రెండు జంటలను కలిపిన జేసీబీ

అసలేం జరిగిందంటే..

గురువారం ఉదయం 10 గంటలకు చినగంజాంలో అద్దంకి శ్రీనివాసులు, విజయల కుమార్తె దుర్గ వివాహం జరగాల్సి ఉంది. అదే గ్రామానికి చెందిన ఆత్మకూరి వెంకటేశ్వర్లు, అరుణ దంపతుల కుమార్తె అంజలి వివాహం సింగరాయకొండ మండలం పాతసింగరాయకొండ వరాహాలక్ష్మీ నరసింహస్వామి దేవస్థానంలో మధ్యాహ్నం 12 గంటలకు సుధాకర్‌తో జరగాల్సి ఉంది. కానీ బుధవారం సాయంత్రం నుంచి ముసి వాగు ఉగ్రరూపం దాల్చడంతో గ్రామస్తులు బయటకు అడుగు పెట్టలేని పరిస్థితులు నెలకొన్నాయి.

ఒక వైపు ముంథా తుపాను వల్ల కురుస్తున్న వర్షాలు, మరో వైపు ముహూర్తాల సమయం దగ్గరపడుతుండటంతో రెండు కుటుంబాలకు దిక్కుతోచలేదు. ఏమి చేయాలో అర్థం కాక రెండు కుటుంబాలు అధికారులను ఆశ్రయించారు. సమస్య వివరించారు. స్పందించిన జరుగుమల్లి మండల అధికారులు, పోలీసులు తక్షణమే చర్యలు చేపట్టారు. ఎలాగైనా వివాహాలు జరిపించి కుటుంబాలను కలపాలని నిశ్చయించుకున్నారు. అందుకోసం మంచి ప్లాన్ వేశారు. జేసీబీలతో పెళ్లికుతుళ్లను, కుటుంబ సభ్యులను వరదలు దాటించి ముహూర్తాలకు అందించారు. దీంతో వారి ఆనందానికి హద్దుల్లేకుండా పోయింది. సంతోషంగా రెండు పెళ్లిళ్లు జరుపుకున్నారు. మరో వైపు నిండు మనసుతో పోలీసులు, అధికారులు చూపిన చొరవకు రెండు కుటుంబాలు చేతులెత్తి మొక్కారు. ఆపద కాలంలో ఆదుకున్న అధికారులపై ప్రశంసల జల్లు కురిపిస్తున్నారు.