మెగా ఇంజనీరింగ్‌కు సీవరేజ్ ట్రీట్‌మెంట్ ప్లాంట్లు
మూడు ప్యాకేజీల పనులు చేపట్టేందుకు సీఆర్డీఏ నిర్ణయించింది. ఇందుకోసం రూ.4,000 కోట్లకు పైగా నిధులతో పనులు మొదలు కానున్నాయి.
ఆంధ్రప్రదేశ్ రాజధాని అమరావతి నిర్మాణ ప్రక్రియలో భాగంగా సీవరేజ్ ట్రీట్‌మెంట్ ప్లాంట్లు, వరద నివారణ పంపింగ్ స్టేషన్, క్వాంటం కంప్యూటింగ్ సెంటర్ వంటి కీలక ప్రాజెక్టులకు ఆమోదం లభించింది. సీఆర్డీఏ అథారిటీ తీర్మానాల మేరకు పట్టణాభివృద్ధి శాఖ ముఖ్య కార్యదర్శి సురేష్‌కుమార్ జీవో నెం. 1235, 1234, 1233, 1231లను జారీ చేశారు. ఇందులో మూడు ప్యాకేజీలకు (46, 47, 48) మొత్తం రూ.796 కోట్లు, ప్యాకేజీ 51కు రూ.1,863 కోట్లు, క్వాంటం సెంటర్‌కు రూ.99.62 కోట్లు, రెండో పంపింగ్ స్టేషన్‌కు రూ.595 కోట్లు కేటాయించారు. అంతే కాకుండా నేషనల్ బ్యాంక్ ఫర్ ఫైనాన్స్ ఇన్‌ఫ్రాస్ట్రక్చర్ (నాఫిడ్) నుంచి రూ.7,500 కోట్లు, పవర్ ఫైనాన్స్ కార్పొరేషన్ నుంచి రూ.1,500 కోట్ల రుణాలకు ఆమోదం లభించింది.
వరల్డ్ బ్యాంకు, ఏడీబీ నిధులతో సీవరేజ్ ట్రీట్‌మెంట్ ప్లాంట్లు
ప్రపంచబ్యాంకు, ఎషియన్ డెవలప్‌మెంట్ బ్యాంకు (ఎడిబి) నిధులతో నిర్మించే సీవరేజ్ ట్రీట్‌మెంట్ ప్లాంట్ల (ఎస్టీపీ) పనులను మూడు ప్యాకేజీలుగా విభజించి మెగా ఇంజనీరింగ్ కంపెనీకి అప్పగించారు
ప్యాకేజీ 46 (జోన్ 1,2,3,5,6): రూ.274.76 కోట్లు
ప్యాకేజీ 47 (జోన్ 4,7,8,10): రూ.304 కోట్లు
ప్యాకేజీ 48 (జోన్ 12, 12ఎ): రూ.217 కోట్లు
మొత్తం రూ.795.76 కోట్లతో "4.65 ఎక్సెస్ ఓవర్ ఈసివి" (టెండర్ ధర ప్రభుత్వ అంచనా కంటే 4.65 శాతం ఎక్కువగా ఉంది. ఇది సహేతుకమైన అదనపు ఖర్చుగా ఆమోదం పొందింది.) ప్రకారం టెండర్లు కేటాయించనున్నారు. ఈ ప్లాంట్లు రాజధాని జనాభా పెరుగుదలకు అనుగుణంగా మురుగు నీటి శుద్ధి, పర్యావరణ పరిరక్షణలో కీలక పాత్ర పోషిస్తాయి.
వేస్ట్ వాటర్ ట్రీట్ మెంట్ ప్లాంట్ నమూనా
ప్యాకేజీ 51: రూ.1,863 కోట్లతో భారీ అభివృద్ధి
క్రిష్టాయపాలెం, వెంకటపాలెం, ఉండవల్లి, పెనుమాక పరిధిలోని జోన్ 8లో రోడ్లు, డ్రైనేజీ, నీటి సరఫరా వంటి మౌలిక సదుపాయాలకు రూ.1,863 కోట్లు కేటాయిస్తూ జీవో నెం. 1234 జారీ అయింది. త్వరలో టెండర్లు పిలుస్తారు. ఈ ప్రాంతాలు రాజధాని హృదయ భాగంలో ఉండటంతో, ఈ పనులు నగర అభివృద్ధికి పునాది వేస్తాయి.
