'మంత్రి కొడుకా, మజాకా? పనిలో పనిగా పీఏ కూడా..!

ఏపీ రాష్ట్ర మంత్రి గుమ్మడి సంధ్యారాణి కుమారుడు పృథ్వీ, ఆమె వ్యక్తిగత సహాయకుడు సతీష్ వ్యవహారం రాష్ట్రవ్యాప్తంగా కలకలం రేపుతోంది. ఉద్యోగం కోసం వచ్చిన ఓ యువతిని వీరిద్దరూ వేధించారంటూ సాలూరు పోలీసు స్టేషన్ లో ఇటీవల కేసు నమోదు అయింది. ఉద్యోగం ఇప్పిస్తామని పెద్ద మొత్తంలో డబ్బు వసూలు చేయడంతో పాటు తనను శారీరకంగా, మానసికంగా వేధింపులకు గురి చేశారంటూ ఓ మహిళ ఫిర్యాదు చేశారు. దీనిపై త్వరలో విచారించి ఓ నివేదిక ఇవ్వాలని సాలూరు పోలీసులను పార్వతీపురం మన్యం జిల్లా ఎస్పీ ఆదేశించారు.

ఈ నేపథ్యంలో మంత్రి సంధ్యారాణి నిన్న మీడియాతో మాట్లాడారు. తనపై ఎలాంటి ఆరోపణలు చేసినా భరిస్తానని, కానీ తన బిడ్డలపై ఆరోపణలు చేస్తే సహించనని మంత్రి హెచ్చరించారు. దమ్ము, ధైర్యం ఉంటే రాజకీయంగా తనను ఎదుర్కోవాలని సవాల్ విసిరారు. పోలీసుల విచారణ జరుగుతోందని, ఆ తర్వాత అన్నింటికి సమాధానం ఇస్తానని మంత్రి స్పష్టం చేశారు.

‘నన్ను రాజకీయంగా ఎదుర్కోలేకే నాపైనా, నా కొడుకుపైన అసత్య ఆరోపణలు చేస్తున్నారు. నా కొడుకుకు ఎలాంటి సంబంధం లేని విషయంలో ఇరికించారు’ అని మంత్రి గుమ్మిడి సంధ్యారాణి మండిపడ్డారు. ‘ఎలాంటి పాపం తెలియని తన కుమారుడి జోలికొస్తే ఊరుకునేది లేదు. రాజకీయంగా నా ఎదుగుదల చూసి ఓర్వలేక నన్ను లక్ష్యంగా చేసుకున్నారు. జగన్‌ మీడియా (సాక్షి) నన్ను, నా కుమారుడిని లక్ష్యంగా చేసుకొని గతంలోనూ తప్పుడు వార్తలు రాసింది. విజయవాడలో నా కుమారుడు పుట్టిన రోజు వేడుకలు చేసుకుంటే తిరుపతిలో చిందులు అని రాశారు. నేను కేసు పెట్టేందుకు సిద్ధమవ్వడంతో నా కాళ్లు పట్టుకుని బలిమలాడుకుని క్షమాపణలు చెప్పారు. ఇప్పుడు మళ్లీ నా కుమారుడిని లక్ష్యంగా చేసుకుని ఆరోపణలు చేస్తున్నారు. ఆరోపణలు వచ్చిన వెంటనే నా వ్యక్తిగత సిబ్బందిని పక్కన పెట్టాను. పోలీసులకు ఫిర్యాదు చేశాను. ఆరోపణల్లో నిజాలను నిగ్గుతేల్చాలని కోరాను. వారం రోజుల్లో వాస్తవం ఏమిటనేది ప్రజలకు తెలుస్తుంది’ అని మంత్రి సంధ్యారాణి తెలిపారు.