సిద్ధరామయ్య పూర్తి పదవీకాలంపై ఆత్మవిశ్వాసం..

తన ప్రభుత్వం ఐదేళ్ల పూర్తి పదవీకాలం కొనసాగుతుందన్న కర్ణాటక (Karnataka) ముఖ్యమంత్రి సిద్ధరామయ్య(CM Siddaramaiah) ఆత్మవిశ్వాసాన్ని వ్యక్తం చేశారు. తన నాయకత్వంలో కాంగ్రెస్(Congress) ప్రభుత్వం స్థిరంగా కొనసాగుతుందని స్పష్టం చేశారు. ఈ వ్యాఖ్యలపై ఉప ముఖ్యమంత్రి డీకే శివకుమార్ స్పందించారు. “గుడ్ లక్” అంటూ సిద్ధరామయ్యకు శుభాకాంక్షలు తెలిపారు.

మీడియాతో సిద్ధరామయ్య మాట్లాడుతూ ..ముఖ్యమంత్రి మార్పుపై జరుగుతున్న ఊహాగానాలకు ప్రాధాన్యం లేదన్నారు. ప్రభుత్వం పూర్తి కాలం కొనసాగుతుందన్న నమ్మకం తనకు ఉందని చెప్పారు. అయితే ముఖ్యమంత్రి పదవిపై తుది నిర్ణయం కాంగ్రెస్ హైకమాండ్‌దేనని కూడా ఆయన స్పష్టం చేశారు.

ఈ సందర్భంగా డీకే శివకుమార్ మాట్లాడుతూ.. సిద్ధరామయ్య ప్రభుత్వానికి శుభాకాంక్షలు తెలిపారు. సీఎం పూర్తి కాలం కొనసాగుతానన్న మాటలపై “గుడ్ లక్” అంటూ సంక్షిప్తంగా స్పందించారు. కాంగ్రెస్‌లో ఎలాంటి అంతర్గత విభేదాలు లేవని, మీడియా ఊహాగానాలే ఎక్కువగా కనిపిస్తున్నాయని ఆయన వ్యాఖ్యానించారు.

సిద్ధరామయ్య ముఖ్యమంత్రిగా 2,792 రోజులు పూర్తి చేసిన సందర్భంగా గతంలో కర్ణాటకకు సేవలందించిన డేవరాజ్ ఉర్స్‌ను గుర్తుచేసుకుంటూ ఈ వ్యాఖ్యలు చేశారు. కాంగ్రెస్ ప్రభుత్వం ప్రజల మద్దతుతో ముందుకు సాగుతోందని ఆయన అన్నారు.

ఇటీవల కాంగ్రెస్‌లో ముఖ్యమంత్రి పదవిపై మార్పు ఉండొచ్చన్న ప్రచారం రాజకీయ వర్గాల్లో చర్చనీయాంశంగా మారినప్పటికీ.. సిద్ధరామయ్య, శివకుమార్ ఇద్దరూ ఆ ప్రచారాన్ని ఖండించారు. ప్రభుత్వం స్థిరంగానే కొనసాగుతుందని, పాలనపై పూర్తి దృష్టి పెట్టామని కాంగ్రెస్ నేతలు స్పష్టం చేశారు.