రెండు ఇరాన్‌ యుద్ధ విమానాలను కూల్చేశాం: ఇజ్రాయిల్

ఇరాన్‌లోని డెజ్‌ఫుల్ విమానాశ్రయంపై దాడి చేసి అక్కడ ఉన్న రెండు F-5 యుద్ధ విమానాలను ధ్వంసం చేశామని ఇజ్రాయిల్ పేర్కొంది. దాడులకు సంబంధించిన ఒక వీడియోను కూడా విడుదల చేసింది. అందులో ఒక విమానం పేలిపోవడం కనిపిస్తుంది.

ఇజ్రాయెల్ గతంలో ఇరాన్‌కి చెందిన పాత F-14 విమానాలపై కూడా దాడులు చేసింది. అయితే అవి వాడకంలో ఉన్న విమానాలా? లేదా అన్న దానిపై స్పష్టత లేదు.

ఇస్ఫహాన్ విమానాశ్రయం చుట్టూ ఉన్న ఇతర ప్రదేశాలపై కూడా దాడులు చేశామని ఇజ్రాయిల్ చెప్పుకుంటున్నా.. ఇరాన్‌ మాత్రం ఇప్పటివరకు తమకు జరిగిన నష్టాన్ని బహిరంగంగా చెప్పడం లేదు.

ఇదిలా ఉండగా.. ఆదివారం ఉదయం ఇజ్రాయెల్‌పై దాడిలో భాగంగా తాము ఖోరమ్‌షహ్ర్-4 సహా మొత్తం 40 క్షిపణులు ప్రయోగించామని ఇరాన్‌ రెవల్యూషనరీ గార్డు ప్రకటించింది. ఖోరమ్‌షహ్ర్-4 క్షిపణి అనేక వార్‌హెడ్‌లను తీసుకెళ్లగలదని ఇరాన్ చెబుతోంది.