ఆంధ్ర పై ‘మురసు’ తుఫాన్ ఎఫెక్ట్

మంగళవారం తెల్లవారుజామున 3.30 నుంచి 5.30 గంటల మధ్య నెల్లూరు, నరసాపురం మధ్య ఒంగోలుకు సమీపంలో మురసు తుఫాన్ దక్షిణ ఆంధ్రప్రదేశ్ తీరాన్ని దాటింది. తీరం దాటే సమయంలో గంటకు 100 నుంచి 110 కిలోమీటర్ల వేగంతో గాలులు వీచాయి. కొన్ని సందర్భాల్లో గాలుల వేగం 120 కిలోమీటర్లకు చేరుకుంది.

తుఫాన్ ప్రభావం బాపట్ల, ప్రకాశం జిల్లాల్లో ఎక్కువగా కనిపించింది. భారీ వర్షాలు, ఈదురుగాలులకు చెట్లు విరిగిపడ్డాయి. విద్యుత్ స్తంభాలు కూలిపోయాయి. పలు ఇళ్లు దెబ్బతిన్నాయి. పొలాల్లోకి వరద నీరు చేరింది. జాతీయ రహదారులపై భారీ వర్షం కారణంగా వాహనాల రాకపోకలకు అంతరాయం ఏర్పడింది. దారి కనిపించక వాహనదారులు ఇబ్బందులు ఎదుర్కొన్నారు.

గత 14 ఏళ్లలో ఇదే భయంకరమైన తుఫాన్..

తుఫాన్ ముప్పును ముందుగానే గుర్తించిన అధికారులు సహాయక చర్యలు చేపట్టారు. ప్రకాశం జిల్లా కొత్తపట్నం ప్రాంతంలో సుమారు 400 కుటుంబాలను సురక్షిత ప్రాంతాలకు తరలించారు. ఎన్డీఆర్ఎఫ్ బృందాలు కూడా ఈ చర్యల్లో పాల్గొన్నాయి.

కొత్తపట్నానికి చెందిన మత్స్యకారుడు కృష్ణమ్మ ఈ తుఫాన్ గత 14 ఏళ్లలో తాము ఎదుర్కొన్న అత్యంత ప్రమాదకరమైనదని తెలిపారు. ప్రభుత్వం సహాయక చర్యలు చేపట్టి సుమారు 400 కుటుంబాలను సురక్షిత ప్రాంతాలకు తరలించిందని, ఎన్డీఆర్ఎఫ్ బృందాలు కూడా తమకు అండగా నిలిచాయని వివరించారు. అయితే తుఫాన్ ధాటికి దెబ్బతిన్న పడవల పరిస్థితి ఏమిటో ఇంకా తెలియడం లేదని ఆవేదన వ్యక్తం చేశారు.

ఇదిలా ఉంటే, తుఫాన్ కారణంగా గతంలో ఇల్లు కోల్పోయిన ఓ మహిళను ఈసారి అధికారులు ముందుగానే సురక్షిత ప్రాంతానికి తరలించడంతో ప్రాణాపాయం తప్పింది. అయితే ఆమెకు చెందిన మూడు పడవల్లో ఒకటి ధ్వంసమైంది.

మరోవైపు మురసు తుఫాన్ క్రమంగా బలహీనపడుతోందని భారత వాతావరణ శాఖ తెలిపింది. మంగళవారం మధ్యాహ్నానికి తీవ్ర తుఫాన్ స్థాయి నుంచి సాధారణ తుఫాన్‌గా మారుతుందని, అర్ధరాత్రి సమయానికి తీవ్ర వాయుగుండంగా బలహీనపడే అవకాశం ఉందని అంచనా వేసింది.

అయితే తుఫాన్ బలహీనపడినా వర్షాల ముప్పు మాత్రం కొనసాగనుంది. ఆంధ్రప్రదేశ్‌లోని పలు ప్రాంతాల్లో తేలికపాటి నుంచి మోస్తరు వర్షాలు కురిసే అవకాశం ఉండగా, కొన్ని చోట్ల భారీ నుంచి అతి భారీ వర్షాలు, మరికొన్ని ప్రాంతాల్లో అత్యంత భారీ వర్షాలు పడవచ్చని వాతావరణ శాఖ హెచ్చరించింది. దీంతో తీరప్రాంత ప్రజలు అప్రమత్తంగా ఉండాలని, అధికారుల సూచనలు పాటించాలని సూచించింది.