ఆంధ్రలో పిడుగుపాటు హెచ్చరిక

గత వారం కురిసిన పిడుగుపాటు వర్షాలకు ఆంధ్రప్రదేశ్‌లోని పలు ప్రాంతాల్లో దాదాపు 10 మంది మరణించారు. పిడుగులు పడటంతో పాటు ఈదురు గాలులకు చెట్లు పడి వీరు మరణించారు. బాపట్ల జిల్లాలో ఇద్దరు, ప్రకాశం జిల్లాలో ఇద్దరు, ఏలూరు జిల్లాలో ఒకరు, తిరుపతి జిల్లాలో నలుగురు, నెల్లూరు జిల్లాలో ఒకరు ప్రాణాలు పోగొట్టుకున్నారు. ఆదివారం, సోమవారం కురిసిన ఈ అకాల వర్షాల్లో పెద్ద ఎత్తున, వరి, అరటి, మామిడి, మొక్క జొన్న వంటి పలు పంటలతో పాటు పలు హార్టీ కల్చర్‌ పంటలు కూడా దెబ్బతిన్నాయి. 2,224 హెక్టార్లలో వరి పంట, 138 హెక్టార్లలో ఉద్యాన పంటలకు నష్టం వాటిల్లింది.

ఇదిలా ఉంటే మరో వైపు రాష్ట్రంలోని పలు ప్రాంతాల్లో వడగాలులు వీచనున్నాయి. గురువారం ఒక మండలంలోను, శుక్రవారం 15 మండలాల్లో తీవ్ర వడగాలులు, మరో 28 మండలాల్లో వడగాలులు వీచే అవకాశం ఉందని ఏపీ రాష్ట్ర విపత్తుల నిర్వహణ సంస్థ ఎండీ రోణంకి కూర్మనాథ్‌ బుధవారం తెలిపారు.