విజన్‌ డాక్యుమెంట్‌పై కలెక్టర్లకు సీఎం ఏమి క్లారిటీ ఇస్తారు

2014–19 వరకు అధికారంలో ఉన్నప్పుడు కూడా కలెక్టర్ల కాన్ఫెరెన్స్‌కు అధిక ప్రాధాన్యత ఇచ్చారు. ఈ సారి కూడా క్రమం తప్పకుండా కలెక్టర్ల కాన్ఫెరెన్స్‌లను నిర్వహించేందుకు ప్లాన్‌ చేశారు. అందులో భాగంగా ఇప్పటికే ఒక సారి కలెక్టర్ల కాన్ఫెరెన్స్‌ను నిర్వహించి సీఎం చంద్రబాబు బుధ, గురువారాల్లో రెండు రోజుల పాటు మరో సారి నిర్వహించేందుకు నిర్ణయం తీసుకున్నారు. అమరావతి సచివాలయంలోని ఐదో బ్లాక్‌లో వీటిని ఏర్పాటు చేశారు. స్వర్ణాంధ్ర విజన్‌–47 డాక్యుమెంట్‌పైన కలెక్టర్లకు క్లారిటీ ఇవ్వనున్నారు. కూటమి ప్రభుత్వం ఏర్పడిన తర్వాత ఇప్పటి వరకు చేపట్టిన ప్రజాభివృద్ధి, సంక్షేమ కార్యక్రమాలపై సీఎం చర్చించనున్నారు. దీంతో పాటుగా కూటమి ప్రభుత్వం అధికారం చేపట్టాక తీసుకొచ్చిన నూతన పాలసీలు, వాటి అమలు తీరుపైన కూడా చర్చించనున్నారు. ఆర్జీజీఎస్, గ్రామ, వార్డు సచివాలయాలు, వాట్సాప్‌ గవర్నెన్స్‌పైన చర్చించనున్నారు. వ్యవసాయం, పశుసంవర్థక, ఉద్యాన, పౌరసరఫరాలు, అటవీ, జలవనరులు, పంచాయతీరాజ్, గ్రామీణాభివృద్ధితో పాటు అన్ని శాఖలపైన సమగ్రమైన చర్చించి కలెక్టర్లకు ఒక క్లారిటీ ఇవ్వనున్నారు. దీంతో పాటుగా ఆంధ్రప్రదేశ్‌లో శాంతి భద్రతలపైన కూడా చర్చించి కలెక్టర్లు, ఎస్పీలకు దిశా నిర్థేశం చేయనున్నారు.