అక్కడ ఆగలేదంటారు.. ఇక్కడ ఆగిపోయిందంటారు!

ఏడాది, రెండేళ్లు కాదు.. దాదాపు నాలుగున్నరేళ్ల నుంచి విశాఖ స్టీల్‌ ప్లాంట్‌ ప్రైవేటీకరణ చేయాలన్న కేంద్ర ప్రభుత్వ నిర్ణయానికి వ్యతిరేకంగా ఆందోళనలు, ఉద్యమాలు కొనసాగుతున్నాయి. ఉక్కు కార్మికులు, ప్రజా సంఘాలు, కూటమి మినహా ఇతర రాజకీయ పార్టీలు నిరసనలు చేపడుతున్నాయి. ఎన్నికల ముందు కూటమి నేతలు ప్లాంట్‌ ప్రైవేటీకరణను వ్యతిరేకిస్తూ సభలూ సమావేశాల్లో పాల్గొన్నారు. తాము అధికారంలోకి వస్తే ప్రైవేటీకరణ జరగనీయబోమని ఉపన్యాసాలు దంచారు. కూటమి అధికారంలోకి వచ్చాక వీరు కుంటిసాకులు వెతుకుతున్నారు. లాజిక్కులు మాట్లాడుతున్నారు. పైగా రాష్ట్రంలో కూటమి పాలనా పగ్గాలు చేపట్టాక కేంద్ర ప్రభుత్వం ప్రైవేటీకరణ ప్రక్రియను మరింత వేగవంతం చేసింది. శాశ్వత, కాంట్రాక్టు ఉద్యోగులు/కార్మికులను తొలగించడం, ప్లాంట్‌లో కీలకమైన విభాగాలను ప్రైవేటుకు అప్పగించడం వంటి దూకుడు చర్యలు చేపట్టింది. ఇంత జరుగుతున్నా అది ప్రైవేటీకరణలోకి రాదంటూ కూటమి నేతలు బుకాయిస్తున్నారు. జనవరిలో కేంద్రం రూ.11,440 కోట్ల రివైవల్‌ ప్యాకేజీ ఇవ్వడమే ఘనకార్యంగా చెప్పుకుంటున్నారు. ఆ సొమ్ముతోనే ప్రైవేటీకరణ ఆగిపోయినట్టుగా హడావుడి చేస్తున్నారు. ఆ తర్వాత కూటమి నేతలు స్టీల్‌ ప్లాంట్‌ ప్రైవేటీకరణను అడ్డుకున్నామని ఎవరికి వారే ప్రకటించుకుంటున్నారు. ముఖ్యమంత్రి చంద్రబాబు వల్లే ఉక్కు ప్రైవేటీకరణ ఆగిందని ఆయన తనయుడు, మంత్రులు పదేపదే వల్లె వేస్తున్నారు. జనసేన అధినేత పవన్‌ కల్యాణ్, ఆయన ఎమ్మెల్యేలు తమ వల్లే ఆగిపోయిందని చెప్పుకుంటున్నారు. బీజేపీ నేతలు కూడా ప్రైవేటీకరణకు బ్రేకులు వేశామని చెబుతున్నారు.