ముడా కేసులో సీఎం సిద్ధరామయ్యకు భారీ ఊరట

కర్ణాటక(Karnataka) ముఖ్యమంత్రి సిద్ధరామయ్య(CM Siddaramaiah)పై ఉన్న MUDA (మైసూర్ అర్బన్ డెవలప్‌మెంట్ అథారిటీ) స్థలాల కేటాయింపు కుంభకోణం కేసులో ఆయనకు కీలకమైన చట్టపరమైన విజయం లభించింది. లోకాయుక్త (Lokayukta) పోలీసులు సమర్పించిన ‘బి రిపోర్ట్’ను ప్రజాప్రతినిధుల ప్రత్యేక కోర్టు అంగీకరించింది. దీంతో ఈ కేసులో ప్రధాన నిందితులుగా ఉన్న సీఎం సిద్ధరామయ్య, ఆయన భార్య బిఎం పార్వతి, మల్లికార్జున స్వామి, జె దేవరాజులు నిర్దోషులుగా విడుదలయ్యారు. ఫిర్యాదుదారు స్నేహమయి కృష్ణ బి రిపోర్ట్‌ను సవాలు చేస్తూ దాఖలు చేసిన పిటిషన్‌లోని ఆరోపణలకు ఆధారాలు లేవని కోర్టు స్పష్టం చేసింది.

స్నేహమయి కృష్ణ ఏమన్నారు?

సిద్ధరామయ్యపై ఆరోపణలను నిర్ధారించే సాక్ష్యాలు లేవని గమనించిన లోకాయుక్త పోలీసులు ఈ బి రిపోర్ట్‌ను దాఖలు చేశారు. ఇప్పుడు కోర్టు దానిని ఆమోదించడంతో, సిద్ధరామయ్యకు నైతికంగా మరియు చట్టపరంగా పెద్ద ఊరట లభించింది. అయితే, ఈ ఉత్తర్వును సవాలు చేస్తూ హైకోర్టులో అప్పీల్ దాఖలు చేస్తానని ఫిర్యాదుదారు స్నేహమయి కృష్ణ ‘ది ఫెడరల్ కర్ణాటక’తో మాట్లాడుతూ తెలిపారు. ఇదే సమయంలో, కేసులో మిగిలిన నిందితులపై దర్యాప్తు కొనసాగించాలని కోర్టు దర్యాప్తు అధికారులను ఆదేశించింది. తుది నివేదికను సమర్పించాలని చెప్పిన కోర్టు, తదుపరి విచారణను ఫిబ్రవరి 9కి వాయిదా వేసింది.