ఇప్పుడు ట్రంప్ దెబ్బతో ఆంధ్రప్రదేశ్ రొయ్యకి కష్టకాలం వచ్చింది. అమెరికా అధ్యక్షుడు డోనాల్డ్ ట్రంప్ దెబ్బతో ఆంధ్రప్రదేశ్ రొయ్య గిలగిల్లాడుతోంది. రొయ్య రైతుల్ని కలవర పెడుతోంది. ప్రత్యేకించి ఎగుమతిదారులైతే నెత్తీనోరూ బాదుకుంటున్నారు.
ఆంధ్రప్రదేశ్ రాష్ట్రం నుంచి రొయ్యల ఎగుమతులు అధిక శాతం అమెరికాకు వెళుతుంటాయి. ప్రధాన మార్కెట్‌కు ఎగుమతులు తగ్గితే పరిశ్రమ మనుగడ ఎలా..? అని దిగాలు పడుతున్నారు.
ఇప్పటికే నష్టాల్లో ఉన్న ఆక్వా రంగానికి సుంకాలు కూడా తోడైతే.. నిండా నష్టాలే అని రైతులు ఆందోళన చెందుతున్నారు. ఏకంగా 25 శాతం సుంకం, దానిపై అదనంగా జరిమానాలంటూ ట్రంప్ చేసిన ప్రకటన ఎగుమతిదారుల్లో తీవ్ర ఆందోళన రేకెత్తిస్తోంది. అదనం అంటే ఎంతనే దానిపై స్పష్టత కరవైంది. ఐదేళ్లుగా సంక్షోభంలో కొట్టుమిట్టాడుతున్న ఆక్వా రంగం.. ట్రంప్ ప్రతీకార సుంకాలతో దిక్కుతోచని స్థితికి చేరింది.
25% పన్నులు, అదనంగా జరిమానాలు
ట్రంప్ తాజాగా ఏకంగా 25% దిగుమతి సుంకాన్ని ప్రకటించారు. అదనంగా జరిమానాలు కూడా ఉండొచ్చని సంకేతాలిచ్చారు. కానీ ఆ అదనపు భారం ఎంత అనే విషయంలో స్పష్టత లేదు. ఇప్పటికే ఐదేళ్లుగా సంక్షోభంలో ఉన్న ఆక్వా రంగం ఈ ప్రతీకార సుంకాలతో పూర్తిగా దిక్కుతోచని స్థితికి చేరింది.
రాష్ట్ర ఆక్వా రంగం ప్రాధాన్యం
రాష్ట్ర ఎగుమతుల్లో ఆక్వా రంగం రెండో స్థానంలో ఉంది. సుమారు 16 లక్షల కుటుంబాలు ఈ రంగంపై ఆధారపడి జీవిస్తున్నారు. 2.50 లక్షల ఎకరాల్లో ఏటా సుమారు 7 లక్షల టన్నుల రొయ్యలు ఉత్పత్తి అవుతున్నాయి. పశ్చిమ గోదావరి, తూర్పు గోదావరి, ఏలూరు, కృష్ణా, బాపట్ల, ప్రకాశం, నెల్లూరు జిల్లాలు ప్రధాన ఉత్పత్తి కేంద్రాలు.
అమెరికా – ప్రధాన మార్కెట్
2023-24లో దేశవ్యాప్తంగా రూ.60,524 కోట్ల విలువైన సముద్ర ఉత్పత్తులు ఎగుమతయ్యాయి. అందులో అమెరికాకే రూ.21,000 కోట్ల సరకు పంపారు. ఈ సరఫరాలో రొయ్యలే 2.93 లక్షల టన్నులు ఉండటం గమనార్హం. వీటిలో అధిక శాతం ఏపీ నుంచే వెళ్లాయి.
ధరల పతనం, కొనుగోళ్ల నిలిపివేత
ట్రంప్ సుంకాల సంకేతాలిచ్చిన ఏప్రిల్‌లోనే రొయ్యల ధరలు పడిపోయాయి. వ్యాపారులు కిలోకు రూ.100 వరకు కోత పెట్టారు. ప్రభుత్వం జోక్యం చేసుకోవడంతో కొంత మేర సరిచేయబడినా, ఇప్పుడు సుంకాల ప్రకటనతో మళ్లీ కొనుగోళ్లు నిలిచిపోయాయి. కొన్నిచోట్ల ట్రేడర్లు కిలోకు రూ.40 తగ్గించి అడుగుతున్నారు.
రొయ్యల ఎగుమతుల్లో ఏపీకి ప్రధాన పోటీదారు ఈక్వెడార్‌. తక్కువ ధరలకు అధిక పరిమాణంలో ఉత్పత్తి చేస్తూ అమెరికా, చైనా మార్కెట్లకు ఎగుమతి చేస్తోంది. అమెరికా ఈక్వెడార్‌పై 10% సుంకం, మొత్తం 14% భారమే ఉంది. కానీ భారత రొయ్యలపై 25% సుంకంతో పాటు యాంటీ డంపింగ్‌, కౌంటర్‌ వెయిలింగ్‌ కలిపి 33% అవుతుంది. అంటే భారత్‌ ఉత్పత్తులు ఈక్వెడార్‌ కంటే సుమారు 19% అదనపు భారంతో అమెరికా మార్కెట్లో పోటీ పడాల్సి వస్తుంది.
రైతులు, ఎగుమతిదారుల విజ్ఞప్తి
ఈ పరిస్థితుల్లో కేంద్రం అమెరికాతో చర్చలు జరిపి సుంక భారం తగ్గించే చర్యలు తీసుకోవాలని రైతులు, ఎగుమతిదారులు విజ్ఞప్తి చేస్తున్నారు. లేకపోతే ఇప్పటికే వెనకబడిన భారత్‌ రొయ్య ఎగుమతులు మరింత దెబ్బతింటాయని హెచ్చరిస్తున్నారు.