కాంగ్రెస్ గాడిద గుడ్డును క్యాచ్ పట్టిన బీజేపీ

కేంద్రంలో ఎన్డీయే సర్కార్ ప్రవేశపెట్టిన బడ్జెట్ పై తెలంగాణ కాంగ్రెస్ ప్రభుత్వం విమర్శలు గుప్పించింది. 8 సీట్లిస్తే బీజేపీ రాష్ట్రానికి ఏమిచ్చింది? "గాడిద గుడ్డు" అంటూ ప్రచారం మొదలుపెట్టింది. 8 సీట్లు+కేంద్ర బడ్జెట్ =గాడిదగుడ్డు అంటూ ఎద్దేవా చేసింది. పార్లమెంటు ఎన్నికల సమయంలోనూ బీజేపీపై కాంగ్రెస్ గాడిద గుడ్డు ప్రచారం విస్తృతంగా చేసిన విషయం తెలిసిందే. తాజాగా కేంద్ర బడ్జెట్ లో తెలంగాణకి అన్యాయం జరిగిందంటూ... మరోసారి హోర్డింగులు, పోస్టర్లతో బీజేపీ పై మరోసారి 'గాడిద గుడ్డు' ను ప్రయోగించింది కాంగ్రెస్. అయితే రైట్ టైం లో కాంగ్రెస్ 'గాడిద గుడ్డు' ను బీజేపీ క్యాచ్ పట్టేసింది.

ఈరోజు తెలంగాణలో కాంగ్రెస్ సర్కార్ పూర్తిస్థాయి బడ్జెట్ ని ప్రవేశపెట్టింది. ఈ బడ్జెట్ పై ప్రతిపక్షాలు విమర్శలు మొదలుపెట్టాయి. ఇదే తరుణంలో కేంద్ర హోంశాఖ సహాయ మంత్రి బండి సంజయ్ ఓ ప్రకటన విడుదల చేశారు. ఈ ప్రకటనలో రాష్ట్ర బడ్జెట్ పై అసంతృప్తి వ్యక్తం చేశారు. పనిలో పనిగా కాంగ్రెస్ 'గాడిద గుడ్డు' ప్రచారాన్ని వారికే తిప్పికొట్టారు. కాంగ్రెస్ + రాష్ట్ర బడ్జెట్ = గాడిద గుడ్డేనా? 6 గ్యారంటీలు + రాష్ట్ర బడ్జెట్ = గాడిద గుడ్డేనా? గాడిద గుడ్డు పెట్టడం ఎంత నిజమో.... కాంగ్రెస్ ఇచ్చిన హామీలన్నీ అమలు చేయడం అంతే నిజమనే దానికి బడ్జెట్ నిదర్శనం అంటూ సెటైర్లు వేశారు.

ఇంకా ఆయన ఏమన్నారంటే...

భట్టి విక్రమార్క గారు....మీరు చదివింది ఆర్దిక బడ్జెట్టా లేక అప్పుల పత్రమా..?

అప్పులున్నందున హామీలను అమలు చేయలేమని చేతులెత్తేస్తున్నారా?

అప్పులున్న విషయం ముందు మీకు తెలిసి కూడా 6 గ్యారంటీలిచ్చిన మీరు వాటన్నింటికీ బడ్జెట్ లో నిధులెందుకు కేటాయించలేదు?

6 గ్యారంటీలుసహా హామీల అమలుపై చర్చ జరగకుండా ఉండేందుకే కేంద్రాన్ని బదనాం చేయాలనుకుంటున్నారా?

బడ్జెట్ కేటాయింపులకు సరిపడ ఆదాయం ఎక్కడి నుండి సమకూర్చుకుంటారో బడ్జెట్ లో లెక్కా పత్రం చూపకపోవడం విడ్డూరం

సర్కారీ భూములన్నీ అడ్డికి పావుశేరు అమ్మాలనుకుంటున్నారా?

ఔను... హామీలను అమలు చేయడం చేతకాని కాంగ్రెస్ కు మాటలెక్కువని బడ్జెట్ చూస్తే అర్ధమవుతోంది

12 వేల పోస్టులకే నోటిఫికేషన్ ఇచ్చిన మీరు 31 వేలకుపైగా ఉద్యోగాలు భర్తీ చేశామని చెప్పడం నిరుద్యోగులను మోసం చేయడమే

రూ.లక్షన్నర కోట్లతో నిర్మిస్తామన్న మూసీ రివర్ ఫ్రంట్ కు బడ్జెట్ లో పైసా కేటాయించని మీరా కేంద్రంపై విమర్శలు చేసేది?

