భోగాపురానికి మరొక వైభోగం!

విశాఖపట్నం జిల్లా భోగాపురం అంతర్జాతీయ విమానాశ్రయం దిశగా మరో అడుగు ముందుకు పడింది. రాష్ట్రాన్ని ఏవియేషన్, కార్గో, మల్టీ-యూస్ ఇన్‌ఫ్రాస్ట్రక్చర్‌ హబ్‌గా మార్చాలనే సంకల్పంతో ఉన్న కొత్త ప్రభుత్వం కసరత్తు చేస్తోంది. ఇందులో భాగంగా సిటీ సైడ్ డెవలప్‌మెంట్ కోసం 500 ఎకరాల భూమిని కేటాయిస్తూ ఆంధ్రప్రదేశ్ రాష్ట్ర ప్రభుత్వం ఉత్తర్వులు జారీ చేసింది.

ఈ 500 ఎకరాల భూమిని జీవీఐఏఎల్‌ (GMR Visakhapatnam International Airport Ltd) సంస్థకు కేటాయించేందుకు ఇటీవలే రాష్ట్ర క్యాబినెట్ ఆమోదం తెలిపింది. ఇప్పటికే 2023లో మొదటి దశ నిర్మాణ పనులు ప్రారంభమైనప్పటికీ, నిర్మాణ విస్తరణ, వాణిజ్య అవసరాలు, భవిష్యత్ వృద్ధి అవకాశాలను దృష్టిలో ఉంచుకుని ప్రాజెక్ట్‌ను పునఃసమీక్షిస్తున్నది కూటమి ప్రభుత్వం.

భోగాపురం విమానాశ్రయ నిర్మాణానికి మొత్తం 2,703 ఎకరాల భూమి అవసరంగా గుర్తించారు. అయితే గత వైసీపీ ప్రభుత్వ హయాంలో కేవలం 2,203 ఎకరాలకే పరిమితమయ్యారు. ఇప్పుడు మిగిలిన 500 ఎకరాలు కేటాయించడంతో పూర్తి మాస్టర్‌ప్లాన్ అమలుకు అనుకూల వాతావరణం ఏర్పడింది.

భూముల వినియోగ విభజన ఈ విధంగా ఉంది:

విమానాశ్రయ నిర్మాణాన్ని మూడు దశల్లో పూర్తి చేయాలనే లక్ష్యంతో మాస్టర్ ప్లాన్ రూపొందించారు. పూర్తి స్థాయిలో ఈ ప్రాజెక్ట్ అమలైతే, ఏటా 36 మిలియన్ల మంది ప్రయాణికులకు సేవలందించే సామర్థ్యం ఏర్పడనుంది. ఇది విశాఖపట్నం ప్రాంతానికి వ్యాపార, పర్యాటక రంగాల్లో పెద్ద పుష్కరంగా మారే అవకాశాన్ని సృష్టించనుంది.

భోగాపురం ఎయిర్‌పోర్ట్ నిర్మాణం ద్వారా ఉత్తరాంధ్ర ప్రాంత అభివృద్ధికి బలమైన దిక్సూచి ఏర్పడనుంది. విమానాశ్రయం చుట్టూ ఏర్పడే కమర్షియల్ సిటీలతో ఉపాధి అవకాశాలు పెరగనుండగా, ట్రాన్స్పోర్ట్ కనెక్టివిటీ, రియల్ ఎస్టేట్, టూరిజం రంగాలు కొత్త రూపు సంతరించుకోనున్నాయి. విమానాశ్రయం నూతన పారిశ్రామిక పెట్టుబడులకు ద్వారంగా మారే అవకాశమున్నదని పరిశ్రమ వర్గాలు భావిస్తున్నాయి.