పొట్టకూటి కోసం వెళ్లి ప్రాణాలు పోగొట్టుకున్న 17 ఏళ్ల కళాకారిణి

రాజోలు మండలం శివకోటి ముసలమ్మతల్లి అమ్మవారి ఉత్సవాల ప్రారంభం సందర్భంగా భక్తులను అలరించేందుకు రాజమహేంద్రవరం నుంచి పలువురు కళాకారులు శివకోటి చేరుకున్నారు. వేషధారణలు వేసుకోవడం కోసం వీరంతా ఆలయానికి ఎదురుగా ఉన్న మూడు అంతస్తుల కల్యాణ మండప భవనంలోకి వెళ్లారు. గురువారం తెల్లవారుజామున భవ్యశ్రీ అనే కళాకారిణి మెట్లు దిగుతుండగా ప్రమాదవశాత్తు జారి కింద పడింది. ఈ ప్రమాదంలో ఆమె తలకు బలమైన గాయం కావడంతో తీవ్ర రక్తస్రావమైంది. వెంటనే తోటి కళాకారులు ఆమెను రాజోలు ప్రభుత్వ ఆసుపత్రికి తరలించారు. అయితే, అప్పటికే భవ్యశ్రీ మృతి చెందినట్లు వైద్యులు ధ్రువీకరించారు. దీంతో భవ్యశ్రీ కుటుంబంలో తీవ్ర విషాదం నెలకొంది. చేతికి అందొచ్చిన కుమార్తె కళ్లముందే విగతజీవిగా మారడంతో భవ్యశ్రీ తల్లి చినపాప ఆసుపత్రి వద్ద గుండెలు బాదుకుంటూ రోదించిన తీరు తోటి కళాకారులను, భక్తులను, స్థానికులను కలచివేసింది.

ఈ ప్రమాదానికి ఉత్సవ కమిటీ నిర్లక్ష్యమే కారణమని సహచర కళాకారులు, స్థానికులు మండిపడుతున్నారు. కళాకారుల కోసం అసంపూర్తిగా ఉన్న భవనంలో బస ఏర్పాటు చేయడంపై వారు ఆగ్రహం వ్యక్తం చేశారు. కనీసం మెట్లకు రెయిలింగ్ కూడా లేకపోవడం వల్లే భవ్యశ్రీ జారిపడిందని, అదే రెయిలింగ్ ఉంటే ఈ ప్రమాదం తప్పేదని వారు వాపోతున్నారు. మృతురాలి బంధువుల ఫిర్యాదు మేరకు రాజోలు ఎస్సై రాజేష్‌కుమార్‌ కేసు నమోదు చేశారు. యువతి మృతదేహానికి పోస్టుమార్టం నిర్వహించి దర్యాప్తు జరుపుతున్నట్లు పోలీసులు తెలిపారు. వేడుకల కోసం వచ్చి ఒక యువ కళాకారిణి ఇలా అర్ధాంతరంగా తనువు చాలించడం శివకోటి గ్రామంలో విషాద ఛాయలు నింపింది.