కన్నతల్లిపై కసాయి వేటు!

కొండముది గ్రామానికి చెందిన కొమ్ము జయమ్మ (60) భర్త మూడేళ్ల క్రితం మరణించారు. అప్పటి నుంచి ఆమె తన కుమారుడు నాగరాజుతో కలిసి నివసిస్తోంది. అయితే, నాగరాజు మద్యానికి బానిసై పనిపాటలు మానేసి నిత్యం తాగుతూ ఉండేవాడు. ఈ విషయంలో తల్లి జయమ్మ అతడిని తరచూ మందలించేది. మద్యం తాగొద్దని కొడుకు నాగరాజును వేడుకునేది. శనివారం రాత్రి కూడా ఇలేగే వేడుకుంది. మద్యం ఎందుకు తాగొచ్చావని అడిగింది. మత్తులో ఉన్న నాగరాజు ఆగ్రహంతో ఊగిపోయాడు. ఇంట్లోని రోకలిబండను తీసుకుని తల్లి జయమ్మ తలపై బలంగా బాదాడు. తీవ్ర రక్తస్రావం కావడంతో ఆమె అక్కడిక్కడే ప్రాణాలు విడిచింది.

సమాచారం అందుకున్న గ్రామీణ ఎస్సై శ్రీహరి తన సిబ్బందితో కలిసి ఘటనా స్థలానికి చేరుకుని పరిశీలించారు. మృతదేహాన్ని పోస్టుమార్టం నిమిత్తం తరలించి, నిందితుడు నాగరాజును అదుపులోకి తీసుకున్నారు. పోలీసుల విచారణలో మద్యం మత్తులో తానే తల్లిని హత్య చేసినట్లు నాగరాజు అంగీకరించాడు. పోలీసులు కేసు నమోదు చేసి దర్యాప్తు చేస్తున్నారు.