రాయలసీమకు ఎల్లో అలర్ట్
బంగాళాఖాతంలో అల్పపీడనం ఏర్పాడటం వల్ల ఏపీలోని పలు ప్రాంతాల్లో మోస్తరు నుంచి భారీ వర్షాలు కురిసే అవకాశం ఉంది.
మలక్కా జలసంధి-దక్షిణ అండమాన్ సముద్రం మధ్య అల్పపీడనం ఏర్పడినట్లు భారత వాతావరణ శాఖ (IMD) శనివారం (22 నవంబర్ 2025) ప్రకటించింది. ఈ అల్పపీడనం పశ్చిమ-వాయువ్య దిశగా ప్రయాణించి, నవంబర్ 24న ఆగ్నేయ బంగాళాఖాతంలో వాయుగుండంగా మారే అవకాశం ఉందని వాతావరణ శాఖ అధికారులు అంచనా వేశారు. ఇలా మారిన వాయుగుండం మరింత బలపడి డిప్రెషన్‌గా మారే సూచనలు ఉన్నాయని, దీని ప్రభావంతో దక్షిణ తీర ప్రాంతాల్లో భారీ వర్షాలు కురిసే అవకాశం ఉందని తెలిపారు. అండమాన్ & నికోబార్ దీవుల్లో ఇప్పటికే తీవ్ర వర్షాలు, ఈదురుగాలులు, 40-50 కి.మీ.వేగంతో గాలులు వీచుతున్నాయి.
ఈ అల్పపీడనం ప్రభావంతో కోస్తా ఆంధ్ర, రాయలసీమ జిల్లాలకు IMD ఎల్లో అలర్ట్ జారీ చేసింది. తమిళనాడు, కేరళ, పుదుచ్చేరి ప్రాంతాల్లో కూడా భారీ నుంచి అతి భారీ వర్షాలు, మెరుపులు, గాలి తుఫానులు 21 నుంచి 26 నవంబర్ వరకు కొనసాగనున్నాయి. ఏపీలో దక్షిణ కోస్తా (నెల్లూరు, తిరుపతి, చిత్తూరు) , రాయలసీమ (అన్నమయ్య, కడప) జిల్లాల్లో తేలికపాటి నుంచి మోస్తరు వర్షాలు 48 గంటల్లో (22-24 నవంబర్) కురిసే అవకాశం ఉంది. అండమాన్ సముద్రంలో 45-55 కి.మీ.వేగంతో గాలులు, తీర ప్రాంతాల్లో మెరుపులతో వర్షాలు కురిసే అవకాశాలు ఉన్నాయి. లోతట్టు ప్రాంతాలు నీటమునిగే ప్రమాదం ఉందని అధికారులు హెచ్చరించారు.
రైతులు, ప్రజలు అప్రమత్తంగా ఉండాలని APSDMA సూచించింది. వరి, పత్తి, మిర్చి పంటల కోతలు వేగవంతం చేసుకోవాలి, కోసిన ధాన్యాన్ని సురక్షిత స్థలాలకు తరలించాలి. మత్స్యకారులు సముద్రం వైపు వెళ్లొద్దని, ఓడరేవులు, బీచ్‌ల వద్ద జాగ్రత్తలు పాటించాలని IMD ఆదేశించింది. అత్యవసర సమాచారం కోసం 112, 1070 టోల్‌ఫ్రీ నంబర్లు సంప్రదించాలని సూచించారు.
