పెద్దపులి
తెలంగాణ: ఏజెన్సీ ఏరియాలో మరోసారి కనిపించిన పెద్దపులి
ములుగు ఏజెన్సీ ప్రాంతంలో ఆవును వేటాడిన ఆనవాళ్లు, గోదావరీ ప్రవాహం తగ్గడంతో మహారాష్ట్ర నుంచి వచ్చినట్లు అనుమానం
ఉమ్మడి వరంగల్, ఖమ్మం జిల్లాలోని ఏజెన్సీ ప్రాంతాల ప్రజలు మరోసారి గడగడ వణుకుతున్నారు. ఏజెన్సీ ప్రాంతాలలో పెద్ద పులి కనిపించడమే ఇందుకు కారణం.
అడవి ప్రాంతాల్లో మేత కోసం వెళ్లిన ఆవును పులి వేటాడి సగం తిని వదిలివెళ్లిన ఆనవాళ్లు తెలియడంతో స్థానికులు భయంతో గజగజ వణుకుతున్నారు. గత ఏడాది కూడా ఇలాగే ఉమ్మడి వరంగల్ జిల్లాలోకి పులి ప్రవేశించింది. తాడ్వాయి మండలంలో ఏర్పాటు చేసిన ట్రాప్ కెమెరాలో పులి కనిపించింది.
వరంగల్ జిల్లా నల్లబెల్లి మండలంలోని కొండాపూర్, మూడుచెక్కలపల్లి, రుద్రగూడెం గ్రామాల పంట చేలలో పెద్ద పులి తిరిగినట్లు ఆనవాళ్లు కనిపించాయి. ఇవి అన్ని కూడా అటవీ ప్రాంతాలకు దగ్గరగా ఉన్నాయి.
దీంతో రైతులు, కూలీలు వ్యవసాయ పనులకు వెళ్లేందుకు జంకారు. గ్రామాల సమీపంలో పులి తిరిగినట్లు అటవీశాఖ, స్ట్రైక్ ఫోర్స్ అధికారులు అక్కడ లభించిన పాదముద్రలను చూసి నిర్థారణకు వచ్చారు.
కొన్నిరోజుల తరువాత పెద్ద పులి వెంకటాపురం(కే), మంగపేట మండలాల పరిధిలో కనిపించింది. తిమ్మాపురం లోని ముసలమ్మ వాగు పరిధిలోని చౌడొర్రె ప్రాంతంలో వరి పొలానికి నీళ్లు పెట్టడానికి వెళ్లిన రైతులకు పులి దూరం నుంచి కనిపించడంతో వారు పారిపోయి గ్రామస్తులకు సమాచారం ఇచ్చారు.
దీనితో 20 మంది రైతులు కర్రలతో పులి జాడలను వెతకడానికి వచ్చారు. పులి అక్కడ నుంచి రాళ్ల వాగు వైపు వెళ్లి అటవీశాఖ అధికారులకు సమాచారం ఇచ్చారు. సమాచారం అందడంతో మంగపేట అటవీ అధికారుల టీమ్ పులి ఎటు వైపు ప్రయాణం చేసిందో తెలుసుకోవడానికి సెర్చ్ ఆపరేషన్ ప్రారంభించారు.
పులి పాదముద్రల ఆధారంగా కిన్నెరసాని అభయారణ్యంలోకి వెళ్లినట్లు గుర్తించారు. అప్పట్లో దాదాపు రెండు నెలల పాటు ఉమ్మడి వరంగల్ జిల్లాలోనే పులి సేదతీరింది.
మహిళపై దాడి..
రెండు సంవత్సరాల క్రితం కాగజ్ నగర్ మండలంలోని ప్రత్తి చేనులో లక్ష్మి(21) అనే యువతిపై పెద్ద పులి దాడి చేసింది. తీవ్రంగా గాయపడిన బాధితురాలిని తోటీ కూలీలు ఆస్పత్రికి తీసుకెళ్తుండగా మార్గమధ్యలో మరణించింది.
సమీపంలో కవ్వాల్ టైగర్ అభయారణ్యం ఉంది. పక్కనే మహారాష్ట్ర లోని తడోబా పులుల అభయారణ్యం సైతం ఉండటంతో ఇక్కడికి పులులు స్వేచ్ఛగా వస్తుంటాయి. ప్రాణహిత, వార్థా నదులను దాటి కాగజ్ నగర్ ప్రాంతాలలో ఉన్న అటవీ ప్రాంతాలకు చేరుకుంటున్నాయి.
పులులు ఇప్పటి వరకు తెలంగాణలోని నలుగురు కూలీలపై దాడి చేసి చంపేశాయి. పులి అందరిని కూడా వెనక నుంచి దాడిచేసి చంపేశాయి. ఏజెన్సీ ప్రాంతాలలో ప్రత్తి పంట మనిషి కనిపించనంత ఎత్తుకు ఎదుగుతుంది. వీటిలో నక్కుతున్న పెద్ద పులి కూలీలు రాగానే దాడి చేసి చంపేస్తోంది.
ఇప్పుడు మరోసారి పులి వచ్చినట్లు తెలియడంతో గోదావరి పరివాహ ప్రాంతంలో ప్రజలు భయంతో బిగిసుకుపోతున్నారు. ప్రస్తుతం పులి ఉమ్మడి ఖమ్మం జిల్లాకు వెళ్లినట్లు తెలిసిన పొలాలకు వైపు వెళ్లడానికి రైతులు,కూలీలు ఉత్సాహం చూపించట్లేదు.
అయితే ప్రతీ ఏడాది నవంబర్ నెలలో గోదావరి ప్రవాహం తగ్గాక తెలంగాణలోకి వచ్చే పెద్ద పులి ఈసారి ఆశించిన స్థాయిలో ప్రవాహం లేకపోవడంతో ముందుగానే వచ్చినట్లు అటవీ శాఖ అధికారులు చెబుతున్నారు.
తగిన జాగ్రత్తలు తీసుకుంటూ అటవీ సమీపంలోని పొలాలకు వెళ్లాలని చెబుతున్నారు. పులి గుర్తులు కనిపించగానే వెంటనే అటవీ అధికారులకు సమాచారం అందించాలని కోరుతున్నారు.
Next Story