తాడిపత్రిలో టెన్షన్ ...టెన్షన్

అనంతపురం జిల్లా తాడిపత్రి లో ఈ ఉదయం ఒక్కసారిగా ఉద్రిక్త పరిస్థితులు నెలకొని పోలీసులను కలవర పెట్టాయి. మాజీ ఎమ్మెల్యే కేతిరెడ్డి పెద్దారెడ్డి ఎలాంటి సమాచారం లేకుండా తాడిపత్రికి రావడంతో టెన్షన్ వాతావరణం నెలకొంది.

అటు జేసీ ప్రభాకర్ రెడ్డి ఇంటికి,ఇటు పెద్దారెడ్డి నివాసానికి వారి అనుచరులు భారీగా చేరుకోవడంతో పట్టణం ఒక్కసారిగా ఉలిక్కిపడింది.తాడిపత్రిలో ఎలాంటి అవాంఛనీయ సంఘటనలు జరగకుండా పోలీసుల భారీ బందోబస్తు ఏర్పాటు చేశారు.మాజీ ఎమ్మెల్యే కేతిరెడ్డి పెద్దారెడ్డి పోలీసుల కళ్లుగప్పి తాడిపత్రిలోని భగత్‌సింగ్ నగర్‌లో ఉన్న తన నివాసానికి చేరుకున్నారు.వెంటనే అక్కడికి చేరుకున్న పోలీసులకు , తాను హైకోర్టు ఆదేశాలతో తన నివాసానికి వచ్చానని కేతిరెడ్డి చెప్పారు. అటు జేసీ ప్రభాకర్ రెడ్డి భారీగా తన అనుచరులతో పెద్దారెడ్డి నివాసంవైపు బయలు దేరడంతో పోలీసులు జోక్యం చేసుకొని మధ్యలో ఆపివేశారు. ఇటు పెద్దారెడ్డిని అదుపులోనికి తీసుకొని అనంతపురం తరలించారు.