రాజధాని రైతు రామారావు చావుకు కారకులెవరు?

డిసెంబర్ 26, 2025న మందడం గ్రామంలో మున్సిపల్ శాఖ మంత్రి పి. నారాయణ నిర్వహించిన సమావేశంలో తన ఆవేదన వెళ్లబోసుకుంటూ మాట్లాడుతుండగా, మందడం గ్రామానికి చెందిన 68 ఏళ్ల రైతు దొండపాటి రామారావు (రాములు అలియాస్ రామారావు) ఒక్కసారిగా కుప్పకూలి గుండెపోటుతో మరణించారు. ఆయనకు వెంటనే CPR ఇచ్చి మంత్రి కాన్వాయ్ వాహనంలో ఆస్పత్రికి తరలించినా, చేరేలోపే ప్రాణం విడిచారు. ఈ ఘటన అమరావతి రైతుల ఇంకా పరిష్కారం కాని సమస్యలను, ప్రభుత్వం వారిపైన పెడుతున్న మానసిక ఒత్తిడిని మరోసారి తెరపైకి తెచ్చింది.

ఘటన నేపథ్యం, రామారావు ఆవేదన

రామారావు అమరావతి ల్యాండ్ పూలింగ్ స్కీమ్ (LPS)లో భూమి ఇచ్చిన రైతుల్లో ఒకరు. రోడ్ల నిర్మాణం వల్ల ఇళ్లు, భూములు కోల్పోతున్న బాధితులతో జరిగిన సమావేశంలో ఆయన మంత్రి నారాయణ ఎదుట మాట్లాడారు. "ముక్కలు ముక్కలుగా ప్లాట్లు ఇస్తున్నారు. వాగులో పడే చోట భూమి ఇచ్చారు. సీడ్ యాక్సెస్ రోడ్ సమీపంలో మంచి ప్లాట్లు ఇవ్వండి" అంటూ డిమాండ్ చేశారు. ఈ ఉద్వేగంలోనే ఆయన కుప్పకూలారు. రామారావు కుటుంబ సభ్యులు, స్థానిక రైతులు ఈ మరణానికి ప్రభుత్వం చేస్తున్న జాప్యం, అన్యాయమే కారకమని ఆరోపించారు. కేంద్ర మంత్రి పెమ్మసాని చంద్రశేఖర్, ఎమ్మెల్యే తెనాలి శ్రవణ్ కుమార్ నివాళులర్పించేందుకు వచ్చినప్పుడు కూడా రైతులు "ఇంకా ఎంతమందిని చంపుతారు?" అంటూ నిలదీశారు.

ప్రస్తుత పరిణామాలు..రైతుల అసంతృప్తి

NDA కూటమి ప్రభుత్వం అమరావతిని ఏకైక రాజధానిగా అభివృద్ధి చేస్తున్న నేపథ్యంలో రెండో విడత ల్యాండ్ పూలింగ్ (LPS 2.0) ప్రక్రియ సాగుతోంది. వరల్డ్ బ్యాంక్ నుంచి నిధులు విడుదలవుతున్నాయి. కేంద్రం చట్టసవరణలతో అమరావతికి అధికారిక హోదా ఇస్తోంది. అయినప్పటికీ, మొదటి దశలో భూమి ఇచ్చిన రైతులకు రిటర్నబుల్ ప్లాట్లు సరిగా రిజిస్టర్ కాకపోవడం, మంచి లొకేషన్లలో కాకుండా వాగులు, తడి ప్రాంతాల్లో ప్లాట్లు ఇవ్వడం, యాన్యుటీలు పెండింగ్ ఉండటం వంటి సమస్యలు ఇంకా పరిష్కారం కాలేదు. త్రిసభ్య కమిటీ (పెమ్మసాని, నారాయణ, శ్రవణ్) సమావేశాలు జరుపుతున్నా, జాప్యం వల్ల రైతుల్లో ఆవేదన పెరిగింది. ఈ వాతావరణం రైతుల్లో రోజు రోజుకు పెరుగుతోంది.

ప్రతిపక్షాల ఆరోపణలు

ప్రభుత్వం హామీలు నెరవేర్చకపోవడం, రైతులను మోసం చేయడం వల్లే మనోవేదన పెరిగి రామారావు మరణించారని YSRCP, CPI(M) ఆరోపించాయి. "ప్రభుత్వ నిర్లక్ష్యం, జాప్యం రైతులను చంపుతోంది" అంటూ రెండో దశ పూలింగ్ ఆపాలని డిమాండ్ చేశాయి.

ప్రభుత్వ వాదన:

ఇది అనుకోని విషాదం అని, రైతుల సమస్యలు దశలవారీగా పరిష్కరిస్తున్నామని చెబుతోంది. మంత్రి నారాయణ సమావేశం రైతుల గోడు వినేందుకే నిర్వహించామని స్పష్టం చేశారు.

రైతులు, కుటుంబ సభ్యుల భావన:

"హామీలు నెరవేరకపోవడం, అన్యాయమే" కారణమని ఆరోపిస్తున్నారు. కొందరు ఎమ్మెల్యే శ్రవణ్ ప్రవర్తనపై కూడా అసంతృప్తి వ్యక్తం చేశారు. మత్తమ్మీద ఈ ఘటన అమరావతి రైతుల 11 ఏళ్ల త్యాగం, ఆశలకు ప్రతీకగా మారింది. ప్రభుత్వం వేగంగా సమస్యలు పరిష్కరిస్తేనే మరిన్ని విషాదాలు నివారించవచ్చని విశ్లేషకులు అంటున్నారు.