నకిలీ ఎన్ సీసీ క్యాంపుల్లో విద్యార్థినులకు లైంగిక వేధింపులు

లైంగిక నేరాల నుంచి పిల్లలను రక్షించే చట్టం (పోక్సో), BNS చట్టం కింద నిందితుడు శివరామన్, పాఠశాల ప్రిన్సిపాల్, ఉపాధ్యాయులు, సిబ్బందితో సహా 11 మందిని పోలీసులు ఇప్పటివరకు అరెస్టు చేశారు. నిందితుడు శివరామన్ నామ్ తమిళర్ కట్చి (NTK) యువజన విభాగం తూర్పు జిల్లా కార్యదర్శి. ఆయనను ఎన్టీకే అధినేత సీమాన్ శనివారం పార్టీ నుంచి బహిష్కరించారు. ఈ అంశంపై NTK ఇంకా స్పందించలేదు. నిందితుడు పోలీసులు అరెస్ట్ చేయడానికి వెళ్లినప్పుడు తప్పించుకునే క్రమంలో కాలికి గాయమైంది. ప్రస్తుతం శివరామన్‌ కృష్ణగిరి జనరల్‌ ఆస్పత్రిలో చికిత్స పొందుతున్నారు.

కృష్ణగిరి జిల్లా కలెక్టర్ కెఎం సరయు మీడియాతో మాట్లాడుతూ.. బాలిక తల్లిదండ్రులు ఫిర్యాదు చేయడంతో, మరికొందరు కూడా తమ ఫిర్యాదులతో ముందుకు వచ్చారు.

“మేము విద్యార్థులకు కౌన్సెలింగ్ ఇస్తున్నాము. భయం లేకుండా సంఘటనలను వివరించమని వారిని కోరుతున్నాం. తల్లిదండ్రులు సంఘటనకు సంబంధించిన ఎలాంటి వివరాలను దాచకుండా ఉండేలా మేము వారికి కౌన్సెలింగ్ సెషన్‌లను కూడా ఏర్పాటు చేసాము. జిల్లావ్యాప్తంగా ఉన్న తల్లిదండ్రులు, విద్యార్థులు ఈ కేసుకు సంబంధించిన ఏదైనా అదనపు సమాచారాన్ని అందించడానికి 1098 హెల్ప్‌లైన్‌ను ఉపయోగించవచ్చు” అని సరయు చెప్పారు.

కాగా, కృష్ణగిరిలో ఎలాంటి ఎన్‌సిసి శిక్షణ నిర్వహించలేదని ఎన్‌సిసి తమిళనాడు విభాగం స్పష్టం చేసింది. “ ప్రస్తుతం జరిగిన సంఘటనలో పాల్గొన్న సిబ్బందికి ఎన్‌సిసితో ఎటువంటి సంబంధం లేదు. కృష్ణగిరిలో ఎన్‌సిసి క్యాంపు నిర్వహించలేదు' అని ఎన్‌సిసి డైరెక్టరేట్ డిప్యూటీ డైరెక్టర్ జనరల్ కమోడోర్ ఎస్ రాఘవ్ ఒక ప్రకటనలో తెలిపారు.

శిక్షణా కార్యక్రమాన్ని నిర్వహించే ముందు శిక్షకుని ఆధారాలను లేదా దాని చట్టబద్ధతను ధృవీకరించలేదని సంబంధిత ప్రైవేట్ పాఠశాల అధికారులు పోలీసుల ముందు అంగీకరించారు. ఆగస్టు 5 నుంచి 9 వరకు జరిగిన ఈ శిబిరంలో 17 మంది బాలికలు సహా 41 మంది విద్యార్థులు పాల్గొన్నారు.

క్యాంపస్‌లో ఎన్‌సిసి క్యాంపు నిర్వహించాలని శివరామన్ పాఠశాల అధికారులను సంప్రదించినట్లు తెలిసింది. పాఠశాలలో ఎన్‌సిసి యూనిట్ లేదని, శిబిరం నిర్వహించడం ద్వారా అర్హత సాధిస్తామని శివరామన్ హామీ ఇచ్చారని ఆరోపించారు.

