హైస్పీడ్ రైల్ కారిడార్: హైదరాబాద్ నుంచి 4 గంటల్లోనే వైజాగ్‌!

హైదరాబాద్‌లో నివసించే విశాఖవాసులకు శుభవార్త. విశాఖ ప్రాంతంవారు, విశాఖపట్నానికి పనిమీద వెళ్ళేవారు ఇక నాలుగు గంటల్లోనే గమ్యాన్ని చేరుకోబోతున్నారు. ప్రస్తుతం రైలులో హైదరాబాద్ నుంచి వెళ్ళాలంటే సుమారుగా 12 గంటల సమయం పడుతోంది(వందే భారత్‌లో 8.30 గం.). అలాంటిది ఆ సమయం ఒక్కసారిగా 8 గంటలు తగ్గి నాలుగు గంటల్లో విశాఖ చేరితే! సమయం, డబ్బు ఎంత ఆదా అవుతాయి! శంషాబాద్-విశాఖపట్నం మధ్య కొత్త రైలుమార్గంకోసం సెమీ హై స్పీడ్ రైల్ కారిడార్ ఎలైన్‌మెంట్ ఖరారు అయింది.

తెలుగు రాష్ట్రాలలో ఇది మొట్ట మొదటి హై స్పీడ్ రైల్ కారిడార్ అవుతుంది. ఈ కారిడార్‌తో రెండు రాష్ట్రాలలోని ప్రధాన నగరాల మధ్య రైలు ప్రయాణ సమయం గణనీయంగా తగ్గుతుంది. సూర్యాపేట-విజయవాడ మీదుగా ఈ మార్గాన్ని ప్రతిపాదించారు. ఈ మార్గంపై ప్రాధమికంగా ఇంజనీరింగ్, ట్రాఫిక్ సర్వే తుది దశకు చేరుకుంది. ఈ సర్వే నివేదికను నవంబర్‌లో రైల్వే బోర్డుకు సమర్పించనున్నట్లు తెలిసింది. శంషాబాద్, రాజమండ్రి విమానాశ్రయాలను అనుసంధానించేలా ఈ ప్రణాళికను రూపొందించారు. ఈ హైస్పీడ్ కారిడార్‌లో రైళ్ళు గంటకు 220 కి.మీ. వేగంతో ప్రయాణించేలా రైలు మార్గాన్ని నిర్మిస్తారు.

ప్రస్తుతం సికింద్రాబాద్ నుంచి విశాఖపట్నానికి ప్రస్తుతం రెండు రైలు మార్గాలు ఉన్నాయి. మొదటిది - వరంగల్-ఖమ్మం-విజయవాడ మార్గం. ఈ మార్గంలో హైదరాబాద్-వైజాగ్ దూరం 699 కి.మీ. రెండోది - నల్గొండ-గుంటూరు-విజయవాడ మార్గం. ఈ మార్గంలో హైదరాబాద్-వైజాగ్ దూరం 663 కి.మీ. వందే భారత్ తప్పితే ఈ రెండు మార్గాలలో ప్రయాణించే రైళ్ళు గంటకు 110-130 కి.మీ. వేగంతో ప్రయాణిస్తున్నాయి. ఇప్పుడు కొత్తగా రాబోతున్న హైస్పీడ్ కారిడార్ మార్గం చిట్యాల, నకిరేకల్, సూర్యాపేట, జగ్గయ్యపేట, విజయవాడల మీదుగా విశాఖపట్నం వెళుతుంది. ఈ మార్గంలో దూరం 619 కి.మీ. ఈ కారిడార్ హైదరాబాద్-విజయవాడ 65వ జాతీయ రహదారి మార్గానికి సమాంతరంగానే వెళుతుందని తెలుస్తోంది. తెలంగాణలో ఇప్పటివరకు రైలు మార్గంలేని నార్కట్ పల్లి, నకిరేకల్, సూర్యాపేట, కోదాడ వంటి పట్టణాలను ఇది కలపబోతోంది.