ఏపీలో జిల్లాల బీజేపీ అధ్యక్షులు వీరే

ఆంధ్రప్రదేశ్‌లో బలం పుంజుకునేందుకు బీజేపీ దృష్టి పెట్టింది. ప్రస్తుతం అధికారంలో ఉన్న కూటమిలో భాగస్వామిగా ఉన్న బీజేపీ తన క్యాడర్‌ను పెంచుకునేందుకు కసరత్తు ముమ్మరం చేసింది. కూటమి భాగస్వామి అయిన తెలుగుదేశం పార్టీ, జనసేనలు గ్రామ స్థాయిలో తమ క్యాడర్‌ను బలోపేతం చేసేందుకు ఇప్పటికే కార్యక్రమాలు చేపట్టారు. అందులో భాగంగా సభ్యత్వ నమోదు కార్యక్రమాలను తెరపైకి తెచ్చారు. తెలుగుదేశం పార్టీ కోటి సభ్యత్వాలను పూర్తి చేసి.. ఏపీలో తమకు తిరుగులేదని కూటమి భాగస్వాములైన జనసేన, బీజేపీలకు హింట్‌ ఇచ్చింది. అయితే జనసేన ఇది వరకే తమ సభ్యత్వ కార్యక్రమాలను చేపట్టినా.. ఆశించిన స్థాయిలో సభ్యత్వ నమోదును పూర్తి చేయలేక పోయారని ఆ పార్టీ పెద్దలు అసంతృప్తిలో ఉన్నట్లు జనసేన శ్రేణుల్లో చర్చ ఉంది. ఈ నేపథ్యంలో కూటమి భాగస్వామి అయిన బీజేపీ తన కేడర్‌ను పెంచుకునే దిశగా అడుగులు వేస్తోంది. బీజేపీ సిస్టర్‌ వింగ్‌ అయిన విశ్వహిందూపరిషత్‌ విజయవాడకు సమీపంలోని గన్నవరంలో ఇటీవల నిర్వహించిన హిందూశంఖారావం సభ సక్సెస్‌ కావడంతో బీజేపీ తమ కార్యక్రమాల దూకుడును పెంచింది.అందులో భాగంగా తొలుత జిల్లాల అధ్యక్షుల ఎంపికను కొలిక్కి తెచ్చింది. ఆ పార్టీ పెద్దలు రాష్ట్రంలోని జిల్లాలకు అధ్యక్షులను నియమించింది. బీజేపీ రాష్ట్ర అధ్యక్షులు, ఎంపీ దగ్గుబాటి పురందేశ్వరి వారికి అభినందనలు తెలిపారు.