తెలంగాణ– ఆంధ్రప్రదేశ్ విభజన సమస్యలు ఎప్పటికి పరిష్కారం అవుతాయో
ఎన్నికల ఫలితాల అనంతరం ఇరువురు సీఎంలు సమావేశం అయ్యారు. తాజాగా ఇరు రాష్ట్రాల సీఎస్‌లు భేటీ అయ్యారు.
ఆంధ్రప్రదేశ్, తెలంగాణ రాష్ట్రాల మధ్య ఉన్న ఉమ్మడి ఆస్తుల సమస్యలు ఎప్పటికి పరిష్కారం అవుతాయి, విభజన చట్టంలోని సమస్యల పరిష్కారానికి ఎప్పటికి ఫుల్‌ స్టాప్‌ పడుతుంది అనేది మిల్లియన్‌ డాలర్ల ప్రశ్నగా మారింది. రాష్ట్ర విభజన జరిగి పది సంవత్సరాలు పూర్తి అయ్యాయి. సరిగ్గ జూన్‌2 నాటికి పదేళ్ల విలువైన సమయం కాల గర్భంలో కలిసి పోయింది. ప్రస్తుతం 11వ సంవత్సరం జరుగుతోంది. మూడు సార్లు సార్వత్రి ఎన్నికలు జరిగాయి. మూడు ప్రభుత్వాలు మారాయి. కానీ విభజన సమస్యలు నేటికీ కొలిక్కి రాలేదు. ఎక్కడేసిన గొంగళి అక్కడే అన్న చందంగా మారింది. దీనికి ఇరు రాష్ట్ర ప్రభుత్వాలతో పాటు కేంద్ర ప్రభుత్వ అలసత్వం కూడా ఉంది. సమస్యలు పరిష్కరించుకునేందుకు తెలంగాణ, ఆంధ్రప్రదేశ్ ప్రభుత్వాలు ముందుకు రాకపోవడం, కేంద్రంలోని మోడీ ప్రభుత్వం చొరవ తీసుకోక పోవడంతో ఈ సమస్యలు నేటికీ పరిష్కారం కాలేదు.
ఇటీవల జరిగిన ఎన్నికల్లో తెలంగాణలో కాంగ్రెస్‌ ప్రభుత్వం అధికారంలోకి రావడం, టీడీపీలో రాజకీయ పురుడు పోసుకున్న రేవంత్‌రెడ్డి సీఎం కావడం, ఏపీలో కూటమి ప్రభుత్వం అధికారంలోకి రావడం, సీఎంగా చంద్రబాబు నాయుడు నాలుగో సారి కుర్చీలో కూర్చోవడం, ఇరువురి మధ్య గురు శిష్యుల సంబంధం ఉండటంతో ఇటీవల భేటీ అయ్యారు. ప్రభుత్వం కొలువు దీరిన కొత్తలో అంటే జూలై 5న సీఎంలు ఇద్దరు సమావేశం అయ్యారు. అవుట్‌ పుట్‌ పెద్దగా కనిపించక పోయినా.. ఇరు రాష్ట్రల సమస్యలు పరిష్కారం అవుతాయనే నమ్మకం ఏర్పడింది. తాజాగా ఇరు రాష్ట్రాల ప్రభుత్వ ప్రధాన కార్యదర్శుల భేటీ కావడంతో ఆ నమ్మకం కాస్త బలపడింది. మంగళగిరిలోని ఏపీఐఐసీ కార్యాలయంలో భేటీ అయిన ఇరు రాష్ట్రాల సీఎస్‌లు విభజన చట్టంలోని 9, 10వ షెడ్యూల్‌లోని సంస్థల ఆస్తు పంపకాలపై ప్రధానంగా చర్చిస్తున్నారు. విద్యుత్‌ బకాయిలు, ఉమ్మడి సంస్థల ఖర్చులను తిరిగి చెల్లించే అంశంపైన చర్చిస్తున్నారు. విభజన పూర్తి కాని పలు సంస్థలకు చెందిన నగదు నిల్వలపైన చర్చలు సాగుతున్నాయి. పంపకాలు కాకుండా నిలిచిపోయిన రూ. 8వేల కోట్ల అంశంపైన చర్చిస్తున్నట్లు తెలిసింది. నేటికైనా ఓ కొలిక్కి వస్తాయా అనేది ఆసక్తిగా మారింది.
Next Story