రంజాన్ వేడుకలకు రూ.33 కోట్లు కేటాయించిన ప్రభుత్వం హిందువుల పండుగలకు నయాపైసా కేటాయించకపోవడం మతతత్వం కాదా?

ఒక వర్గం ఓట్ల కోసం కాంగ్రెస్ పార్టీ మెజారిటీ హిందూ ప్రజలకు తీవ్రమైన నష్టం చేయడమేనా మైనారిటీ డిక్లరేషన్ అంటే?

రుణమాఫీవల్ల రైతులకు లాభం కంటే నష్టమే జరిగిందని ప్రభుత్వమే ఒప్పుకుంది

రైతులకు జరిగిన నష్టాన్ని పూడ్చి డిఫాల్టర్ల జాబితా నుండి తొలగిస్తారా? లేదా? చెప్పాలి

ఏడాదిపాటు నష్టపోయిన ‘రైతు భరోసా’, రూ.500 బోనస్, పంట నష్ట పరిహారం నిధులను కూడా ఈ ఏడాది చెల్లిస్తారా? లేదా?

జాతీయ వ్రుద్ధి రేటు కంటే తెలంగాణ వ్రుద్ధి రేటు తక్కువ నమోదు కావడమే 10 ఏళ్ల కాంగ్రెస్, బీఆర్ఎస్ పాలనకు అద్ధం పడుతుంది

కేబినెట్ మంత్రుల మధ్యే సఖ్యత లేదు... తెలంగాణలో సమసమాజం స్థాపిస్తామనడం శతాబ్దం జోక్

ఇప్పటికైనా పీఎం ఫసల్ బీమాలో చేరాలని నిర్ణయించడం సంతోషం

90 లక్షల తెల్ల రేషన్ కార్డులుంటే... 39 లక్షల మందికే గ్యాస్ సబ్సిడీ ఇచ్చి గొప్పలు చెప్పుకోవడం దారుణం

50 లక్షల మంది అర్హులకు రూ.500 సబ్సిడీని ఎగ్గొట్టి మహిళల్లో వెలుగులు నింపామని చెప్పుకోవడం సిగ్గు చేటు

ఇందిరమ్మ ఇండ్లు, ట్రిపుల్ ఆర్ నిర్మాణంలో కేంద్ర నిధులున్నాయని బడ్జెట్ లో ప్రస్తావించకపోవడం విడ్డూరం

బడ్జెట్ లోని చివరి పేజీలో ప్రస్తావించిన మహాత్ముడి వ్యాఖ్యలపై కాంగ్రెస్ నేతలు ఆత్మపరిశీలన చేసుకోవాలి

రాష్ట్ర ఆర్దిక పరిస్థితి, అప్పులకు.... మీరిచ్చిన అలవి కాని హామీలకు మధ్య ఉన్న అంతరాన్ని గ్రహించండి

కాంగ్రెస్ ఇచ్చిన హామీలను రాబోయే ఐదేళ్లలో కూడా అమలు చేయడం అసాధ్యమని బడ్జెట్ లోనే తేలింది

బడ్జెట్ లో ఏ ఒక్క నియోజకవర్గం ఊసే లేదు... సీఎంసహా మంత్రులు, కాంగ్రెస్ ఎమ్మెల్యేలంతా రాజీనామా చేస్తారా?

కేంద్ర బడ్జెట్ ప్రసంగంలో తెలంగాణ పేరు రాలేదని... రాష్ట్రానికి ఘోర అన్యాయం ప్రజలను రెచ్చగొట్ట్టిన కాంగ్రెస్ నేతలు రాష్ట్ర బడ్జెట్ లో ఏ ఒక్క జిల్లా, నియోజకవర్గం ప్రస్తావన చేయలేదు కదా... దీనికేం సమాధానం చెబుతారు?

బడ్జెట్ లో పేరు ప్రస్తావించకపోయినంత మాత్రాన ఆ ప్రాంతాలకు అన్యాయం చేసినట్లా? రాజకీయ ప్రయోజనాల కోసం ప్రజల మధ్య చిచ్చుపెట్టాలని చూస్తారా? అని బండి సంజయ్ రాష్ట్ర ప్రభుత్వాన్ని నిలదీశారు.