ఈ ఊరు ఊరంతా శ్రీనివాసులే.. తొందర్లో 'శ్రీనివాసుల రాష్ట్ర సమ్మేళనం'

తెలుగు రాష్ట్రాలలో శ్రీనివాసుడికి ఉండే ప్రత్యేకత అది. చాలా కుటుంబాలకు కులదైవం, ఇష్టదైవం. తిరుమల ఏడుకొండల వాడికి ఉండే పేరు ప్రతిష్టతలకు అంతటి విశిష్టత ఉంది.

తిరుపతి తిరుమల లడ్డూ ప్రసాదం వివాదాస్పదమైన నేపథ్యంలో శ్రీవారి పేరు మరోసారి ప్రపంచ వ్యాప్తంగా తెరపైకి వచ్చింది. ఈ నేపథ్యంలో తెలంగాణలోని భూపాలపల్లి జిల్లా కాళేశ్వరంలో ఉండే దైవజ్ఞ శ్రీనివాస్ కి ఓ గమ్మత్తు ఆలోచన వచ్చింది. కాళేశ్వరంలో శ్రీనివాస్ పేరిట ఎంతమంది ఉన్నారో వాళ్లందర్నీ ఒక చోట జతచేస్తే ఎలా ఉంటుందో అనుకున్నారు. అనుకున్నదే తడవుగా కార్యాచరణకు పూనుకున్నారు. మనమంతా శ్రీనివాసులమే అనే పేరిట ఓ వాట్సాప్ గ్రూపు ఏర్పాటు చేశారు. ఇక చూస్కో.. వందల మంది అందులో చేరిపోయారు. అందరూ కుశలప్రశ్నలు, ఈతి బాధలు, కష్టసుఖాలు వంటి అనేక విషయాలపై పోస్టులు పెట్టుకుంటున్నారు. లడ్డూ వివాదం నేపథ్యంలో శ్రీనివాసులందరూ ఓచోట కలవాలన్న ఊటుకూరి శ్రీనివాసరెడ్డి ఆలోచన మేరకు కరీంనగర్ విద్యానగర్ లోని శ్రీవేంకటేశ్వర స్వామి ఆలయాన్ని ఎంచుకున్నారు. దాదాపు 150 నుంచి 200 మంది శ్రీనివాసులు సెప్టెంబర్ 28న అక్కడ కలిసి సందడి చేశారు. 'చిన్న శ్రీనివాసు, పెద్ద శ్రీనివాసు, ఆ ఇంటి శ్రీనివాసు, ఈ ఇంటి శ్రీనివాసు' అని పలకరింపులు, ఏరా శ్రీనివాసు ఎలా ఉన్నావంటూ కుశల ప్రశ్నల అనంతరం ఏడుకొండల వాణ్ణి వేడుకున్నారు. భక్తి ప్రపత్తులతో భజనలు చేశారు. గోవిందనామాలు పాడారు. సేవా కార్యక్రమాలకు శ్రీకారం చుట్టాలని నిర్ణయించుకున్నారు. త్వరలో తెలంగాణ రాష్ట్ర వ్యాప్తంగా ఉన్న శ్రీనివాసుల గ్రూపు ఏర్పాటు చేసి అందర్నీ ఒక చోట చేర్చి ప్రపంచ రికార్డు సృష్టించాలనుకున్నారు. అదే విషయాన్ని ఊట్కూరి శ్రీనివాస రెడ్డి చెప్పారు. ఈ ప్రతిపాదనకు ఎక్కువ మంది శ్రీనివాసులు మద్దతివ్వడంతో ఆయన ఇప్పుడు ఆ పనిలో పడ్డారు. ఇదే స్ఫూర్తితో ప్రతి ఊర్లో ఉన్న శ్రీనివాసుల్న ఏకం చేసేందుకు కసరత్తు చేస్తున్నారు.