2026 భారత్‌కు పరీక్షాత్మకం..

2026 సంవత్సరం భారత్‌(India)కు రాజకీయంగా, ఆర్థికంగా, భద్రతాపరంగా పరీక్షాత్మకంగా మారే అవకాశం ఉందని ది ఫెడరల్ సీనియర్ ఎడిటర్-ఇన్-చీఫ్ ఎస్ శ్రీనివాసన్ (Srini) అభిప్రాయపడ్డారు. ‘Talking Sense with Srini’ కార్యక్రమంలో ఆయన కొత్త ఏడాదిలో భారత్ ఎదుర్కొనే సవాళ్లను విశ్లేషించారు.

పక్క దేశాల్లో అస్థిరత..

భారత్‌కు సమీప దేశాల్లో రాజకీయ అస్థిరత 2026లో కీలక అంశంగా మారనుందని శ్రీనివాసన్ తెలిపారు. బంగ్లాదేశ్‌లో కొనసాగుతున్న రాజకీయ అనిశ్చితి, పాకిస్తాన్‌లో సైనిక నేతృత్వం పెరగడం, యూఎస్–పాకిస్తాన్ సంబంధాలు బలపడటం వంటి పరిణామాలు.. భారత భద్రతా వ్యూహానికి సవాలుగా మారే అవకాశముందన్నారు.

నేపాల్‌లో రాజకీయ సంక్షోభం, అఫ్గానిస్తాన్‌లో మానవ హక్కుల సమస్యలు, శ్రీలంకలో ఆర్థిక పునరుద్ధరణలో భారత్ కీలక పాత్ర పోషించడం వంటి అంశాలు కూడా ప్రాంతీయ రాజకీయాల్లో భారత్ స్థితిని ప్రభావితం చేయనున్నాయని విశ్లేషించారు.

ఆర్థికంగా సవాళ్ల సంవత్సరం..

ఆర్థిక రంగంలో 2026 భారత్‌కు కష్టతర సంవత్సరంగా మారవచ్చని శ్రీనివాసన్ హెచ్చరించారు. GDP వృద్ధి గణాంకాలు బలంగా కనిపించినా, వాస్తవ పరిస్థితులు అంత అనుకూలంగా లేవని వ్యాఖ్యానించారు. అంతర్జాతీయ వాణిజ్యంలో అనిశ్చితి, అమెరికా వంటి దేశాల టారిఫ్ విధానాలు, ఎగుమతులపై ఒత్తిడి, విదేశీ పెట్టుబడుల మందగమనం వంటి అంశాలు ఆర్థిక వృద్ధిపై ప్రభావం చూపవచ్చని తెలిపారు.

దేశంలో వినియోగం తగ్గడం, ప్రైవేట్ పెట్టుబడులు ఆశించిన స్థాయిలో ముందుకు రాకపోవడం వంటి సమస్యలు కూడా 2026లో ప్రభుత్వానికి పెద్ద సవాలుగా మారనున్నాయని చెప్పారు.

రాజకీయంగా కీలక మలుపు

2026.. భారత రాజకీయాలకు కూడా కీలకంగా మారనుందని శ్రీనివాసన్ అభిప్రాయపడ్డారు. కాంగ్రెస్ పార్టీకి సంబంధించి అంతర్గత సమస్యలు కొనసాగుతున్నాయని, 2024 లోక్‌సభ ఎన్నికల్లో కొంత పునరుద్ధరణ కనిపించినప్పటికీ, రాష్ట్ర స్థాయిలో పార్టీ బలం ఇంకా పరీక్ష దశలోనే ఉందని తెలిపారు.

2026లో తమిళనాడు, కేరళ, అసోమ్, పశ్చిమ బెంగాల్ వంటి రాష్ట్రాల్లో రాజకీయ పరిణామాలు జాతీయ రాజకీయాలపై ప్రభావం చూపే అవకాశముందని విశ్లేషించారు. ఈ రాష్ట్రాల ఫలితాలు ప్రతిపక్ష రాజకీయ భవిష్యత్తును నిర్ణయించే అంశంగా మారవచ్చని అన్నారు.

మొత్తంగా.. పక్క దేశాల్లో భద్రతా సవాళ్లు, దేశీయ ఆర్థిక అనిశ్చితి, రాజకీయ పోటీ, పాలనా ఒత్తిళ్లు.. ఇవన్నీ 2026ను భారత్‌కు ఒక కీలక పరీక్షగా మారే అవకాశం ఉందని శ్రీనివాసన్ పేర్కొన్నారు.