‘కల్కి’లో కనిపించిన శివాలయం.. ప్రభుత్వం ఏం చేస్తోంది..!

ఏదైనా విషయాన్ని శాశ్వతంగా దాచడం అసాధ్యం.. అది ప్రకృతికైనా. ఇందుకు నెల్లూరు జిల్లా పెరుమాళ్లపాడు గ్రామంలోని నాగమల్లేశ్వర స్వామి ఆలయం నిదర్శనం. ఎప్పుడు కనుమరుగైందో కూడా తెలియకుండా ఇసుక దిబ్బల కింద దాగి ఉన్న ఈ ఆలయం.. 2020లో అందరి దృష్టిని ఆకర్షించింది. ఆ తర్వాత ఆలయాన్ని పట్టించుకునే వారు తగ్గిపోయారు. ఇప్పుడు ప్రభాస్ ‘కల్కి’ సినిమాతో ఈ ఆలయం మళ్ళీ దేశవ్యాప్తంగా హాట్‌టాపిక్‌గా ఉంది. ఈ విషయంపై అక్కడి స్థానికులు మాట్లాడుతూ.. ‘కల్కి సినిమా షూటింగ్ ఇక్కడ రెండు రోజులు జరిగింది. సినిమా రిలీజ్ అయిన దగ్గర నుంచి ఈ గుడిని వీక్షించడానికి తండోపతండాలుగా ప్రజలు వస్తున్నారు’ అని చెప్తున్నారు.

2020 నుంచి వార్తల్లో నిలుస్తున్న ఈ ఆలయంపై అనేక మంది మేధావులు తమ అభిప్రాయాలు వ్యక్తం చేస్తూనే ఉన్నారు. ఈ గుడికి సంబంధించిన వీడియోలు, ఫొటోలు కూడా వైరల్ అవుతున్నాయి. ఈ నేపథ్యంలోనే ఇంతటి పురాతన కట్టడం ఇన్నాళ్లూ ఇసుకలో ఉన్నా శిథిలం కాకుండా ఉన్నందుకు ఆ ఇంజనీరింగ్ నైపుణ్యం, శిల్పకళకైనా ప్రభుత్వం గుర్తింపు కల్పించాలని పలువురు మేధావులు తమ అభిప్రాయం వ్యక్తం చేస్తున్నారు. కానీ అప్పుడెప్పుడో ఆత్మకూరు ఎమ్మెల్యేగా ఎన్నికల బరిలో నిలబడే ముందు టీడీపీ అభ్యర్థి ఆనం ఆదినారాయణరెడ్డి.. ఈ ఆలయం గురించి ప్రస్తావించారు.

అభివృద్ధి చేస్తాం: ఆనం

తాము అధికారంలోకి వస్తే ఈ ఆలయాన్ని అభివృద్ధి చేస్తామని, మరోసారి ఈ ఆలయాన్ని భక్తులకు చేరువ చేస్తామని ఆనం ఆదినారాయణరెడ్డి చెప్పారు. ఇప్పుడు ఆయన గెలిచారు, వారి పార్టీనే అధికారంలోకి వచ్చింది. మంత్రి అయ్యారు, అది కూడా దేవాదాయశాఖకే. కా ఇంతవరకు ఆ ఆలయం గురించి స్పందించలేదు. ఈ ఆలయ పునరుద్ధరణ, ఆధునికీకరణకు సంబంధించి ఎటువంటి బహిరంగ ప్రకటనా చేయలేదు. కానీ ఈ ఆలయ నిర్మాణ పనులకు సంబంధించి చర్చలు జరుగుతున్నాయని, ఈ ఆలయాన్ని అక్కడే పునరుద్దరించాలా.. లేకుంటే ఊరికి దగ్గరగా నిర్మించాలా అన్న విషయాలపై చర్చలు జరుగుతున్నట్లు సమాచారం. దేవాదాయ శాఖ పరమైన చర్చల్లో కూడా ఈ ఆలయ అంశం వచ్చినట్లు తెలుస్తోంది.

పట్టించుకోని యునెస్కో

ప్రపంచవ్యాప్తంగా సంస్కృతికి అద్దం పట్టే అంశాలకు గుర్తింపు నిచ్చి, వాటిని రక్షించుకోవడంపై దృష్టి పెట్టే సంస్థ యునెస్కో. ఈ సంస్థ సైతం శతాబ్దాల క్రితం ఇసుకలో కనుమరుగై కొన్నేళ్ల క్రితం బయటపడిన నాగమల్లేశ్వర ఆలయాన్ని పట్టించుకోలేదు. ప్రభుత్వంతో పాటు సంస్కృతిని కాపాడటమే లక్ష్యంగా పెట్టుకున్న ఇలాంటి సంస్థలు కూడా ఈ ఆలయాన్ని నిర్లక్ష్యం చేయడంపై స్థానికులు, మేధావులు అసంతృప్తి వ్యక్తం చేస్తున్నారు. ఈ ఆలయానికి పూర్వవైభవం తీసుకొచ్చేలా ప్రభుత్వం చర్యలు తీసుకోవాలని కూడా స్థానికులు కోరుతున్నారు. అంతేకాకుండా ఈ ఆలయ అభివృద్ధికి ప్రత్యేక నిధులు కేటాయించాలని కూడా కోరుతున్నారు.

అసలు గుడి చరిత్ర ఏంటంటే..

