అనంతగిరి కొండల అందాలు చూద్దాం రండి

అటవీ ప్రాంతాన్ని దెబ్బతీయ కుండా ప్రకృతి సోయగాలను పర్యాటకులకు చూపించాలనే లక్ష్యంతో తెలంగాణ రాష్ట్ర అటవీ అభివృద్ధి సంస్థ పర్యావరణ పర్యాటకాన్ని ప్రోత్సహిస్తుందని అటవీశాఖ రేంజ్ అధికారి శ్రీనివాస్ ‘ఫెడరల్ తెలంగాణ’కు చెప్పారు. దైనందిన బిజీ జీవితంతో సతమతమవుతున్న హైదరాబాద్ నగరవాసులు వారాంతాల్లో ఒకింత సేద తీరేందుకు అనంతగిరి హిల్స్ లోని ప్రకృతి ఒడిలో విహరించి సేదతీరుతుంటారు. పర్యాటకులు అనంతగిరి హిల్స్ కు మధ్యాహ్నం సమయానికి చేరుకుంటే వారికి భోజనం పెట్టి అడవిలో బర్డ్ వాక్, ట్రెక్కింగుకు తీసుకువెళతామని శ్రీనివాస్ చెప్పారు. హరిత రిసార్ట్సులో పర్యాటకులకు వసతి సౌకర్యాలు కల్పించడంతో పాటు రెండో రోజు ఉదయాన్నే6 గంటల నుంచి 9 గంటల వరకు సఫారీ యాత్రకు తీసుకువెళ్లి వన్యప్రాణులను చూపిస్తామని ఆయన వివరించారు.