నందనవనం ఆక్ర‌మ‌ణ‌దారుల తొల‌గింపున‌కు మంత్రి ఆదేశం
నందనవనం లబ్దిదారులకు తెలంగాణ సర్కారు శుభవార్త వెల్లడించింది.నిరుపేదలకు మంజూరైన గృహాల ఆక్రమణలను తొలగించి అసలు లబ్ధిదారులకు అందించాలని సర్కారు నిర్ణయించింది.
రంగారెడ్డి జిల్లా ఎల్.బి.న‌గ‌ర్ నియోజ‌క‌వ‌ర్గం ప‌రిధిలోని నందనవనంలో రాష్ట్ర ప్ర‌భుత్వం నిర్మించిన ఇళ్లను అక్ర‌మంగా ఆక్ర‌మించుకున్న‌వారిని త‌క్ష‌ణం ఖాళీ చేయించి అర్హులైన వారికి అందించాలని రెవెన్యూ,హౌసింగ్,స‌మాచార పౌర‌సంబంధాల శాఖ మంత్రి పొంగులేటి శ్రీ‌నివాస‌రెడ్డి అధికారుల‌ను ఆదేశించారు. బుధ‌వారం స‌చివాల‌యంలో మ‌హేశ్వ‌రం నియోజ‌క‌వ‌ర్గంలోని మంకాల్,నందనవనంలో ఉన్న ఇళ్ల స‌మ‌స్య, కేటాయింపులపై అధికారుల‌తో మంత్రి స‌మావేశం నిర్వ‌హించారు.ఈ స‌మావేశంలో హౌసింగ్ సెక్ర‌ట‌రీ జ్యోతి బుద్ధ‌ప్ర‌కాష్‌, ప్ర‌జావాణి నోడ‌ల్ ఆఫీస‌ర్ డి.దివ్య, ప్ర‌స్తుత రంగారెడ్డి క‌లెక్ట‌ర్ నారాయ‌ణ‌రెడ్డి, గ‌తంలో రంగారెడ్డి జిల్లా క‌లెక్ట‌ర్లుగా ప‌నిచేసిన డాక్ట‌ర్ ఎస్.హ‌రీష్‌, కె.శ‌శాంక్ త‌దిత‌రులు పాల్గొన్నారు.
ఆక్రమణదారులపై కఠిన చర్యలు
ఈ సంద‌ర్భంగా మంత్రి పొంగులేటి మాట్లాడుతూ అక్ర‌మంగా ప్ర‌భుత్వ ఇళ్లను ఆక్ర‌మించుకున్నవారి ప‌ట్ల క‌ఠినంగా వ్య‌వ‌హ‌రిస్తామన్నారు. ఎలాంటి రాజకీయ ఒత్తిడుల‌కు త‌లొగ్గ వ‌ద్ద‌ని అధికారుల‌కు మంత్రి సూచించారు.నందనవనంలో జెఎన్ యూ ఆర్ ఎం ప‌థకం కింద ప్ర‌భుత్వం నిర్మించిన ఇళ్ల కోసం 2019వ సంవత్సరంలో ద‌ర‌ఖాస్తు చేసుకొని, ల‌బ్దిదారుని వాటా చెల్లించిన వారి ఇళ్లను కొంత‌మంది ఆక్ర‌మించుకోవ‌డం ప‌ట్ల మంత్రి తీవ్రంగా స్పందించారు.
బాధితులకు న్యాయం చేయండి
బాధితులకు న్యాయం చేయాల‌ని , అక్ర‌మంగా ఆక్ర‌మించుకున్న వారినుంచి ఇళ్లను స్వాధీనం చేసుకొని లబ్ధిదారులకు కేటాయించేలా చర్యలు తీసుకోవాల‌ని మంత్రి అధికారుల‌ను ఆదేశించారు. అలాగే మంకాల్‌లో నిర్మించిన డ‌బుల్ బెడ్ రూం ఇళ్ల కేటాయింపులో ఉన్న న్యాయ‌ప‌ర‌మైన స‌మ‌స్య‌ల‌ను త‌క్ష‌ణం ప‌రిష్క‌రించి, అర్హులైన వారికి కేటాయించాల‌ని అధికారుల‌కు సూచించారు. ఈ రెండు అంశాల‌పై పూర్తిస్ధాయి నివేదిక‌ను త‌న‌కు అందించాలని మంత్రి కోరారు.వీలైనంత త్వ‌రిత‌గ‌తిన ఈ స‌మ‌స్య‌ల‌ను ప‌రిష్కరించాల‌ని అధికారుల‌ను మంత్రి ఆదేశించారు. నిరుపేదలకు అన్యాయం జ‌రిగితే ఈ ప్ర‌భుత్వం చూస్తూ ఊరుకోదని అన్నారు.ప్ర‌జావాణిలో గృహ‌నిర్మాణానికి సంబంధించి వ‌చ్చే ఫిర్యాదులను స‌చివాల‌యంలోని త‌న కార్యాల‌యానికి పంపించాల‌ని నోడ‌ల్ అధికారి దివ్య‌కు సూచించారు.వాటి ప‌రిష్కారానికి త‌న కార్యాల‌యంలో ఒక ప్ర‌త్యేక అధికారికి బాధ్య‌త‌లు అప్ప‌గించ‌డం జ‌రుగుతుంద‌న్నారు.
Next Story
