అమరావతికి కొత్త రూపు !

అమరావతి మళ్లీ ధగధగలాడుతోంది. కొత్త కాంతులు విరజిమ్ముతోంది. ఉద్దండరాయునిపాలెంలో గతంలో భూమిపూజ జరిగిన ప్రాంతాన్ని సిఎం చంద్రబాబు గురువారం స్వయంగా సందర్శించి పరిస్థితిని సమీక్షించడంతో రాజధాని వాసులు, రైతుల కళ్లలో కొత్త వెలుగులు కనిపించాయి. గత ఐదేళ్లుగా చీకటిలో బిక్కుబిక్కుమంటున్న నగరం ఇప్పుడు మళ్లీ ఊపిరి పీల్చుకుంటోంది.

టిడిపి కూటమికి ఈనెల 4వ తేదీ ఎన్నికల ఫలితాల రోజున భారీ ఆధిక్యత తెలిసినప్పటినుంచే తొలుత ఆనందం వెల్లివిరిసింది అమరావతి లోనే. 34 వేల ఎకరాల మాగాణి ప్రాంతాన్ని రాజధాని కోసం ధారపోసిన రైతులు ఊపిరి పీల్చుకున్నారు. తమకు రావాల్సిన పూర్తి పరిహారం ఇక చేతికొస్తుందనే ఆశాభావం కూడా వారు వ్యక్తం చేశారు. ఫలితాలు వెలువడగానే టిడిపి అధినేత నుంచి ఎటువంటి సంకేతాలు అందాయో ఏమో! ఆ మర్నాటి నుంచే అమరావతి లో కొత్త కాంతులు మొదలయ్యాయి. విద్యుద్దీపాలు వెలుగులు విరజిమ్మడం ఆరంభించాయి. కనిపించకుండా పోయిన రోడ్ల ఆనవాళ్లు బయటపడ్డాయి. ఆ రోడ్లకు ఇరువైపులా అడవిలా పెరిగిన చెట్లను తొలగించడానికి డజన్ల కొద్దీ బుల్ డోజర్లు కదలడం ఆరంభించాయి.

ప్రభుత్వ యంత్రాంగం మళ్లీ అమరావతి వైపు దృష్టి సారించింది. తర్వాత కొద్దిరోజుల లోనే కొత్త ప్రభుత్వం ఏర్పడడం, ముఖ్యమంత్రి అధికారికంగా ఆదేశించడంతో అమరావతి కూడా కొత్త రూపు సంతరించుకోవడం ఆరంభించింది. ఆ వెంటనే 20న చంద్రబాబు అధికారికంగా అమరావతి లో పర్యటించి, అక్కడి లోటుపాట్లన్నిటిని పరిశీలించి తాజా ఆదేశాలు జారీ చేయడంతో అమరావతిలో ఇక వెండితెరలు పరఛుకొంటాయనే అభిప్రాయం అందరిలో కలుగుతోంది.