మంచి చెప్పాడని పిల్లల ముందే చంపేశారు
రాష్ట్ర వాప్తంగా కలకలం రేపుతున్న నెల్లూరులో సీపీఎం నాయకుడు కొట్టివిడి పెంచలయ్య దారుణ హత్య.
శ్రీ పొట్టి శ్రీరాములు నెల్లూరు జిల్లా కేంద్రంలో శుక్రవారం (నవంబర్ 28) ఉదయం దారుణ హత్యాకాండ జరిగింది. సీపీఎం నాయకుడు కొట్టివిడి పెంచలయ్య (38)ను తొమ్మిది మంది దుండగులు పిల్లల కళ్లెదుటే వెంటాడి, కత్తులతో పొడిచి హత్య చేశారు. ఈ ఘటన నెల్లూరులోనే కాకుండా రాష్ట్ర వ్యాప్తంగా తీవ్ర కలకలం రేపింది.
అసలేం జరిగిందింటే..
పెంచలయ్య నెల్లూరు రూరల్ పరిధిలోని కల్లూరుపల్లి ఆర్‌డీటీ కాలనీ నివాసి. ముత్యాలమ్మ గ్రామాభివృద్ధి కమిటీ ట్రెజరర్‌గా, సీపీఎం నాయకుడిగా ఉన్నాడు. ఎలక్ట్రీషియన్‌గా పని చేసుకుంటూ జీవనం సాగిస్తున్నాడు. అతనికి భార్య, ఇద్దరు చిన్న పిల్లలు ఉన్నారు. కాలనీలో గంజాయి వ్యాపారం, దొంగతనాలు, అసాంఘిక కార్యకలాపాలు జరుగుతున్నాయని గుర్తించిన పెంచలయ్య వాటిని అడ్డుకునేందుకు ముందుకు వచ్చాడు. కాలనీ వాసుల మద్ధతుతో వాటిని అరికట్టేందుకు నడుం బిగించాడు. కాలనీలో మంచిని పెంపోందించేందుకు శ్రీకారం చుట్టాడు. అందులో భాగంగా కాలనీకి చెందిన ఆరవ కామాక్షి అనే మహిళ నేరచరితులకు ఆశ్రయం ఇస్తూ, దొంగతనాలు చేయిస్తుందని గమనించి ఆమెను హెచ్చరించాడు. గంజాయి విక్రయిస్తున్న యువకులను చైతన్యవంతం చేసి, పోలీసులకు సమాచారం అందించి విక్రయాలను ఆపించాడు. దీంతో కామాక్షి చీకటి వ్యాపారానికి గండి పడింది. దీంతో ఆమెతో పాటు తన చీకటి బిజినెస్ లో భాగస్వాములుగా ఉన్న యువకులు పెంచలయ్యపై కక్ష పెంచుకున్నారు. దీంతో పెంచలయ్యను చంపేందుకు ప్లాన్ చేశారు. దానిని అమలు చేసేందుకు అదును కోసం ఎదురు చూశారు.
శుక్రవారం ఉదయం 8 గంటల ప్రాంతంలో పెంచలయ్య ఇద్దరు చిన్న పిల్లలతో స్కూటీపై ఇంటి నుంచి బయటకు వెళుతుండగా చంపాలని నిర్ణయించుకున్నారు. ముందుగా వేసుకున్న పథకం ప్రకారం హౌసింగ్ బోర్డు ఆర్చ్‌ సమీపంలో తొమ్మిది మంది దుండగులు పెంచలయ్యను అడ్డుకున్నారు. ఒక్కసారిగా కత్తులు, కొడవలు తీసుకుని పెంచలయ్యను వెంటాడి, పలు చోట్ల పొడిచి పరారయ్యారు. పిల్లల కళ్లెదుటే జరిగిన ఈ దాడిలో పెంచలయ్య అక్కడికక్కడే ప్రాణాలు కోల్పోయాడు.
స్థానికులు వెంటనే పెంచలయ్యను ఆస్పత్రికి తరలించారు. అయితే, అప్పటికే అతడు మృతి చెందినట్లు వైద్యులు నిర్ధారించారు. నెల్లూరు రూరల్ డీఎస్పీ శ్రీనివాసరావు, సీఐ వేణు, ఎస్ఐ లక్ష్మణ్ ఘటనాస్థలానికి చేరుకుని పరిశీలించారు. మృతదేహాన్ని పోస్ట్‌మార్టమ్ నిమిత్తం తరలించారు. పోలీసులు తెలిపిన వివరాల మేరకు, ఆరవ కామాక్షి కుట్ర పన్ని, తన బంధువులు, గంజాయి వ్యాపారులతో కలిసి ఈ హత్యకు పాల్పడినట్లు ప్రాథమిక దర్యాప్తులో తేలింది. నిందితులను గుర్తించి త్వరలో అరెస్టు చేస్తామని డీఎస్పీ శ్రీనివాసరావు హామీ ఇచ్చారు. సీపీఎం రాష్ట్ర, జిల్లా నాయకత్వం ఈ హత్యను తీవ్రంగా ఖండించింది. “సామాజిక బాధ్యతతో అక్రమాలను అడ్డుకున్నందుకు ఒక కార్యకర్తను కిరాతకంగా చంపారు. నిందితులను వెంటనే అరెస్టు చేసి కఠిన శిక్ష విధించాలి” అని డిమాండ్ చేసింది.
