ఊబిలో చిక్కుకుని ముగ్గురు ఎంబీఏ విద్యార్థులు మృతి

రాజంపేట మండలం తాళ్లపాక పంచాయతీ పరిధిలోని న్యూ బోయనపల్లిలోని అన్నమాచార్య యూనివర్శిటీలో ఎంబీఏ ద్వితీయ సంవత్సరం చదువుతున్న ఎనిమిది మంది విద్యార్థులు సరదా ఈత కోసం రాజంపేట మండలం బాలరాజుపల్లికి సమీపంలోని చెయ్యేరు నదికి వెళ్లారు. ఎగువ ప్రాంతాల్లో కురిసిన వర్షాలతో చెయ్యేరుకు వరద నీరు వచ్చింది. ఈ వరద నీటిలో ఈత కొట్టేందుకు ఈ విద్యార్థులు వెళ్లారు. చెయ్యేరులో ఊబి ఎక్కువుగా ఉండటంతో ఈతకు దిగిన ఎనిమిది మంది విద్యార్థుల్లో ముగ్గురు విద్యార్థులు ఆ ఊబిలో ఇరుక్కుని మృత్యువాత పడ్డారు.

దీంతో అన్నమాచార్య యూనివర్శిటీలో విషాదం నెలకొంది. సమాచారం అందుకున్న పోలీసులు ఘటనా స్థలానికి చేరుకుని వివరాలు సేకరించారు. మృతులను రాజంపేటకు చెందిన దిలీప్‌ మణికుమార్, ఒంటిమిట్టకు చెందిన కొత్తూరు చంద్రశేఖర్‌రెడ్డి, పోరుమామిళ్లకు చెందిన పీ కేశవలుగా పోలీసులు గుర్తించారు. దీంతో మృతి చెందిన విద్యార్థుల కుటుంబాల్లో తీవ్ర విషాదం నెలకొంది. చేతికొచ్చిన కొడుకులు మరణించడంతో వారి తల్లిదండ్రులు, కుటుంబ సభ్యులు కన్నీరుమున్నీరవుతున్నారు. ఈ ఘటనతో చుట్టుపక్కల ప్రాంతాల్లో కూడా తీవ్ర విషాదం అలముకుంది.