యుద్ధం: రొయ్యల ఎగుమతులపై ప్రభావం ఎంత?

యూరోపియన్ యూనియన్ (EU), అమెరికా (USA), జపాన్, చైనా వంటి దేశాలకు వెళ్లే సముద్ర ఆహార కంటైనర్లు రెడ్ సీ సూయెజ్ కాలువ మార్గం, కేప్ ఆఫ్ గుడ్ హోప్ మార్గం, చైనా సముద్ర మార్గం ద్వారా నిర్బంధం లేకుండా కొనసాగుతున్నాయని మంత్రి చెప్పారు. అందువల్ల ప్రస్తుత పరిస్థితులు భారతదేశ సముద్ర ఆహార ఎగుమతులపై అత్యధిక ప్రభావం చూపే అవకాశాలు లేవని స్పష్టం చేశారు.

గల్ఫ్ దేశాలకు రొయ్యల ఎగుమతులు చాలా తక్కువ

మధ్యప్రాచ్యంలోని గల్ఫ్ ఉద్రిక్తతలు, ముఖ్యంగా హోర్ముజ్ జలసంధి చుట్టూ ఉన్న టెన్షన్‌లు, సముద్ర మార్గాల ద్వారా ఎగుమతులను ప్రభావితం చేస్తాయనే భయాలు మీడియాలో వ్యాపించాయి. భారతదేశం నుంచి సముద్ర ఆహార ఎగుమతుల్లో కేవలం 3-4 శాతం మాత్రమే గల్ఫ్ దేశాలకు వెళుతున్నాయని మంత్రి అచ్చెన్నాయుడు చెబుతున్నది వాస్తవం. అయితే మిగిలిన 96 శాతం ఎగుమతులు యూరోపియన్ యూనియన్, అమెరికా, జపాన్, చైనా వంటి మార్కెట్లకు వెళ్తున్నాయి. ఈ మార్గాలు రెడ్ సీ-సూయెజ్ కాలువ, కేప్ ఆఫ్ గుడ్ హోప్ లేదా చైనా సముద్ర మార్గాల ద్వారా నిర్బంధం లేకుండా కొనసాగుతున్నాయని మంత్రి చెప్పారు. కానీ గల్ఫ్ టెన్షన్‌లు గ్లోబల్ షిప్పింగ్ రూట్లను పరోక్షంగా ప్రభావితం చేస్తే, ఆల్టర్నేటివ్ మార్గాలు ఎక్కువ ఖర్చుతో కూడుకున్నవి కావచ్చు. ఉదాహరణకు కేప్ ఆఫ్ గుడ్ హోప్ మార్గం ఎక్కువ దూరం కావడంతో ఫ్రైట్ ఛార్జీలు పెరిగే అవకాశం ఉంది. ఇది చిన్న రైతులకు భారమవుతుంది.

షిప్పింగ్ కంటైనర్ల కొరత ఉందా?

మీడియాలో వచ్చిన వార్తలు అసత్యమని మంత్రి స్పష్టం చేశారు. ప్రస్తుతం ఎగుమతులు ప్రభావితం కాలేదని చెప్పారు. అయితే గ్లోబల్ సప్లై చైన్ సమస్యలు, ముఖ్యంగా కోవిడ్ తర్వాత కంటైనర్ అందుబాటును అప్పుడప్పుడు ప్రభావితం చేస్తున్నాయి. ఆంధ్రప్రదేశ్‌కు చెందిన కంటైనర్లు వెనక్కి రాకపోతే భవిష్యత్తులో సీజనల్ డిమాండ్ సమయంలో సమస్యలు ఎదురవుతాయా అనే ప్రశ్న ఉంది. మంత్రి సూచించినట్లు ప్రతి నెల చివరి వారంలో సమీక్ష సమావేశాలు నిర్వహించడం ద్వారా ఈ సమస్యలను ముందుగా గుర్తించవచ్చు.

అమెరికా మార్కెట్‌పై చూపిన ఆశావాదం కూడా పరిశీలనకు తీసుకోవాలి. 2026 మార్చి నెలాఖరుకు డిమాండ్ మెరుగుపడుతుందని ముఖ్యంగా సీ ఫుడ్ ఎక్స్పో తర్వాత పెరుగుతుందని మంత్రి చెప్పారు. అమెరికా విధించే 20 శాతం టారిఫ్‌లు (బేసిక్ డ్యూటీ, యాంటీ-డంపింగ్ డ్యూటీ, కౌంటర్‌వెయిలింగ్ డ్యూటీ) ఇతర పోటీ దేశాలతో సమానంగా ఉండటం వల్ల భారతీయ రొయ్యల పోటీ సామర్థ్యం కొనసాగుతుందని మంత్రి తెలిపారు. ఇది సరైనదైనప్పటికీ అమెరికా టారిఫ్‌లు భారత్‌కు మాత్రమే కాకుండా వియత్నాం, థాయ్‌లాండ్ వంటి పోటీదారులకు కూడా వర్తిస్తాయి. అయితే భారత్-యూరోపియన్ యూనియన్ మధ్య ఫ్రీ ట్రేడ్ అగ్రిమెంట్ (FTA) చర్చలు పూర్తయితే మరిన్ని అవకాశాలు లభిస్తాయని మంత్రి ఆశాభావం వ్యక్తం చేశారు. ఈ చర్చలు ఎప్పుడు పూర్తవుతాయో తెలియకపోవడం ఒక సవాలు.

రైతుల విషయంలో మంత్రి సూచనలు కీలకం. పానిక్ హార్వెస్టింగ్ చేయడం వల్ల మార్కెట్‌లో అధిక సరఫరా ఏర్పడి ధరలు పడిపోతాయని, ఆర్థిక నష్టం వాటిల్లుతుందని ఆయన హెచ్చరించారు. ఆంధ్రప్రదేశ్ రైతులు సాధారణంగా ఉత్పత్తి చేసే 50-60 కౌంట్ రొయ్యలకు అమెరికా మార్కెట్‌లో మంచి డిమాండ్ ఉందని చెప్పడం ఊరటనిస్తుంది. కానీ వదంతులు, మీడియా వార్తలు రైతుల మనస్తత్వాన్ని ప్రభావితం చేస్తున్నాయి. ప్రభుత్వం నిరంతర పర్యవేక్షణ, సమన్వయం ద్వారా ఈ సమస్యలను పరిష్కరించాలి. లేకపోతే చిన్న రైతులు అనవసర భయాలకు గురవుతారు.

రొయ్యల రైతుల ప్రతినిధులు, రొయ్యల రైతులతో మంత్రి కింజరాపు అచ్చెన్నాయుడు మాట్లాడుతూ ‘రాష్ట్రంలోని రొయ్యల రైతులు నిరాధారమైన వార్తలు, వదంతులను నమ్మకుండా ప్రశాంతంగా, శాస్త్రీయ విధానంలో అక్వాకల్చర్ కార్యకలాపాలను కొనసాగించాలి’ అని కోరారు.