విద్యార్థినులలో ఒకరు లైంగిక వేధింపుల గురించి ఒక ఉపాధ్యాయుడికి నివేదించినప్పుడు, అతను అధికారులను అప్రమత్తం చేయడంలో విఫలమయ్యాడని, పాఠశాల యాజమాన్యం సంఘటనను కప్పిపుచ్చడానికి ప్రయత్నించిందని పోలీసులు తెలిపారు. ఇతర తల్లిదండ్రులు ఫిర్యాదు చేయబోతుండగా, శివరామన్ కోయంబత్తూరుకు పారిపోయారని పోలీసు సూపరింటెండెంట్ పి తంగదురై తెలిపారు.

‘‘పాఠశాల అధికారులు విద్యార్థుల నోరు మూయించారు. ఇప్పటి వరకు 13 మంది విద్యార్థులు నేరంపై వివరాలు అందించారు. పాఠశాల బిల్డింగ్ ను కూడా మార్గదర్శకాల ప్రకారం నిర్వహించడం లేదు. ఎన్సీసీ శిబిరం నిర్వహించడానికి సంబంధిత వ్యక్తులకు ఆధారాలు ఉన్నాయా అని కూడా పాఠశాల యాజమాన్యం పరిశీలించలేదు. శివరామన్ పాఠశాలలో ఎలా ప్రవేశం పొందాడనే దానిపై మేము దర్యాప్తు చేస్తున్నాము. అతను గతంలో ఇలాంటి నేరాలకు పాల్పడ్డాడా అనే కోణంలో దర్యాప్తు చేస్తున్నాము, ” అని ఎస్పీ చెప్పారు.

బాలల హక్కులను అరిస్తున్న ఇలాంటి వ్యక్తులపై కఠినంగా చర్యలు తీసుకోవాలని చైల్డ్ రైట్స్ ఆక్టివిస్టు ఏ. దేవేయాన్ కోరారు. నేరాన్ని కప్పి పుచ్చడానికి ప్రయత్నించిన ఉపాధ్యాయులను సైతం తొలగించాలని డిమాండ్ చేశారు.

“బాధితులు లేదా అవగాహన ఉన్న ఉపాధ్యాయులు సంఘటనలను నివేదించడంలో విఫలం అయ్యారు. ఇలాంటి అనేక సంఘటనల వలన నేరస్థులు తప్పించుకుంటున్నారు. దీనికి కృష్ణగిరి కేసు మినహాయింపు కాకూడదు. తదుపరి సమాచారాన్ని వెలికితీసేందుకు పాఠశాల విద్యా శాఖ తప్పనిసరిగా అన్ని పాఠశాలల నుంచి రెసిడెన్షియల్ శిక్షణ, శిబిరాల గురించి వివరాలను సేకరించాలి, ” అని అతను ది ఫెడరల్‌తో చెప్పాడు.

తమిళనాడు స్కూల్ ఎడ్యుకేషన్ డిపార్ట్‌మెంట్ 2021లో GO నంబర్ 83ని జారీ చేసింది, ఇది పాఠశాల ఆధారిత సెట్టింగ్‌లలో లైంగిక హింసను పరిష్కరించడంలో ఒక సంస్థ బాధ్యతను స్పష్టంగా వివరించింది. అయితే లైంగిక వేధింపుల ఫిర్యాదుల దాఖలుకు సంబంధించిన మార్గదర్శకాలు, SOPలు ప్రభుత్వ, ప్రైవేట్ పాఠశాలల్లో అమలు చేయబడలేదని దేవనేయన్ వంటి బాలల హక్కుల కార్యకర్తలు ఎత్తి చూపుతున్నారు.

పిల్లల దుర్వినియోగం, అక్రమ రవాణా గురించి నివేదించడానికి పిల్లల హెల్ప్‌లైన్ 1098కి డయల్ చేయాలి.