పెరుమాళ్లపాడు వద్ద పెన్నా నది తీరంలో కొన్నేళ్ల కిందట ఈ ఆలయం బయటపడింది. ఈ గుడి పైభాగం మాత్రమే కనిపిస్తుంటుంది. ఈ ఆలయం శివాలయమని, అక్కడ నాగలింగేశ్వరుడు కొలువై ఉన్నాడని సోమశిల ప్రాంత ఆలయ అధికారి పెంచల ప్రసాద్ వెల్లడించారు. ‘‘పెరుమాళ్లపాడులో ఉన్నది నాగలింగేశ్వరస్వామి ఆలయం. ఈ గుడిని ఎవరు కట్టించారు? ఎప్పుడు కట్టించారు? అన్న విషయాలు తెలియవు’’ అని తెలిపారాయన.

అది కూడా రహస్యమే..

ఈ ఆలయాన్ని ఎప్పుడు నిర్మించారు? ఎవరు నిర్మించారు? అన్నదే కాదు.. ఆఖరికి ఈ ఆలయం అసలు ఇసుకలో ఎలా కూరుకుపోయింది అనేది కూడా ఒక రహస్యమే. దీనికి సంబంధించి కూడా ఎటువంటి ఆధారాలు లేవు. 1850-1900 మధ్య వచ్చిన వరదల్లో వేల మంది ప్రాణాలు కోల్పోయారని, అప్పుడే ఈ ఆలయం భూస్థాపితమై ఉంటుందని కొందరు చరిత్రకారులు తమ అభిప్రాయాలు చెప్తున్నారు. ‘‘చరిత్ర ఆధారంగా చూస్తే 1850-1900 కాలంలో వచ్చిన వరదల దెబ్బకు పెన్నానది నీరు ఆనకట్టను మించి రెండు అడుగుల ఎత్తులో ప్రవహించాయి. ఆ సమయంలోనే మునిగిపోయిన ఎన్నో ఊళ్లతో పాటు పెరుమాళ్లపాడు కూడా మునిగిపోయి ఉంటుంది. అందులో భాగంగానే ఈ ఆలయం కూడా కనుమరుగై ఉంటుంది’’ అని ఆయన వివరించారు. దాంతో పాటుగా ఈ ఆలయంపై ఉన్న శిల్పకళ శైలిని చూస్తే చోళుల కాలంలో కట్టిన ఆలయంగా ఉందని కూడా ఆయన వివరించారు. బహుశా 12, 13వ శతాబ్దంలో ఇటుగా వచ్చిన చోళులు ఈ ఆలయాన్ని నిర్మించి ఉంటారని ఆయన అభిప్రాయపడ్డారు.

మరి ప్రజలేమంటున్నారంటే..

పెరుమాళ్లపాడు స్థానికుల చెప్పున్నదాని ప్రకారం ఈ ఆలయం 60 ఏళ్ల కిందటే బయటపడిందట. అప్పట్లో ఈ ఆలయ గోపురం మాత్రమే కనిపించేదని, అప్పట్లో తాము కూడా అక్కడ ఆడుకునేవాళ్లమని అక్కడి వృద్ధులు అనేకమంది చెప్తున్నారు. పెద్దలు చెప్పిన మాటలు విన్న యువకులు కొందరు కరోనా సమయంలో పెరుమాళ్లపాడు ఊరికి రెండు కిలోమీటర్ల దూరంలో ఈ గుడి దగ్గర తవ్వకాలు చేశారు. అప్పుడే మరింత ఆలయ భాగం బయటపడిందని చెప్తున్నారు. ఆ గుడిని ఆ ఊరికి దగ్గర్లోనే నిర్మించాలని అధికారులను కోరుతుననట్లు ఆలయ బోర్డు ఛైర్మన్ పోతుగంటి వెంకటేశ్వర్లు చెబుతున్నారు. ‘‘బయట ఉద్యోగాలు చేసుకుంటూ, చదువులు కొనసాగిస్తున్న వారు ఊరి పెద్దల మాటలు విని చందాల రూపంలో డబ్బులు సేకరించారు. ఆ డబ్బుతోనే ఇక్కడ తవ్వకాలు చేశారు. అప్పుడే గుడి బయటపడింది. ఊరికి ఆలయం రెండు కిలోమీటర్ల దూరంలో ఉంది. కాబట్టి అక్కడే ఆలయాన్ని నిర్మిస్తే దొంగలు పడే అవకాశం ఉంది. కాబట్టి ప్రభుత్వం చొరవ తీసుకుని ఈ ఆలయాన్ని ఊరికి దగ్గర్లో నిర్మించాలి. ఆ దిశగానే ప్రయత్నాలు చేస్తున్నాం’’ అని ఆయన తెలిపారు.

ఆలయంపై స్పందించిన ఈవో వరప్రసాద్ కూడా.. గ్రామస్తుల నిర్ణయం ప్రకారమే పనులు మొదలు పెడతామని గతంలోనే చెప్పారు. ‘‘1987లో ఈ గుడి దేవాదాయశాఖ పరిథిలోకి వచ్చింది. గుడి మాన్యాల రక్షణకు దేవాదాయశాఖలో కలిపారు. ఆలయానికి దాదాపు 80 ఎకరాల మాన్యం ఉంది. మూడు సంవత్సరాలకు ఒకసారి వేలం పాట పెట్టి వచ్చిన డబ్బులను బ్యాంకులో జమ చేస్తాం. ఈ మేరకు గుడి కట్టడానికి సిద్ధంగా ఉన్నాం’’ అని ఆయన వివరించారు. ఇదిలా ఉంటే ఈ ఆలయంలోని శివలింగాన్ని పరశురాముడు ప్రతిష్టించాడని, కాలక్రమంలో పెన్నా నది తన మార్గాన్ని మార్చుకోవడంతో ఆలయం భూస్థామితమైపోయిందని కూడా మాట వినిపిస్తోంది.