క్వాంటం కంప్యూటింగ్ సెంటర్ కు రూ.99.62 కోట్లు
అమరావతిని స్మార్ట్ సిటీగా మార్చేందుకు క్వాంటం కంప్యూటింగ్ సెంటర్ ఏర్పాటుకు రూ.99.62 కోట్లు కేటాయించారు. ఈ మేరకు జీవో నెం. 1233 విడుదలైంది. త్వరలో ఆసక్తి వ్యక్తీకరణ టెండర్లు పిలుస్తారు. సీఆర్డీఏ కమిషనర్‌కు అవసరమైన అధికారాలు కల్పించారు. ఈ సెంటర్ ఏఐ, డేటా సైన్స్, టెక్ ఇన్నోవేషన్‌కు కేంద్రంగా మారనుంది.
క్వాంటం కంప్యూటర్ సెంటర్ నిర్మాణానికి ప్రభుత్వం ఆమోదించిన నమూనా
వరద నీటి రెండో పంపింగ్ స్టేషన్ కు రూ.595 కోట్లు
కృష్ణా నది వరదల నుంచి రాజధానిని కాపాడేందుకు ఉండవల్లి పరిధిలో రెండో పంపింగ్ స్టేషన్ నిర్మాణానికి రూ.595 కోట్లు ఆమోదం తెలుపుతూ జీవో నెం. 1231 విడులైంది. ప్రపంచబ్యాంకు, ఎడిబి సాయంతో నిర్మించే ఈ స్టేషన్ 8,400 క్యూసెక్కుల సామర్థ్యం కలిగి ఉంటుంది. ఇది ప్రస్తుతం ఉన్న పంపింగ్ స్టేషన్‌కు అదనంగా పనిచేస్తుంది.
ప్రస్తుతం కొండవీటి వాగుపై ఉన్న ఎత్తిపోతల, ఇదే విధంగా రెండోది నిర్మిస్తారు.
రూ.9,000 కోట్లకు పైగా రుణాలు
నాఫిడ్ బ్యాంకు నుంచి రూ.7,500 కోట్లు (జీవో నెం. 228): రాజధాని మౌలిక సదుపాయాలకు ఖర్చు చేస్తారు. చెక్కు ఇప్పటికే సీఆర్‌డీఏకు బదిలీ చేసింది.
పవర్ ఫైనాన్స్ కార్పొరేషన్ నుంచి రూ.1,500 కోట్లు (జీవో నెం. 227): క్యాబినెట్ ఆమోదం లభించింది. ప్రభుత్వ గ్యారంటీతో ఈ రుణం తీసుకుంటున్నారు.
వేగంగా రాజధాని నిర్మాణ పనులు
ఈ ఆమోదాలు అమరావతి నిర్మాణంలో మల్టీ-డైమెన్షనల్ అభివృద్ధిని సూచిస్తున్నాయి.
1. పర్యావరణం: సీవరేజ్ ప్లాంట్లతో మురుగునీరు శుద్ధి.
2. సురక్షిత నగరం: పంపింగ్ స్టేషన్‌తో వరద నివారణ.
3. భవిష్యత్ టెక్ హబ్: క్వాంటం సెంటర్‌తో ఇన్నోవేషన్.
4. మౌలిక సదుపాయాలు: ప్యాకేజీ 51తో రోడ్లు, డ్రైనేజీ.
మొత్తం రూ.4,000 కోట్లకు పైగా ప్రత్యక్ష పనులు, రూ.9,000 కోట్ల రుణాలతో రాజధాని ప్రాజెక్టు ‘పూర్తి స్థాయి కార్యాచరణ’ లోకి ప్రవేశిస్తోంది. ప్రపంచబ్యాంకు, ఎడిబి సహకారం అంతర్జాతీయ నమ్మకాన్ని పెంచుతుండగా, రుణ భారం భవిష్యత్ ఆర్థిక స్థిరత్వంపై ప్రశ్నలు లేవనెత్తుతోంది. అయినప్పటికీ, ఈ నిర్ణయాలు ‘‘అమరావతి 2.0’’ దిశగా దృఢమైన అడుగులుగా కనిపిస్తున్నాయి.
