కర్ణాటక: ఆప్టిక్స్ రాజకీయాలకు తెరలేపిన డీకే శివకుమార్, సిద్ధరామయ్య

ఈ సమావేశం బెంగళూర్ లోని కర్ణాటక సీఎం అధికారిక నివాస భవనమైన ‘కావేరీ’లో జరిగింది. ఉపముఖ్యమంత్రి డీకే శివకుమార్ ఉదయం పదిగంటలకు సీఎం ఇంటికి వచ్చారు. అయితే డీకే తో పాటు ఎవరూ లేరు. స్థానిక మంత్రులు కానీ, ఎమ్మెల్యేలు ఇతర సహాయకులు ఎవరూ తోడులేరు. అయితే సీఎం న్యాయసలహాదారు ఏఎస్ పొన్నప్ప మాత్రమే హజరయ్యారు.

ముందురోజు రాత్రి డీకే శివకుమార్ బెంగళూర్ సమీపంలోని ఓ రిసార్ట్ లో తన సన్నిహితులైన హెచ్ సీ బాలకృష్ణ, రంగనాథ్ లలో విడివిడిగా సమావేశం అయ్యారు.

తనకు కచ్చితంగా సీఎం పదవి కావాలని డీకే కొంతకాలంగా పట్టుబడుతున్నారు. వచ్చే నెలలో బెళగావి కేంద్రంగా నిర్వహించే అసెంబ్లీ సమావేశాలకు ముందే నాయకత్వ మార్పు జరగాలని పావులు కదుపుతున్నారు. ఫిబ్రవరి నాటికి ముఖ్యమంత్రిగా తానే స్వయంగా బడ్జెట్ ప్రవేశపెట్టాలని లక్ష్యంగా పెట్టుకున్నారు.

అయితే బ్రేక్ ఫాస్ట్ సమావేశాన్ని రాజకీయ పరిశీలకు ఆప్టిక్స్ గా పిలుస్తున్నారు. దీని వలన ఆశించిన ఫలితాలు రాకపోవచ్చని అంచనా వేస్తున్నారు. రాహుల్ గాంధీ ఈ రోజు సాయంత్రం లేదా సోమవారం ఉదయం ఇద్దరు నాయకులతో సమావేశం నిర్వహించే అవకాశం ఉందని ఏఐసీసీ వర్గాలు తెలిపాయి. తరువాత నాయకత్వ మార్పుపై తుది నిర్ణయం తీసుకునే అవకాశం ఉంది.

నాయకత్వ మార్పుపై కాంగ్రెస్ తగినంత సమయం ఉందని మంత్రి ప్రియాంక్ ఖర్గే అన్నారు. ఆయన వ్యాఖ్యలు చేసిన మరుసటి రోజు ఇద్దరు నాయకులు బ్రేక్ ఫాస్ట్ మీటింగ్ లో కలవడం ప్రాధాన్యం సంతరించుకుంది. తన పదవిపై అధిష్టానందే తుది నిర్ణయమని సిద్ధరామయ్య చెబుతుండగా, తాను పదవికోసం తొందరపడటం లేదని డీకే వాదిస్తున్నారు.

‘‘నా వైఖరిలో ఎలాంటి మార్పు లేదు. హైకమాండ్ ఏం చెప్పిన వింటానని చెప్పాను. పార్టీ ఏ నిర్ణయం తీసుకున్నా మేమిద్దరం పాటిస్తాము’’ అని ఆయన అన్నారు. హైకమాండ్ ఆదేశిస్తే ఢిల్లీ వెళ్తానని కూడా ముఖ్యమంత్రి చెప్పారు.

నాకు తొందర లేదు..

సీఎం పదవి విషయంలో తాను తొందరపడటం లేదని డీకే శివకుమార్ అన్నారు. మీరు ఢిల్లీ వెళ్లి హైకమాండ్ ను కలుస్తారా? అని ప్రశ్నించగా.. ఢిల్లీ మా ఆలయం అని ధృవీకరించిన ఆయన.. నాకు ఏమి వద్దని, తొందరపడటం లేదని అన్నారు. తుది నిర్ణయం హైకమాండ్ తీసుకుంటుందని బెంగళూర్ లో విలేకరులతో అన్నారు. డిసెంబర్ 1 నుంచి పార్లమెంట్ శీతాకాల సమావేశాలు ప్రారంభం అవుతాయని, ఆ దృష్ట్యా తాను దేశ రాజధానికి ప్రయాణం అవుతానని అన్నారు.

‘‘దేశ రాజధాని పర్యటన సందర్భంగా నేను ఢిల్లీకి వెళ్లవచ్చు. నాకు అక్కడ చాలా పని ఉంది. పార్లమెంట్ సమావేశాలు సమీపిస్తున్నాయి. కర్ణాటక ఎంపీలందరిని కలవాల్సి ఉంది. ఎందుకంటే రాష్ట్రంలో ముఖ్యమైన కొన్ని ప్రాజెక్ట్ లను అందులో చేర్చాలి’’ అని ఆయన అన్నారు.

పార్టీ హైకమాండ్ పిలిస్తే వెళ్లి కలుస్తానని చెప్పారు. కాంగ్రెస్ నాయకత్వం పార్టీ విధానాన్ని నిర్ణయిస్తుందని, తాను సిద్ధరామయ్య, ఎప్పుడు పిలిచినా ఢిల్లీకి వెళ్తామని ఆయన అన్నారు.

మరోవైపు ఈ పరిణామాలపై ప్రతిపక్ష బీజేపీ కూడా స్పందించింది. నాయకత్వ మార్పుపై విభేదాలు ఇలాగే కొనసాగితే తాను అవిశ్వాస తీర్మానం పెడతామని బీజేపీ ప్రకటించింది. మాజీ ముఖ్యమంత్రి బస్వారాజ్ బొమ్మై మాట్లాడుతూ.. ‘‘డిసెంబర్ 8 వరకూ సమయం ఉంది. ఈ పరిస్థితి ఇలాగే కొనసాగితే అవిశ్వాస తీర్మానం ప్రవేశపెట్టవచ్చు’’ అన్నారు.