ఎస్ఎల్‌బీసీ టన్నెల్‌లో 12 బృందాలతో సహాయ చర్యలు

ఈ సందర్భంగా నాగర్ కర్నూలు జిల్లా కలెక్టర్ మాట్లాడుతూ టన్నెల్‌లో చిక్కుకున్న వారిని కాపాడేందుకు అధికారులు ముమ్మరంగా ప్రయత్నాలు కొనసాగిస్తున్నారని చెప్పారు. వైద్య సిబ్బంది ఆక్సిజన్ అందుబాటులో ఉంచారు.సహాయ చర్యలను మరింత వేగవంతం చేసేందుకు ఎస్ ఎల్ బి సి టన్నెల్ ప్రమాదంలో 12 బృందాలు నిరంతరం పనిచేస్తున్నాయని వాటిలో ఆర్మీ, ఎన్డీఆర్ఎఫ్, ఎస్ డి ఆర్ ఎఫ్, సింగరేణి మైన్స్ రెస్క్యూ, ఫైర్ సర్వీసెస్, నేషనల్ జియో ఫిజికల్ రీసెర్చ్ ఇన్స్టిట్యూట్, హైడ్రా, సౌత్ సెంట్రల్ రైల్వే ప్లాస్మా కట్టర్స్, ర్యాట్ మైనర్స్, బృందాలు నిరంతరం సమన్వయంతో సహాయక చర్యలు వేగవంతం చేసినట్లు వివరించారు.

ప్రమాద ప్రదేశంలో కొనసాగుతున్న సహాయక చర్యలను వేగవంతం చేసేలా సహాయక బృందాలను నిరంతరం పనిచేసేలా పక్కా ప్రణాళికతో సహాయక చర్యలకు కావాల్సిన అత్యాధునిక సాంకేతిక పరిజ్ఞానం ఉపయోగించుకుంటూ ప్రమాద ప్రదేశంలోని నీటిని పంపుల ద్వారా బయటికి తరలిస్తున్నామని తెలంగాణ రాష్ట్ర విపత్తు శాఖ కమిషనర్ అర్వింద్ కుమార్ శుక్రవారం రాత్రి ‘ఫెడరల్ తెలంగాణ’కు చెప్పారు. ప్లాస్మా గ్యాస్ కట్టల ద్వారా శిథిలాలను తొలగిస్తూ సహాయక చర్యలు వేగవంతం చేసినట్లు ఆయన వివరించారు.

వీలైనంత త్వరగా కన్వేయర్ బెల్ట్ ను ఉపయోగంలోకి తీసుకురానున్నట్లు, బురదను తీసి వేసేందుకు కావాల్సిన ఎస్కావేటర్లను సిద్ధం చేసినట్లు అర్వింద్ కుమార్ వివరించారు. ప్రత్యేక కెమేరాలు, సెన్సార్ల ద్వారా లోపలి పరిస్థితులను నిరంతరం పర్యవేక్షించడం వంటి చర్యలు చేపడుతున్నట్లు చెప్పారు.ఎస్ ఎల్ బి సి టన్నెల్ ప్రమాదంపై వైరల్ అవుతున్న సమాచారం తప్పుడు సమాచారం అని తెలంగాణ విపత్తు శాఖ కమిషనర్ అర్వింద్ కుమార్ తెలిపారు.