పోలవరం ’గుండె‘ నిర్మాణం పూర్తి

సీఎం చంద్రబాబు ట్వీట్

“ఆంధ్రప్రదేశ్ జీవనాడి పోలవరం ప్రాజెక్టును పూర్తి చేయాలన్న ప్రభుత్వ సంకల్పంలో నేడు మరో కీలక ఘట్టం పూర్తయ్యింది. ప్రాజెక్టు నిర్మాణంలో అత్యంత కీలకమైన 1,372 మీటర్ల పొడవైన ‘డయాఫ్రం వాల్’ నిర్మాణాన్ని తక్కువ సమయంలో పూర్తి చేసిన ఇరిగేషన్ శాఖ అధికారులకు, ఇంజనీర్లకు అభినందనలు. దీనికి సహకరించిన కేంద్ర సంస్థలకు, పోలవరం ప్రాజెక్టు అధారిటీ ప్రతినిధులకు ధన్యవాదాలు. గత పాలకుల నిర్లక్ష్యం కారణంగా డీ-వాల్ దెబ్బతినడంతో అదనంగా రూ.1000 కోట్లు వెచ్చించి నిర్మించాం. డయాఫ్రమ్ వాల్ పూర్తి కావటంతో ప్రధాన కట్టడమైన ఎర్త్ కమ్ రాక్ ఫిల్ (ECRF) డ్యామ్ పనులు వేగవంతం అవుతాయి. ఇప్పటికే ప్రకటించినట్లు అన్ని పనులు పూర్తి చేసి 2027 పుష్కరాలకు ముందే పోలవరం ప్రాజెక్టును పూర్తి చేసి జాతికి అంకితమిస్తాం” అని సీఎం చంద్రబాబు ట్వీట్ చేశారు.

టర్నింగ్ పాయింట్...

ఈ డయాఫ్రం వాల్ పూర్తి కావడం ప్రాజెక్టు నిర్మాణంలో ఒక టర్నింగ్ పాయింట్. గోదావరి నది పడమటి ఒడ్డున నిర్మాణాధీనంలో ఉన్న ఈ భారీ ప్రాజెక్టులో డయాఫ్రం వాల్ రివర్ బెడ్‌ను స్థిరపరచి, ఎర్త్-కమ్-రాక్ ఫిల్ (ECRF) డ్యామ్‌ను భద్రంగా నిలబెట్టడానికి కీలకం. గత వైఎస్సార్సీపీ ప్రభుత్వ కాలంలో వరదల్లో డ్యామేజ్ అయిన పాత వాల్‌ను రిపేర్ చేయకుండా నాణ్యత, భద్రత పరంగా కొత్త వాల్‌ను నిర్మించాలని సీఎం చంద్రబాబు నిర్ణయం తీసుకున్నారు. దీని వల్ల అదనపు రూ.1000 కోట్లు ఖర్చు అయినప్పటికీ, ప్రాజెక్టు దీర్ఘకాలిక స్థిరత్వం కోసం ఈ నిర్ణయం తీసుకోవడం రాష్ట్రానికి లాభదాయకమని అధికారులు చెబుతున్నారు.

నిర్మాణం పూర్తయిన డయాఫ్రం వాల్

ప్రాజెక్టు పురోగతి ఎలా ఉంది?

ప్రస్తుతం పోలవరం ప్రాజెక్టు మొత్తం పనులు 88 శాతం పైనే ఉన్నాయి. మెయిన్ డ్యామ్ పనులు దాదాపు పూర్తి స్థాయిలో ఉన్నాయి. ఎంబ్యాంక్‌మెంట్ పనులు జూన్ నాటికి పూర్తి చేసే లక్ష్యంతో వేగంగా కొనసాగుతున్నాయి. డయాఫ్రం వాల్ పూర్తి కావడంతో ECRF డ్యామ్ నిర్మాణం ఇక మరింత వేగవంతం అవుతుందని అధికారులు తెలిపారు. రైట్ కనెక్టివిటీ టన్నెల్స్, లెఫ్ట్ కనెక్టివిటీ టన్నెల్స్ పనులు కూడా షెడ్యూల్ ప్రకారం ముందుకు సాగుతున్నాయి.

సీఎం లక్ష్యం ఏమిటి?

ముఖ్యమంత్రి చంద్రబాబు నాయుడు ఇప్పటికే ప్రకటించినట్లు ఫేజ్-1 పనులన్నీ 2027 మార్చి నాటికి పూర్తి చేసి నీటిని విడుదల చేయాలని లక్ష్యం. పూర్తి ప్రాజెక్టును 2027 గోదావరి పుష్కరాలకు ముందే (జూన్ 2027) జాతికి అంకితం చేయాలని సీఎం సంకల్పం. ఇందుకోసం ప్రభుత్వం రోజువారీ పర్యవేక్షణ చేస్తోంది. కేంద్ర సంస్థలతో సమన్వయం చేసుకుని అన్ని అడ్డంకులను తొలగించుకుని సీఎం ముందుకు సాగుతున్నారు.

పోలవరం-రాష్ట్ర భవిష్యత్తు ఆధారం

గోదావరి నదిపై నిర్మాణాధీనంలో ఉన్న ఈ జాతీయ ప్రాజెక్టు 7.5 లక్షల ఎకరాలకు సాగునీరు అందించనుంది. 960 మెగావాట్ల హైడ్రో పవర్ ఉత్పత్తి, డ్రింకింగ్ వాటర్ సప్లై, ఇండస్ట్రియల్ నీటి అవసరాలు తీర్చడంతో పాటు కృష్ణా, పెన్నా నదులతో అనుసంధానం ద్వారా రాష్ట్రవ్యాప్తంగా జల సంక్షేమం తీసుకురావడం దీని లక్ష్యం. గతంలో ఏడేళ్ల పాటు ఆలస్యం జరిగినా, ప్రస్తుత తెలుగు దేశం కూటమి ప్రభుత్వం రాకతో పనులు ముమ్మరం చేసి రికార్డు సమయంలో మైలురాళ్లు దాటుతోంది.

ఇరిగేషన్ ఇంజనీర్లు, కాంట్రాక్టర్లు, కేంద్ర సంస్థలు చూపిన సమన్వయం, నాణ్యతతో ఈ విజయం సాధ్యమైందని సీఎం చంద్రబాబు స్పష్టం చేశారు. పోలవరం ప్రాజెక్టు పూర్తయితే ఆంధ్రప్రదేశ్ రైతుల భవిష్యత్తు ఉజ్వలంగా మారనుంది. ఈ మైలు రాయి రాష్ట్ర చరిత్రలో ఒక గొప్ప అధ్యాయం!