శ్రీసిటి నుంచి ఈజిప్ట్‌కు భారీ లిక్విడ్ నైట్రోజన్ ట్యాంక్ ఎగుమతి

ఆంధ్రప్రదేశ్ తిరుపతి జిల్లా లోని శ్రీసిటీ నుంచి జరుగుతున్న ఎగుమతుల్లో ఈ రోజు మరొక రికార్డు నమోదయింది. ఇక్కడి క్రయోజెనిక్ ట్యాంకుల తయారీ సంస్థ USA చార్ట్ ఇండస్ట్రీస్ కు చెందిన వీఆర్వీ ఆసియా పసిఫిక్ ప్రైవేట్ లిమిటెడ్, అత్యాధునిక క్రయోజెనిక్ సాంకేతికతతో తయారైన భారీ లిక్విడ్ నైట్రోజన్ స్టోరేజ్ ట్యాంక్‌ను ఈజిప్ట్‌లోని ప్రముఖ సంస్థ ఎయిర్ లిక్విడ్‌కు ఎగుమతి చేసింది. దీనితో ఎగుమతులకు సంబంధించి శ్రీసిటీ మరో ప్రధాన మైలురాయిని అధిగమించింది. 531 కిలోలీటర్ల సామర్థ్యం, 168 టన్నుల బరువు, సుమారు 39 మీటర్ల పొడవు, 5.45 మీటర్ల వ్యాసం కలిగిన ఈ ట్యాంక్ క్రయోజెనిక్ ఇంజినీరింగ్‌లో అత్యున్నత ప్రమాణాలకు ప్రతీకగా నిలబడుతుంది. ఈ భారీ నిర్మాణాన్ని చెన్నై పోర్ట్‌కు తరలించేందుకు ప్రత్యేక మల్టీ-యాక్సిల్ లాజిస్టిక్స్‌ను వినియోగించారు.