మితిమీరిన వేగం ముగ్గురు మిత్రులను మింగేసింది

స్థానికుల కథనం ప్రకారం.. ముగ్గురు యువకులు ఒకే బైక్‌పై అతివేగంగా వెళ్తూ సూరప్పగూడెం ఫ్లైఓవర్ వద్దకు రాగానే ఒక్కసారిగా వాహనంపై నియంత్రణ కోల్పోయారు. దీంతో బైక్ ఫ్లైఓవర్‌ను బలంగా ఢీకొట్టింది. ప్రమాద తీవ్రత ఎక్కువగా ఉండటంతో ముగ్గురు యువకులకు తీవ్ర రక్తస్రావమై ఘటన స్థలంలోనే మృతి చెందారు. మృతులంతా ద్వారకా తిరుమల ప్రాంతానికి చెందిన వారుగా గుర్తించారు.

స్థానికుల సమాచారంతో భీమడోలు పోలీసులు వెంటనే ఘటనా స్థలానికి చేరుకున్నారు. మృతదేహాలను పరిశీలించిన అనంతరం పోస్టుమార్టం నిమిత్తం ఆసుపత్రికి తరలించారు. మృతుల పూర్తి వివరాలు, వారి కుటుంబ నేపథ్యం గురించి పోలీసులు ఆరా తీస్తున్నారు. మితిమీరిన వేగమే ఈ ప్రమాదానికి ప్రధాన కారణమని ప్రాథమికంగా భావిస్తున్నారు.

స్థానికుల ఆందోళన

సూరప్పగూడెం ఫ్లైఓవర్ వద్ద తరచుగా ఇటువంటి ప్రమాదాలు జరుగుతున్నాయని స్థానికులు ఆందోళన వ్యక్తం చేస్తున్నారు. అధికారులు స్పందించి ప్రమాదాల నివారణకు తగిన చర్యలు తీసుకోవాలని కోరుతున్నారు. ఈ ఘటనతో మృతుల స్వగ్రామమైన ద్వారకా తిరుమల ప్రాంతంలో విషాద ఛాయలు అలముకున్నాయి.