జగన్‌ ఇచ్చిన భూములను తిరిగి తీసుకున్న ప్రభుత్వం

ఆంధ్రప్రదేశ్‌ కూటమి ప్రభుత్వం మరో అడుగు ముందుకేసింది. వైఎస్‌ఆర్‌సీపీ ప్రభుత్వ హయాంలో నాటి సీఎం వైఎస్‌ జగన్‌మోహన్‌రెడ్డి విశాఖపట్నం శారద పీఠానికి ఇచ్చిన భూములను తిరిగి వెనక్కు తీసుకుంది. ఆ మేరకు విశాఖపట్నం జిల్లా కలెక్టర్‌ స్పష్టం చేశారు. విశాఖపట్నంలోని పెందుర్తి శారదా పీఠానికి జగన్‌మోహన్‌రెడ్డి సీఎంగా ఉన్నప్పుడు భీమునిపట్నం మండలం కొత్తవలస గ్రామంలో కేటాయించిన 15 ఎకరాల భూములను కూటమి ప్రభుత్వం స్వాధీనం చేసుకుంది. నామమాత్రపు రేట్లకు జగన్‌ ఈ భూములను కేటాయించారని, దీంతో వెనక్కి తీసుకోవాలని కూటమి ప్రభుత్వం నిర్ణయించింది. అందులో భాగంగా భూ కేటాయింపులకు సంబంధించిన ఆర్డర్స్‌ను రద్దు చేసింది. ఆ మేరకు ఉత్తర్వులు కూడా జారీ చేసింది. ఈ నేపథ్యంలో విశాఖపట్నం జిల్లా యంత్రాంగం ఈ అంశంపై దృష్టి సారించింది. ఆ భూములను స్వాధీనం చేసుకునేందుకు రంగం సిద్ధం చేసిన అధికారులు ఆ భూముల్లో హెచ్చరికల బోర్డులు కూడా ఏర్పాటు చేశారు. ఇదే విషయాన్ని విశాఖపట్నం జిల్లా కలెక్టర్‌ హరేంద్రప్రసాద్‌ స్పష్టం చేశారు. భీమునిపట్నం మండలం కొత్తవలస గ్రామ పరిధిలోని సర్వే నంబర్‌లు 102/2లో 7.70 ఎకరాలు, 103లో 7.30 ఎకరాలు కలిపి మొత్తం 15 ఎకరాలను గతంలో జగన్‌మోహన్‌రెడ్డి శారదా పీఠానికి కేటాయించారు. ఇక్కడ భూములు రేట్లు అధికంగానే ఉంటాయి. బహిరంగ మార్కెట్‌లో ఎకరం భూమి దాదాపు రూ. 15 కోట్ల వరకు పలుకుతోంది. ఈ లెక్కన జగన్‌ ఇచ్చిన 15 ఎకరాలకు కలిపి రూ. 225 కోట్ల వరకు ఉంటుంది. అయితే ఈ భూములను అతి తక్కువ ధరలకు జగన్‌ కేటాయించారు. ఎకరం భూమి కేవలం రూ. 1లక్ష చొప్పున 15 ఎకరాలను కలిపి రూ. 15లక్షలకు కేటాయించారు. దీనిని కూటమి ప్రభుత్వం తీవ్రంగా వ్యతిరేకిస్తూ వెనక్కి తీసుకోవాలని నిర్ణయం తీసుకుంది.